Python Spotted at KBR Park: కేబీఆర్ పార్క్‌లో 20 అడుగుల కొండచిలువ.. వాకింగ్‌కు వచ్చిన వారికి బిగ్ షాక్.. వీడియో ఇదిగో..

Python Spotted at KBR Park: హైదరాబాద్‌లోని బంజారాహిల్స్ నడిబొడ్డున ఉన్న కాసు బ్రహ్మానంద రెడ్డి (KBR) నేషనల్ పార్క్‌లో శనివారం ఉదయం ఒక అరుదైన, ఆశ్చర్యకరమైన ఘటన చోటుచేసుకుంది. ఉదయాన్నే నిత్య నడక కోసం పార్కుకు వచ్చిన వాకర్లకు సుమారు 20 అడుగుల పొడవున్న ఒక భారీ కొండచిలువ ప్రత్యక్షమై షాక్‌కు గురి చేసింది. పార్కులోని ఒక ప్రధాన వాకింగ్ ట్రాక్‌ను ఆ కొండచిలువ నెమ్మదిగా దాటుకుంటూ వెళ్తుండటాన్ని వాకర్లు గమనించారు. ఆ భారీ పాము ట్రాక్‌ను పూర్తిగా దాటడానికి కొన్ని నిమిషాల సమయం పట్టడంతో, అక్కడ ఉన్న సందర్శకులంతా ఆ దృశ్యాన్ని ఆసక్తిగా వీక్షించారు.

ఈ దృశ్యాన్ని అక్కడున్న వారు తమ మొబైల్ ఫోన్లలో వీడియోలు, ఫోటోలు తీశారు. నగరంలో కాంక్రీట్ జంగిల్ పెరిగిపోతున్నా, బంజారాహిల్స్ లాంటి అత్యంత రద్దీ ప్రాంతంలోని కేబీఆర్ నేషనల్ పార్క్‌లో వన్యప్రాణులకు ఇప్పటికీ సురక్షితమైన ఆవాసం లభిస్తోందనే విషయానికి ఈ ఘటనే తాజా నిదర్శనమని పర్యావరణ ప్రేమికులు చెప్తున్నారు.

ఈ భారీ కొండచిలువ ఎవరికీ ఎలాంటి హాని చేయకుండా నెమ్మదిగా పొదల్లోకి వెళ్లిపోవడంతో వాకర్లు ఊపిరి పీల్చుకున్నారు.