AP Weather Alert: ఏపీలో పలు జిల్లాలకు పిడుగుల ముప్పు.. భారీ వర్షాలు నేపథ్యంలో ఆరెంజ్ అలర్ట్ జారీ.. 60 కిమీ వేగంతో గాలులు వీస్తాయని ఐఎండీ హెచ్చరిక..

jagan 17 Sep 2026 1 నిమిషాల పఠనం ఆంధ్రప్రదేశ్

Cyclone Arnab: తెలంగాణకు భారీ వర్ష సూచన.. 3 జిల్లాలకు రెడ్ అలర్ట్, 5 జిల్లాలకు ఆరెంజ్ అలర్ట్

AP Weather Alert: ఆంధ్రప్రదేశ్‌లో వాతావరణం మరోసారి మారనుంది. రాష్ట్రంలోని పలు జిల్లాల్లో పిడుగులతో కూడిన వర్షాలు, ఈదురుగాలులు వీచే అవకాశం ఉందని ఏపీ విపత్తుల నిర్వహణ సంస్థ (APSDMA) హెచ్చరించింది. అల్లూరి సీతారామరాజు, పోలవరం, అనకాపల్లి, కాకినాడ, ఏలూరు, ఎన్టీఆర్, కృష్ణా జిల్లాలకు ఆరెంజ్ అలర్ట్ జారీ చేసినట్లు తెలిపింది. ఆయా ప్రాంతాల్లో అక్కడక్కడ మోస్తరు వర్షాలతో పాటు పిడుగులు పడే అవకాశం ఉందని అధికారులు సూచించారు. ప్రజలు అప్రమత్తంగా ఉండాలని హెచ్చరించారు.

శ్రీకాకుళం, విజయనగరం, విశాఖపట్నం, గుంటూరు, అన్నమయ్య, తిరుపతి జిల్లాల్లోనూ అక్కడక్కడ పిడుగులతో కూడిన తేలికపాటి వర్షాలు కురిసే అవకాశం ఉందని విపత్తుల నిర్వహణ సంస్థ పేర్కొంది. వర్షాల సమయంలో గంటకు 40 నుంచి 60 కిలోమీటర్ల వేగంతో ఈదురుగాలులు వీచే అవకాశం ఉన్నందున ప్రజలు తగిన జాగ్రత్తలు తీసుకోవాలని అధికారులు సూచించారు. ముఖ్యంగా పిడుగులు పడే సమయంలో బహిరంగ ప్రదేశాల్లో ఉండకుండా సురక్షిత ప్రాంతాల్లోకి వెళ్లాలని సూచించారు.

ఇదిలా ఉండగా.. ఆంధ్రప్రదేశ్ వాతావరణంపై మరో ముఖ్యమైన వ్యవస్థ ప్రభావం చూపే అవకాశం ఉంది. ఉత్తర థాయ్‌లాండ్ ప్రాంతంలో కొనసాగుతున్న ఉపరితల ఆవర్తనం సెప్టెంబర్ 18 నాటికి ఉత్తర అండమాన్ సముద్రంలోకి ప్రవేశించే అవకాశం ఉందని భారత వాతావరణ శాఖ (IMD) తెలిపింది. దీని ప్రభావంతో సెప్టెంబర్ 19 సాయంత్రం ఉత్తర అండమాన్ సముద్రం, పరిసర ప్రాంతాల్లో అల్పపీడనం ఏర్పడే అవకాశం ఉందని అంచనా వేసింది.

అల్పపీడనం ఏర్పడిన తర్వాత అది క్రమంగా బలపడి పశ్చిమ-వాయవ్య దిశగా కదులుతూ దక్షిణ ఒడిశా–ఉత్తర ఆంధ్రప్రదేశ్ తీరాల వైపు చేరే అవకాశం ఉందని IMD తెలిపింది. ఈ వ్యవస్థ ప్రభావంతో వచ్చే వారం కోస్తాంధ్ర, రాయలసీమలో వర్షాల తీవ్రత పెరిగే అవకాశం ఉంది. సెప్టెంబర్ 19, 20 తేదీల్లో ఆంధ్రప్రదేశ్‌లో అక్కడక్కడ భారీ వర్షాలు కురిసే అవకాశం ఉందని IMD అంచనా వేసింది.

గురువారం అల్లూరి సీతారామరాజు, పోలవరం, కృష్ణా, గుంటూరు, శ్రీసత్యసాయి, అన్నమయ్య, చిత్తూరు జిల్లాల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ తెలిపింది. వర్షాలతో పాటు ఉరుములు, మెరుపులు, బలమైన ఈదురుగాలులు కూడా వీచే అవకాశం ఉందని హెచ్చరించింది. కోస్తాంధ్రలో సెప్టెంబర్ 17, 18 తేదీల్లో ఉరుములు, మెరుపులతో కూడిన వాతావరణం కొనసాగి, సెప్టెంబర్ 19 నుంచి భారీ వర్షాల హెచ్చరిక అమల్లోకి వస్తుందని అమరావతి వాతావరణ కేంద్రం బులెటిన్‌లో పేర్కొంది.

మరోవైపు బుధవారం రాష్ట్రంలోని పలు ప్రాంతాల్లో మంచి వర్షం నమోదైంది. కాకినాడ జిల్లా రౌతులపూడిలో 68.6 మిల్లీమీటర్ల వర్షపాతం నమోదైంది. అనకాపల్లి జిల్లా మర్రిపాలెంలో 54 మిల్లీమీటర్లు, కాకినాడ జిల్లా డి.పోలవరంలో 48.5 మిల్లీమీటర్లు, కోనపాపపేటలో 46.8 మిల్లీమీటర్లు, విశాఖపట్నం జిల్లా అక్కిరెడ్డిపాలెంలో 45.5 మిల్లీమీటర్లు, అనకాపల్లిలో 44.5 మిల్లీమీటర్లు, పాయకరావుపేటలో 43.7 మిల్లీమీటర్ల వర్షం కురిసినట్లు నమోదైంది.

ఇదే సమయంలో రాష్ట్రంలోని కొన్ని ప్రాంతాల్లో పగటి ఉష్ణోగ్రతలు మాత్రం అధికంగానే కొనసాగుతున్నాయి. వర్షాలు, ఎండలు ఒకేసారి కనిపిస్తుండటంతో వాతావరణంలో మార్పులు స్పష్టంగా కనిపిస్తున్నాయి. రానున్న రోజుల్లో అల్పపీడనం ప్రభావం పెరిగే అవకాశం ఉన్న నేపథ్యంలో ముఖ్యంగా తీర ప్రాంత జిల్లాల ప్రజలు అధికారుల సూచనలు పాటించాలని విపత్తుల నిర్వహణ సంస్థ సూచించింది.

పిడుగులు పడే సమయంలో చెట్ల కింద, విద్యుత్ స్తంభాల సమీపంలో, బహిరంగ ప్రదేశాల్లో ఉండకూడదని అధికారులు సూచించారు. వాహనదారులు కూడా భారీ వర్షాలు, ఈదురుగాలుల సమయంలో అప్రమత్తంగా ప్రయాణించాలని కోరారు. మరోవైపు ప్రస్తుతం అల్పపీడనం ఏర్పడే అవకాశం మాత్రమే ఉందని, దానిని తుఫానుగా పేర్కొనడం ముందస్తు అంచనా అవుతుందని IMD స్పష్టం చేస్తోంది.