Health Tips: సీజన్ మారినప్పుడల్లా జలుబు, జ్వరం వస్తుందా.. వాతావరణం మారినా ఆరోగ్యంగా ఉండాలంటే ఈ పనులు చేయండి

Health Tips: వాతావరణం మారినప్పుడల్లా మన శరీరంలో వచ్చే మార్పుల వల్ల జలుబు, దగ్గు, జ్వరం వంటి అనారోగ్య సమస్యలు తలెత్తుతుంటాయి. వీటి నుండి మనల్ని మనం రక్షించుకోవడానికి రోగనిరోధక శక్తిని పెంచుకోవడం ఎంతో ముఖ్యం. దీని కోసం ఎటువంటి ఖరీదైన చికిత్సలు, సప్లిమెంట్ల అవసరం లేకుండా మన దినచర్యలో కొన్ని చిన్న మార్పులు చేసుకుంటే సరిపోతుంది. ఈ అనారోగ్య సమస్యల నుంచి ఈజీగా గట్టెక్కవచ్చు.

ముఖ్యంగా ఈ సమయంలో దాహం వేయకపోయినా ప్రతిరోజూ కనీసం ఏడు నుండి ఎనిమిది గ్లాసుల నీటిని తప్పకుండా తాగుతూ శరీరాన్ని హైడ్రేటెడ్‌గా ఉంచుకోవాలి. ఈ అలవాటు మన శరీరంలో పేరుకుపోయిన విషపదార్థాలను సమర్థవంతంగా బయటకు పంపడానికి ఎంతగానో తోడ్పడుతుంది. అలాగే, వాతావరణం మారినప్పుడు చాలా మందిలో ఆకలి తగ్గిపోవడం సహజం. అయితే ఇలా ఏమీ తినకుండా ఉండటం వల్ల శరీరం మరింత బలహీనపడుతుంది.

కాబట్టి ఆయా కాలాల్లో లభించే తాజా పండ్లు, ఆకుకూరలు, పప్పులు, తృణధాన్యాలు, ఎండు ఫలాలను మన రోజువారీ ఆహారంలో భాగం చేసుకోవడం ద్వారా శరీరానికి అవసరమైన పోషకాలను అందించవచ్చు. దీనితో పాటు ప్రతిరోజూ రాత్రి పూట ఎక్కువ సమయం మొబైల్ వాడటం వంటి అలవాట్లను పక్కనబెట్టి, ఏడు నుండి ఎనిమిది గంటల పాటు ప్రశాంతంగా నిద్రపోవడం చాలా అవసరం. మనం నిద్రపోయే సమయంలోనే మన శరీరం దెబ్బతిన్న కణాలను బాగు చేసుకుని తిరిగి పునరుత్తేజం పొందుతుంది.

ఇక రోగనిరోధక వ్యవస్థను మరింత బలోపేతం చేయడానికి రోజువారీ వ్యాయామం ఎంతగానో దోహదపడుతుంది. ప్రతిరోజూ ఉదయాన్నే కనీసం ముప్పై నిమిషాల పాటు నడక, యోగా, సైక్లింగ్ లేదా తేలికపాటి వ్యాయామాలు చేయడం వల్ల శరీరంలో రక్త ప్రసరణ మెరుగుపడటమే కాకుండా ఒత్తిడి కూడా అదుపులో ఉంటుంది. మానసిక ఒత్తిడి ఎక్కువగా ఉంటే అది వ్యాధులతో పోరాడే శరీర సామర్థ్యాన్ని క్రమంగా తగ్గిస్తుంది. అందువల్ల మానసిక ప్రశాంతత కోసం క్రమం తప్పకుండా ధ్యానం చేయడం.. మనసుకు నచ్చిన పనులలో సమయాన్ని గడపడం వంటివి చేస్తూ ఒత్తిడిని దూరం చేసుకోవడం ద్వారా మారే వాతావరణంలో కూడా ఆరోగ్యంగా, ఉత్సాహంగా ఉండవచ్చు.

మారే వాతావరణంలో తలెత్తే ప్రాథమిక అనారోగ్య సమస్యలను అదుపు చేయడానికి మన వంటిల్లే ఒక అద్భుతమైన ఔషధాల గని. వంటింట్లో లభించే అల్లం, పసుపు, తేనె, తులసి వంటి సహజ పదార్థాలు అద్భుతమైన యాంటీబయాటిక్స్, యాంటీ-ఇన్‌ఫ్లమేటరీ గుణాలను కలిగి ఉంటాయి. గొంతునొప్పి, దగ్గు తీవ్రంగా ఉన్నప్పుడు ఒక కప్పు గోరువెచ్చని నీటిలో లేదా పాలల్లో కొద్దిగా పసుపు, మిరియాల పొడి కలిపి తాగడం వల్ల తక్షణ ఉపశమనం లభిస్తుంది. పసుపులో ఉండే కర్క్యుమిన్ అనే పదార్థం శరీరంలో చేరిన ఇన్‌ఫెక్షన్లపై సమర్థవంతంగా పోరాడుతుంది. అలాగే అల్లాన్ని చిన్న ముక్కలుగా చేసి నీటిలో బాగా మరిగించి, ఆ కషాయాన్ని వడకట్టి అందులో ఒక స్పూన్ తేనె కలుపుకుని తాగితే గొంతు గరగర, దగ్గు క్షణాల్లో తగ్గుముఖం పడతాయి.

తులసి ఆకుల రసానికి కొద్దిగా తేనె కలిపి తీసుకోవడం వల్ల శరీరంలో రోగనిరోధక కణాలు మరింత బలోపేతం అవుతాయి. ఒత్తిడి ఎక్కువగా ఉన్నప్పుడు కూడా రోగనిరోధక శక్తి బలహీనపడుతుంది కాబట్టి, మానసిక ప్రశాంతత కోసం ధ్యానం వంటి పద్ధతులను పాటించాలి. ఈ విధంగా జీవనశైలిలో చిన్నచిన్న మార్పులు చేసుకుంటూ.. మన పూర్వీకులు అందించిన వంటింటి చిట్కాలను పాటించడం ద్వారా ఎటువంటి ఖరీదైన చికిత్సలు లేకుండానే మారుతున్న వాతావరణ ప్రభావం నుండి మన శరీరాన్ని సురక్షితంగా కాపాడుకోవచ్చు.