CJP Protest: జంతర్ మంతర్ ఘర్షణలపై సుప్రీంకోర్టు సీరియస్.. ‘సిట్’ దర్యాప్తునకు ఆదేశాలు? నేడే విచారణ!
Supreme Court
కాక్రోచ్ జనతా పార్టీ (సీజేపీ) నాయకత్వంలో జులై 20వ తేదీన జంతర్ మంతర్ వద్ద నిర్వహించిన నిరసనలో వేలాది మంది ప్రదర్శకుల పట్ల పోలీసులు క్రూరంగా ప్రవర్తించారని ఆరోపిస్తూ దాఖలైన పిటిషన్లపై సుప్రీంకోర్టు సోమవారం (ఆగస్టు 3) విచారణ చేపడుతుంది. పరీక్షల్లో అవకతవకలు, నీట్ ప్రశ్నాపత్రాల లీక్ను ప్రశ్నిస్తూ విద్యార్థిలోకం ఆన్లైన్ ద్వారా ఏకమై చేసిన చారిత్రాత్మక పోరాటం సందర్భంగా జరిగిన పోలీసు చర్యలు ప్రపంచం దృష్టిని ఆకర్షించడంతో ఈ కేసులో సుప్రీంకోర్టు విచారణ అత్యంత ప్రాధాన్యత సంతరించుకుంది. ప్రధాన న్యాయమూర్తి జస్టిస్ సూర్యకాంత్, జస్టిస్ జోమాల్య బాగ్చి, వి. మోహన్లతో కూడిన ధర్మాసనం ఈ విచారణ చేపడుతుంది.
నిరసన ప్రదర్శన సందర్భంగా విద్యార్థులే పోలీసులపై దాడి చేశారా? కొందరు దుండగులు దాడులు చేశారా? అనే విషయంలో నిజానిజాలు తేల్చేందుకు సుప్రీంకోర్టు మాజీ న్యాయమూర్తి సారథ్యంలో ఒక ప్రత్యేక దర్యాప్తు బృందం (సిట్) ద్వారా నిష్పక్షపాత విచారణ జరిపించే అవకాశం ఉందని న్యాయస్థానం సూచనాప్రాయంగా తెలియజేసింది. ఈ కేసులో ఎలాంటి రహస్యాలకు తావు లేకుండా న్యాయబద్ధంగా స్వతంత్ర దర్యాప్తు జరిపే విషయంపై సుప్రీంకోర్టు తీవ్రంగా ఆలోచిస్తోంది.
పెల్లెట్ బాధితులు, నిరసన ప్రదర్శకులు సుప్రీంకోర్టులో దాఖలు చేసిన పిటిషన్లలో పోలీసు క్రూరత్వంపై ఫిర్యాదులు చేశారు. విద్యార్థులపై ఎలాంటి ఒత్తిడి చేయవద్దని, ఆరోపణలు ఎదుర్కొంటున్న ప్రదర్శకులపై ఎలాంటి చర్యలు తీసుకోకుండా సహనం పాటించాలని, అదేవిధంగా ఇంతకు ముందు ఎలాంటి నేర చరిత్రలేని 18 ఏళ్ల లోపు వయసు గల విద్యార్థులను విడుదల చేయాలని జులై 28న సుప్రీంకోర్టు ఆదేశాలు ఇచ్చింది. నేర చరిత్రగల విద్యార్థులకు ఈ విధమైన రక్షణ చర్యలు అమలు చేయాల్సిన అవసరం లేదని కూడా స్పష్టం చేసింది.
రాష్ట్రాలు ఎలాంటి చర్యలు తీసుకోకుండా అడ్డుపడింది. ఈ విషయంలో వచ్చిన అన్ని ఆరోపణలపై ఒక టాస్క్ఫోర్స్ ఏర్పాటు చేసి సమగ్రంగా, చాలా న్యాయబద్ధంగా, బాహాట పద్ధతుల్లో స్వతంత్ర విచారణ చేయాల్సిన అవసరం ఉందని ఆలోచిస్తున్నట్లు న్యాయస్థానం పేర్కొంది. పిటిషనర్లు చేసిన ఆరోపణలు, ప్రాథమికంగా వెల్లడైన విషయాలు చూస్తే ఈ హింసాత్మక ఘటనలపై నిష్పక్షపాతంగా, స్వతంత్ర దర్యాప్తు జరపాల్సిన అనివార్య అవసరం కనిపిస్తోందని, ఈ విచారణ ద్వారా పోలీసు సిబ్బంది కుటుంబ సభ్యులు చేసిన ఆరోపణలను, అదేవిధంగా భారత సొలిసిటర్ జనరల్ లేవనెత్తిన సమస్యలన్నింటినీ కూడా పరిష్కరిస్తుందని సర్వోన్నత న్యాయస్థానం స్పష్టం చేసింది.
ఈ విషయంలో ఒక సమగ్ర ప్రత్యేక దర్యాప్తునకు ఆదేశించే ముందు కేంద్ర ప్రభుత్వం, రాష్ట్ర ప్రభుత్వాల అభిప్రాయాలను కూడా తెలుసుకోవాల్సిన అవసరం ఉందని భావించి వారికి అవకాశం, తగిన సమయం ఇస్తూ ఈ కేసును తదుపరి తేదీకి వాయిదా వేసింది. ఈ కేసులో మహారాష్ట్ర, బీహార్, అసోం, ఉత్తరప్రదేశ్, మధ్యప్రదేశ్, పశ్చిమ బెంగాల్, కేరళ రాష్ట్రాలకు సర్వోన్నత న్యాయస్థానం నోటీసులు జారీ చేసింది. ఆయా రాష్ట్రాలకు చెందిన అడ్వకేట్ జనరల్స్ దృశ్యమాధ్యమ పద్ధతిలో తదుపరి నిర్దేశిత తేదీనాటికి విచారణకు హాజరు కావాలని ఆదేశించింది.
అదేవిధంగా వరుసగా అనేక తాత్కాలిక ఆదేశాలను జారీ చేసింది. నిరసన ప్రదర్శనలు జరిగిన రాష్ట్రాల్లో సీసీ ఫుటేజీలను భద్రపరచాలని, డ్రోన్ రికార్డింగ్లను భద్రపరచాలని, పోలీసులు తగిలించుకున్న బాడీ కెమెరాల్లోని సమాచారాన్ని జాగ్రత్తగా భద్రపరచాలని, వైర్లెస్ కమ్యూనికేషన్ సమాచార రికార్డింగ్లు, పీసీఆర్ లాగ్స్, ఇతర డిజిటల్ సాక్ష్యాలను సిద్ధం చేయాలని ఆదేశించింది. నిరసనల సందర్భంగా విద్యార్థుల నుంచి సేకరించిన వ్యక్తిగత డిజిటల్ రికార్డింగ్ సమాచారాన్ని కూడా భద్రపరచాలని కోరింది. ఈ వివరాలను ఎట్టి పరిస్థితుల్లోనూ ముందుగా బయటకు ప్రచురించవద్దని కూడా తెలియజేసింది.
చట్టాన్ని ఎవరు తమ చేతుల్లోకి తీసుకున్నా గానీ, అణచివేత చర్యలకు పాల్పడినా గానీ వారిని లక్ష్యంగా చేసుకుని న్యాయపరమైన చర్యలు తీసుకుంటామని కూడా సుప్రీంకోర్టు ముందుగానే స్పష్టం చేసింది. “ఈ వివాదానికి సంబంధించి కొనసాగుతున్న నిరసన ప్రదర్శనల్లో 18 ఏళ్ల లోపు వయసు గల పిల్లలను అరెస్టు చేస్తే అన్ని రాష్ట్రాలు వారిని విడుదల చేయాలి. వారిని నేరస్థులుగా ప్రకటిస్తూ ఎలాంటి చర్యలూ తీసుకోవద్దు” అని సుప్రీంకోర్టు ఆదేశాలు జారీ చేసింది. అలాంటి విద్యార్థులను వారి సొంత పూచీకత్తుపైన లేదా వారి కుటుంబ సభ్యుల హామీ పైన విడుదల చేయాలని కోరింది. వారిని జామీనులు ఇవ్వాల్సిందిగా ఒత్తిడి చేయవద్దని ఆదేశించింది.
పెల్లెట్ గన్ను విద్యార్థులపై ఉపయోగించారని, ఎలక్ట్రిక్ బటన్ లాఠీలను ఉపయోగించారని పోలీసులపై చేసిన ఆరోపణలను కూడా న్యాయస్థానం పరిగణనలోకి తీసుకుంది. వాటిపై కూడా సమగ్ర విచారణ చేస్తుంది. పోలీసులు ఈ విధమైన ఆయుధాలు ఉపయోగించడం వల్ల విద్యార్థులకు తీవ్ర గాయాలయ్యాయని, కొందరు కంటిచూపును పోగొట్టుకునే పరిస్థితి వచ్చిందని వార్తలు వెలువడ్డాయి. ఎఫ్ఐఆర్లు దాఖలైతే వాటిపై విచారణ చేయాలని, కానీ నిరసన ప్రదర్శనలు చేస్తున్న విద్యార్థులకు వ్యతిరేకంగా ఎలాంటి కఠినమైన, ఒత్తిడికి గురిచేసే చర్యలు తీసుకోవద్దని ఢిల్లీ ప్రభుత్వానికి, ఇతర రాష్ట్రాల ప్రభుత్వాలకు సుప్రీంకోర్టు ఆదేశాలు జారీ చేసింది.
సంబంధిత వార్తలు
