రాజకీయాల్లో ఫాసిస్టులకు చోటులేదు.. పదేళ్లుగా ప్రజాస్వామ్య వ్యవస్థలను ధ్వంసం చేస్తున్నారు: రాహుల్ గాంధీ

హైదరాబాద్ వేదికగా కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీ కేంద్ర ప్రభుత్వంపై తీవ్ర విమర్శలు చేశారు. దేశంలో గత పదేళ్లుగా ఫాసిస్టు ధోరణులు పెరిగిపోతున్నాయని, ప్రజాస్వామ్య వ్యవస్థలను క్రమంగా ధ్వంసం చేస్తున్నారని ఆరోపించారు. రాజకీయాల్లో ఫాసిస్టులకు చోటు ఉండకూడదని స్పష్టం చేశారు. హైదరాబాద్‌లోని హెచ్‌ఐసీసీలో నిర్వహించిన ‘భారత్ సమ్మిట్ 2026’ ముగింపు సమావేశంలో పాల్గొన్న ఆయన.. ప్రజాస్వామ్యం, రాజకీయ వ్యవస్థలు, ఆర్థిక అసమానతలు, కార్పొరేట్ సంస్థల ప్రభావం వంటి అంశాలపై కీలక వ్యాఖ్యలు చేశారు.

సమాజంలో, వ్యాపార రంగంలో, విద్యా సంస్థల్లో, రాజకీయాల్లో తమకు మాత్రమే అన్నీ తెలుసని భావించే వ్యక్తులు ఉంటారని రాహుల్ గాంధీ అన్నారు. రాజకీయాల్లో ఇలాంటి వ్యక్తులనే ఫాసిస్టులుగా పరిగణిస్తామని వ్యాఖ్యానించారు. వ్యవస్థలు బలహీనపడినప్పుడు నియంతృత్వ ధోరణులు బయటపడతాయని, ఇతరుల అభిప్రాయాలను వినకుండా కేవలం తమ గొంతును మాత్రమే వినిపించాలనుకోవడం ఫాసిస్టుల లక్షణమని విమర్శించారు.

భారత ప్రజాస్వామ్య భవిష్యత్తు కేవలం మన దేశానికే పరిమితం కాదని, ప్రపంచవ్యాప్తంగా కీలక ప్రభావం చూపుతుందని రాహుల్ గాంధీ పేర్కొన్నారు. భారత ప్రజాస్వామ్యంపై తనకు ఎంతో నమ్మకం ఉందని, దాన్ని కాపాడుకోవాల్సిన బాధ్యత అందరిపై ఉందని అభిప్రాయపడ్డారు.

2014, 2024 ఎన్నికలపై ఆరోపణలు

2014 పార్లమెంట్ ఎన్నికలు గతంలో ఎన్నడూ లేని విధంగా జరిగాయని రాహుల్ గాంధీ వ్యాఖ్యానించారు. ఆ ఎన్నికల్లో వందల కోట్ల రూపాయలు ఖర్చు చేశారని, అప్పుడే దేశ ప్రజాస్వామ్య వ్యవస్థ దెబ్బతినడం ప్రారంభమైందని ఆరోపించారు. 2024 లోక్‌సభ ఎన్నికల్లోనూ అవకతవకలు జరిగాయని విమర్శించారు.

ముఖ్యంగా మహారాష్ట్ర ఎన్నికల ఫలితాలను ప్రస్తావిస్తూ.. లోక్‌సభ ఎన్నికల్లో మహాయుతి కూటమికి ఎక్కువ స్థానాలు రాలేదని, ఆ తర్వాత కొద్ది నెలలకే జరిగిన అసెంబ్లీ ఎన్నికల్లో మాత్రం ఆ కూటమి భారీ విజయం సాధించిందని పేర్కొన్నారు. మూడు నెలల వ్యవధిలో 70 లక్షలకు పైగా ఓట్లు కొత్తగా చేర్చారని, ఆ ఓట్లే బీజేపీ విజయానికి కారణమయ్యాయని ఆరోపించారు. ప్రజాస్వామ్య వ్యవస్థలు ఇంతలా దెబ్బతింటున్నప్పటికీ దేశంలో ప్రజాస్వామ్యం ఉందని గొప్పలు చెప్పుకుంటున్నారని విమర్శించారు.

రాజకీయాలంటే కేవలం గట్టిగా మాట్లాడటం, ప్రత్యర్థులపై పదునైన విమర్శలు చేయడం మాత్రమే కాదని రాహుల్ గాంధీ అన్నారు. ప్రజాస్వామ్య వ్యవస్థలను బలోపేతం చేయడం, ప్రజల అభిప్రాయాలకు విలువ ఇవ్వడం కూడా అంతే ముఖ్యమని ఆయన వ్యాఖ్యానించారు.

అదానీ వ్యాపార వృద్ధిపై మోదీకి ముడిపెట్టి విమర్శలు

పారిశ్రామికవేత్త గౌతమ్ అదానీ వ్యాపార సామ్రాజ్యాన్ని కూడా రాహుల్ గాంధీ ప్రస్తావించారు. 12 ఏళ్ల కిందట ప్రపంచ సంపన్నుల జాబితాలో 600వ స్థానంలో ఉన్న అదానీ.. ఇప్పుడు ఎక్కడికి చేరుకున్నారో గమనించాలని అన్నారు. నరేంద్ర మోదీ ప్రధానమంత్రి అయిన తర్వాత అదానీ సంపద, వ్యాపారాలు భారీగా పెరిగాయని ఆరోపించారు.

విమానాశ్రయాలు, ఓడరేవులు, మౌలిక సదుపాయాల రంగాల్లో అదానీ సంస్థలకు పెద్ద ఎత్తున కాంట్రాక్టులు లభించాయని విమర్శించారు. వివిధ రంగాల్లో అదానీ పెట్టుబడులు పెరగడం వెనుక కేంద్ర ప్రభుత్వ విధానాలు ఉన్నాయని ఆరోపించారు. ప్రభుత్వ నిర్ణయాల ద్వారా ప్రయోజనం పొందుతున్న పారిశ్రామికవేత్తలు ప్రజాస్వామ్య వ్యవస్థలను ప్రభావితం చేసే స్థాయికి చేరుకుంటున్నారని రాహుల్ గాంధీ వ్యాఖ్యానించారు.

హైదరాబాద్, బెంగళూరు అభివృద్ధి నమూనాపై ప్రస్తావన

ఈ సమావేశంలో హైదరాబాద్, బెంగళూరు నగరాల ఆర్థిక అభివృద్ధి గురించి కూడా రాహుల్ గాంధీ మాట్లాడారు. ఒకప్పుడు ప్రపంచ ఐటీ రంగంలో కీలక కేంద్రాలుగా ఎదిగిన ఈ నగరాలు.. దేశ ఆర్థిక వృద్ధికి ఎలా దోహదపడ్డాయో వివరించారు. అయితే 2008 ప్రపంచ ఆర్థిక సంక్షోభం తర్వాత ఆర్థిక అభివృద్ధి నమూనాలో వచ్చిన మార్పులను ఆయన ప్రస్తావించారు.

ఆ మార్పులు సమాజంపై, ఆర్థిక వ్యవస్థపై మాత్రమే కాకుండా ప్రజాస్వామ్య సంస్థల పనితీరుపైనా ప్రభావం చూపాయని వివరించారు. హైదరాబాద్, బెంగళూరు వంటి నగరాల అభివృద్ధి ప్రయాణాన్ని ఉదాహరణగా తీసుకొని దేశ ఆర్థిక విధానాలు, ప్రజాస్వామ్య వ్యవస్థల మధ్య ఉన్న సంబంధాన్ని వివరించే ప్రయత్నం చేశారు.