ట్రంప్కు భారీ షాక్.. ఇరాన్ యుద్ధంపై US హౌస్ తిరుగుబాటు.. సొంత పార్టీ నుంచే ఎదురుదెబ్బ..
Trump Faces Major Setback as US House Votes to Curb Iran War Powers
ఇరాన్తో మూడు నెలలుగా కొనసాగుతున్న సైనిక ఉద్రిక్తతల నేపథ్యంలో అమెరికా అధ్యక్షుడు డొనాల్డ్ ట్రంప్కు స్వదేశ రాజకీయాల్లో ఊహించని ఎదురుదెబ్బ తగిలింది. అమెరికా ప్రతినిధుల సభ (హౌస్ ఆఫ్ రిప్రజెంటేటివ్స్) బుధవారం కీలక తీర్మానాన్ని ఆమోదిస్తూ.. ఇరాన్కు సంబంధించిన యుద్ధ కార్యకలాపాల నుంచి అమెరికా దళాలను వెంటనే ఉపసంహరించుకోవాలని ప్రభుత్వాన్ని కోరింది. ఈ తీర్మానం చట్టపరంగా వెంటనే అమల్లోకి వచ్చే నిర్ణయం కాకపోయినా.. ట్రంప్ ప్రభుత్వ విదేశాంగ, రక్షణ విధానాలపై పెరుగుతున్న అసంతృప్తికి ఇది స్పష్టమైన సంకేతంగా రాజకీయ వర్గాలు భావిస్తున్నాయి.
ప్రతినిధుల సభలో ట్రంప్కు చెందిన రిపబ్లికన్ పార్టీకి మెజారిటీ ఉన్నప్పటికీ.. నలుగురు రిపబ్లికన్ సభ్యులు డెమోక్రాట్లతో కలిసి ఈ తీర్మానానికి మద్దతు ఇవ్వడం ప్రత్యేకంగా చర్చనీయాంశమైంది. హోరాహోరీగా సాగిన ఓటింగ్లో 215 మంది సభ్యులు అనుకూలంగా, 208 మంది వ్యతిరేకంగా ఓటు వేశారు. ఈ ఫలితం ద్వారా ట్రంప్ యుద్ధ విధానాలపై ఆయన స్వంత పార్టీలో కూడా విభేదాలు పెరుగుతున్నాయని స్పష్టమైంది.
తీర్మానం ఆమోదం అనంతరం హౌస్ ఫారిన్ అఫైర్స్ కమిటీలోని డెమోక్రాట్లు స్పందిస్తూ.. ఇరాన్పై కొనసాగుతున్న యుద్ధం ప్రజాదరణ లేని చర్యగా మారిందని పేర్కొన్నారు. అమెరికా ప్రజల అభిప్రాయాన్ని ప్రతిబింబిస్తూ.. కాంగ్రెస్ అనుమతి లేకుండా కొనసాగుతున్న ఈ సైనిక చర్యలకు ముగింపు పలకాల్సిన సమయం వచ్చిందని వారు వ్యాఖ్యానించారు. యుద్ధం, శాంతి వంటి కీలక నిర్ణయాల్లో కాంగ్రెస్కు రాజ్యాంగబద్ధమైన పాత్ర ఉందని, దానిని పునరుద్ఘాటించడమే తమ లక్ష్యమని తెలిపారు.
డెమోక్రాట్ల ఆరోపణల ప్రకారం.. ట్రంప్ ప్రభుత్వం ఫిబ్రవరి చివరలో కాంగ్రెస్ ముందస్తు అనుమతి లేకుండానే ఇజ్రాయెల్తో కలిసి ఇరాన్పై దాడులకు దిగింది. అమెరికా యుద్ధ అధికారాల చట్టం ప్రకారం అధ్యక్షుడు యుద్ధ చర్యలను ప్రారంభించిన తర్వాత 60 రోజుల్లో కాంగ్రెస్ ఆమోదం పొందాలి. అయితే ఆ గడువు ముగిసిపోయినప్పటికీ ప్రభుత్వం తగిన అనుమతి పొందలేదని విమర్శలు వినిపిస్తున్నాయి. మరోవైపు, ఏప్రిల్లో జరిగిన కాల్పుల విరమణ కారణంగా ఆ గడువు వర్తించదని వైట్ హౌస్ వాదిస్తోంది.
ఇదిలా ఉండగా.. క్షేత్రస్థాయిలో ఉద్రిక్త పరిస్థితులు కొనసాగుతున్నాయి. అమెరికా బలగాలు ఇరాన్కు చెందిన డ్రోన్లను కూల్చివేసినట్లు ప్రకటించగా, ప్రతిగా ఇరాన్ మద్దతు గల బలగాలు గల్ఫ్ ప్రాంత దేశాలపై డ్రోన్లు, క్షిపణి దాడులు జరిపినట్లు సమాచారం. అయినప్పటికీ యుద్ధం ముగిసిపోయిందని ట్రంప్ ప్రభుత్వం ప్రకటిస్తుండగా, అవసరమైతే మళ్లీ దాడులు ప్రారంభిస్తామని ట్రంప్ పలుమార్లు హెచ్చరిస్తున్నారు.
రాబోయే నవంబర్ మధ్యంతర ఎన్నికల నేపథ్యంలో యుద్ధం రాజకీయ అంశంగా మారింది. యుద్ధ వ్యతిరేక భావాలు ఓటర్లలో పెరుగుతున్నాయని గుర్తించిన కొందరు రిపబ్లికన్ సభ్యులు పార్టీ నిర్ణయానికి వ్యతిరేకంగా ఓటు వేసినట్లు విశ్లేషకులు భావిస్తున్నారు. ప్రస్తుతం హౌస్ ఆమోదించిన బిల్లు సెనేట్కు వెళ్లనుంది. అక్కడ కూడా ఆమోదం పొందినప్పటికీ, అధ్యక్షుడిగా ట్రంప్కు ఉన్న వీటో అధికారంతో దాన్ని అడ్డుకునే అవకాశం ఉంది. అయినప్పటికీ ఈ పరిణామం ట్రంప్ విదేశాంగ విధానాలపై పెరుగుతున్న రాజకీయ ఒత్తిడిని, అలాగే అమెరికా రాజకీయ వ్యవస్థలో కాంగ్రెస్ పాత్ర ప్రాముఖ్యతను మరోసారి వెలుగులోకి తీసుకొచ్చింది.
సంబంధిత వార్తలు
