Mirza Fakhrul Islam Alamgir: బంగ్లాదేశ్ కొత్త అధ్యక్షుడు మీర్జా ఫక్రుల్ ఇస్లాం ఆలంగీర్ ఎవరు.. 35 ఏళ్ల తర్వాత జరిగిన తొలి ఎన్నికలో ఘన విజయం సాధించిన బీఎన్‌పీ మాజీ ప్రధాన కార్యదర్శి..

Prajapaksham 20 Aug 2026 1 నిమిషాల పఠనం ప్రపంచం

Mirza Fakhrul Islam Alamgir

Mirza Fakhrul Islam Alamgir: బంగ్లాదేశ్‌లో కీలక రాజకీయ పరిణామం చోటుచేసుకుంది. దాదాపు 35 ఏళ్ల తర్వాత తొలిసారి ఒకటి కంటే ఎక్కువ మంది అభ్యర్థులు పోటీ చేసిన అధ్యక్ష ఎన్నికల్లో బంగ్లాదేశ్ నేషనలిస్ట్ పార్టీ (BNP) మాజీ ప్రధాన కార్యదర్శి మీర్జా ఫక్రుల్ ఇస్లాం ఆలంఘీర్ దేశ 23వ అధ్యక్షుడిగా ఎన్నికయ్యారు.

జాతీయ సంసద్‌లో గురువారం జరిగిన ఎన్నికల్లో ఆలంఘీర్‌కు 255 ఓట్లు లభించాయి. ఆయన ప్రత్యర్థి, బంగ్లాదేశ్ జమాత్-ఎ-ఇస్లామీ, నేషనల్ సిటిజన్స్ పార్టీ (NCP) నేతృత్వంలోని 11 పార్టీల ప్రతిపక్ష కూటమి అభ్యర్థి ఓలీ అహ్మద్‌కు 88 ఓట్లు వచ్చాయి. మొత్తం 343 మంది పార్లమెంట్ సభ్యులు ఓటింగ్‌లో పాల్గొన్నారు.

ఈ అధ్యక్ష ఎన్నికకు ప్రత్యేక ప్రాధాన్యత ఏర్పడటానికి ప్రధాన కారణం గత 35 ఏళ్లలో తొలిసారి ఒకటి కంటే ఎక్కువ మంది అభ్యర్థులు బరిలో నిలవడమే. గతంలో ప్రతిపక్ష పార్టీలు అధ్యక్ష ఎన్నికల్లో అభ్యర్థులను నిలబెట్టకపోవడంతో ఒకే అభ్యర్థి ఏకగ్రీవంగా ఎన్నికయ్యే పరిస్థితి ఉండేది. ఈసారి మాత్రం అధికార BNP అభ్యర్థిగా ఆలంఘీర్, ప్రతిపక్ష కూటమి తరఫున ఓలీ అహ్మద్ పోటీ చేయడంతో ఎన్నికలు ఉత్కంఠగా సాగాయి. ప్రధాన ఎన్నికల కమిషనర్ ఏఎస్ఎం నాసిర్ ఉద్దీన్ పర్యవేక్షణలో మధ్యాహ్నం 2 గంటల నుంచి సాయంత్రం 5 గంటల వరకు పోలింగ్ జరిగింది. అనంతరం ఫలితాలను ప్రకటించారు.

బంగ్లాదేశ్ మాజీ అధ్యక్షుడు మహమ్మద్ షహాబుద్దీన్ గత నెలలో తీవ్ర ఆరోగ్య సమస్యల కారణంగా పదవికి రాజీనామా చేశారు. 76 ఏళ్ల షహాబుద్దీన్ 2023 ఏప్రిల్‌లో దేశ 22వ అధ్యక్షుడిగా బాధ్యతలు చేపట్టారు. ఆయన రాజీనామా అనంతరం అప్పటి స్పీకర్ మేజర్ (రిటైర్డ్) హాఫిజ్ ఉద్దీన్ అహ్మద్ రాజ్యాంగంలోని ఆర్టికల్ 54 ప్రకారం తాత్కాలికంగా అధ్యక్షుడి విధులను నిర్వర్తించారు.

బంగ్లాదేశ్ రాజ్యాంగం ప్రకారం అధ్యక్ష పదవి ఖాళీ అయినప్పుడు కొత్త అధ్యక్షుడు ఎన్నికయ్యే వరకు స్పీకర్ ఆ బాధ్యతలు నిర్వహిస్తారు. పదవి ఖాళీ అయిన 90 రోజుల్లోపు కొత్త అధ్యక్షుడిని ఎన్నుకోవాల్సి ఉంటుంది. ఈ నేపథ్యంలో తాజాగా జరిగిన ఎన్నికతో తాత్కాలిక అధ్యక్షుడి వ్యవస్థకు ముగింపు పలికింది.

అధ్యక్ష అభ్యర్థిగా ఎంపికైన తర్వాత మీర్జా ఫక్రుల్ ఇస్లాం ఆలంఘీర్ BNP ప్రధాన కార్యదర్శి పదవితో పాటు పార్టీ జాతీయ స్థాయీ కమిటీ సభ్యత్వానికి రాజీనామా చేశారు. ప్రధానమంత్రి, BNP చైర్మన్ తారిక్ రెహమాన్‌తో చర్చల అనంతరం ఆలంఘీర్‌ను అధ్యక్ష అభ్యర్థిగా ఎంపిక చేసినట్లు పార్టీ సీనియర్ నేతలు తెలిపారు.

బంగ్లాదేశ్ జాతీయ సంసద్‌లో మొత్తం 350 సీట్లు ఉన్నాయి. అయితే ఒక నియోజకవర్గంలో ఎన్నిక నిలిచిపోవడంతో ప్రస్తుతం 349 మంది సభ్యుల మధ్య అధ్యక్ష ఎన్నిక జరిగింది. వీరిలో 343 మంది తమ ఓటు హక్కును వినియోగించుకున్నారు. తాత్కాలిక అధ్యక్షుడు హాఫిజ్ ఉద్దీన్ అహ్మద్, BNP చైర్మన్ తారిక్ రెహమాన్ సహా పలువురు ఎంపీలు ఓటు వేశారు.

BNPలో కీలక నాయకుడిగా ఉన్న మీర్జా ఫక్రుల్ ఇస్లాం ఆలంఘీర్ ఇప్పుడు దేశ అత్యున్నత రాజ్యాంగ పదవిని చేపట్టబోతున్నారు. దీంతో బంగ్లాదేశ్ రాజకీయాల్లో మరో కీలక మార్పు చోటుచేసుకున్నట్లయింది. 35 ఏళ్ల తర్వాత పోటీతో జరిగిన అధ్యక్ష ఎన్నికలు, మాజీ అధ్యక్షుడి రాజీనామా, BNP సీనియర్ నేత ఆలంఘీర్ అధ్యక్షుడిగా ఎన్నిక కావడం.. బంగ్లాదేశ్ రాజకీయ పరిణామాల్లో ఈ ఎన్నికను కీలక ఘట్టంగా మార్చాయి.