2026 Nepal Floods: ఈ ఘోర ప్రళయానికి మీరే కారణం.. భారత్, అమెరికా, చైనా నుంచి నష్టపరిహారం కోరిన నేపాల్..

jagan 02 Sep 2026 1 నిమిషాల పఠనం ప్రపంచం

Nepal Floods

2026 Nepal Floods: భారీ వర్షాలు, ఆకస్మిక వరదలతో కుదేలైన హిమాలయ దేశం నేపాల్.. ఇప్పుడు అంతర్జాతీయ సమాజం ముందు విప్లవాత్మకమైన వాతావరణ న్యాయ డిమాండ్‌ను ఉంచింది. భోటేకోషి నది పరివాహక ప్రాంతంలో సంభవించిన ఘోర జలప్రళయం తీవ్ర విధ్వంసాన్ని సృష్టించగా, ఈ విపత్తులో ఇప్పటికే 1,100 మందికి పైగా ప్రాణాలు కోల్పోయారు. గ్రామాలు, వంతెనలు, రహదారులు, జలవిద్యుత్ ప్రాజెక్టులు పూర్తిగా దెబ్బతిన్నాయి. వాతావరణ మార్పుల మూలంగానే తమకు ఈ తీవ్ర నష్టం వాటిల్లిందని స్పష్టం చేసిన నేపాల్ ప్రభుత్వం, ప్రపంచంలో అత్యధికంగా గ్రీన్‌హౌస్ వాయువులను విడుదల చేస్తున్న అమెరికా, చైనా, భారత్ వంటి దేశాల నుంచి వాతావరణ మార్పుల నష్టపరిహారం కోరాలని నిర్ణయించింది.

హిమాలయ ప్రాంతంలో పెరుగుతున్న ఉష్ణోగ్రతల వల్ల హిమనీనదాలు వేగంగా కరిగి, ఆకస్మిక జలప్రళయాలు ముంచెత్తుతున్నాయని నేపాల్ విదేశాంగ మంత్రి శిశిర్ ఖనాల్ ఆందోళన వ్యక్తం చేశారు. కార్బన్ ఉద్గారాలలో నేపాల్ వంటి చిన్న దేశాల పాత్ర అత్యల్పమైనప్పటికీ, దాని తీవ్ర దుష్ఫలితాలను మాత్రం తామే అనుభవిస్తున్నామని ఆయన ఆవేదన చెందారు. భారీ పారిశ్రామికీకరణ, అధిక ఉద్గారాలకు కారణమవుతున్న పెద్ద దేశాలే ఈ నష్టానికి పూర్తి బాధ్యత వహించాలని స్పష్టం చేశారు. తాము అడుగుతున్నది దానధర్మాలు కాదని, తమ ప్రజలకు జరిగిన నష్టానికి లభించాల్సిన ‘వాతావరణ న్యాయం’ (Climate Justice) అని ఉద్ఘాటించారు.

ధ్వంసమైన మౌలిక వసతులు, నివాసాల పునర్నిర్మాణానికి ప్రాథమికంగా 4 నుంచి 5 బిలియన్ డాలర్లు అవసరమవుతాయని నేపాల్ ప్రభుత్వం అంచనా వేసింది. మునుపటిలా కేవలం విపత్తు సహాయాన్ని కోరే విధానానికి స్వస్తి పలికి, రాబోయే ఐక్యరాజ్యసమితి సర్వసభ్య సమావేశంలోనూ, ఐరాస ఆధ్వర్యంలోని ‘గ్లోబల్ లాస్ అండ్ డ్యామేజ్ ఫండ్’ వేదికగానూ ‘లాస్ అండ్ డ్యామేజ్’ నిధులను డిమాండ్ చేసేందుకు నేపాల్ ప్రణాళికలు సిద్ధం చేస్తోంది. ఈ పరిణామంతో వాతావరణ మార్పుల బాధ్యత, అభివృద్ధి చెందుతున్న పేద దేశాలకు చెల్లించాల్సిన పరిహారంపై ప్రపంచ దేశాల మధ్య కొత్త చర్చ ప్రారంభమైంది.

2026 Nepal Floods: ఈ ఘోర ప్రళయానికి మీరే కారణం.. భారత్, అమెరికా, చైనా నుంచి నష్టపరిహారం కోరిన నేపాల్..

సంబంధిత వార్తలు