సోనియా గాంధీ ప్రధాని పదవిని ఎందుకు తిరస్కరించారు.. ఇందిరా గాంధీ నుంచి రాజీవ్ వరకు.. ఆరు దశాబ్దాల జ్ఞాపకాలు పాఠకుల ముందుకు..

Prajapaksham 18 Aug 2026 1 నిమిషాల పఠనం జాతీయం

Sonia Gandhi

కాంగ్రెస్‌ పార్టీ సీనియర్‌ నేత, మాజీ అధ్యక్షురాలు సోనియా గాంధీ తన జీవితంలోని కీలక ఘట్టాలను పుస్తక రూపంలో ప్రపంచం ముందుకు తీసుకురాబోతున్నారు. ఈ ఏడాది శరదృతువులో ఆమె ఆత్మకథ Belonging: A Journey of Love విడుదల కానుంది. ఆల్ఫ్రెడ్‌ ఎ. నాఫ్‌ ప్రకటించిన వివరాల ప్రకారం.. ఈ పుస్తకం నవంబర్‌ 10న పాఠకుల ముందుకు రానుంది.

దాదాపు ఆరు దశాబ్దాలుగా భారత్‌లో కొనసాగిన తన ప్రయాణాన్ని ఈ పుస్తకంలో సోనియా గాంధీ వివరించనున్నారు. ముఖ్యంగా నెహ్రూ-గాంధీ రాజకీయ కుటుంబంలోకి వివాహం ద్వారా అడుగుపెట్టిన తర్వాత ఎదురైన అనుభవాలు, కుటుంబ బంధాలు, రాజకీయ పరిణామాలు, వ్యక్తిగత విషాదాలు, తన రాజకీయ జీవితానికి సంబంధించిన అనేక అంశాలను ఆమె ఇందులో ప్రస్తావించనున్నారు.

ఇటలీలో జన్మించిన సోనియా గాంధీ.. ఇంగ్లాండ్‌లోని కేంబ్రిడ్జ్‌లో చదువుతున్న సమయంలో రాజీవ్ గాంధీని కలిశారు. ఆ పరిచయం క్రమంగా ప్రేమగా మారి వివాహానికి దారితీసింది. రాజీవ్ గాంధీ.. భారత తొలి ప్రధాని జవహర్‌లాల్ నెహ్రూ మనవడు, మాజీ ప్రధాని ఇందిరా గాంధీ కుమారుడు. అయితే భారత రాజకీయాల్లో అత్యంత ప్రభావవంతమైన కుటుంబంలోకి అడుగుపెట్టిన సోనియా జీవితంలో సంతోషంతో పాటు విషాదాలు కూడా చోటుచేసుకున్నాయి. 1984లో ఆమె అత్త ఇందిరా గాంధీ హత్యకు గురయ్యారు. అనంతరం రాజీవ్ గాంధీ ప్రధానమంత్రిగా బాధ్యతలు చేపట్టారు. కానీ కొన్ని సంవత్సరాలకే ఆయన కూడా హత్యకు గురయ్యారు.

ఈ వరుస విషాదాలు సోనియా గాంధీ జీవితాన్ని పూర్తిగా మార్చేశాయి. అప్పటివరకు వ్యక్తిగత జీవితానికే ఎక్కువ ప్రాధాన్యం ఇచ్చిన ఆమె.. చివరకు రాజకీయాల్లోకి ప్రవేశించారు. కాంగ్రెస్‌ పార్టీకి సుదీర్ఘకాలం అధ్యక్షురాలిగా కొనసాగారు. అయితే ఆమె రాజకీయ ప్రయాణంలో అత్యంత చర్చనీయాంశమైన నిర్ణయాల్లో ఒకటి ప్రధానమంత్రి పదవిని స్వీకరించకపోవడం. కాంగ్రెస్‌ నేతృత్వంలోని కూటమికి అవకాశం వచ్చిన సమయంలో ఆమె ప్రధానమంత్రి పదవిని తిరస్కరించారు. ఆ నిర్ణయం అప్పట్లో దేశవ్యాప్తంగా రాజకీయ చర్చకు దారితీసింది.

తన ఆత్మకథలో ఈ అనుభవాలను కేవలం రాజకీయ కోణంలో కాకుండా.. వ్యక్తిగత భావోద్వేగాలతోనూ వివరించినట్లు సోనియా గాంధీ వెల్లడించారు. తన కుటుంబం గురించి ఎన్నో కథనాలు వచ్చినప్పటికీ, వారి ఆలోచనలు, నిర్ణయాల వెనుక ఉన్న మానవీయ కోణం, బలహీనతలను పూర్తిగా అర్థం చేసుకునే అవకాశం చాలా తక్కువగా లభించిందని ఆమె పేర్కొన్నారు.

తన జీవితాన్ని రాయడం అంత సులభం కాలేదని కూడా సోనియా గాంధీ తెలిపారు. చిన్ననాటి ఇటలీ జీవితం నుంచి రాజీవ్ గాంధీ భార్యగా, ఇందిరా గాంధీ కోడలిగా భారత్‌లో గడిపిన సంవత్సరాల వరకు తన అనుభవాలను వెనక్కి తిరిగి చూసుకున్నానని చెప్పారు. ప్రస్తుతం నెహ్రూ-గాంధీ కుటుంబానికి చెందిన రాహుల్ గాంధీ, ప్రియాంక గాంధీ వాద్రా కూడా కాంగ్రెస్‌ రాజకీయాల్లో కీలకంగా ఉన్నారు. ఈ నేపథ్యంలో సోనియా గాంధీ ఆత్మకథలో కుటుంబం, రాజకీయాలు, ప్రేమ, నష్టం, విధేయత వంటి అంశాలపై ఆమె స్వయంగా చెప్పబోయే విషయాలపై రాజకీయ వర్గాల్లో ఆసక్తి నెలకొంది.

దశాబ్దాలుగా భారత రాజకీయాలను ప్రభావితం చేసిన కుటుంబం గురించి.. ఆ కుటుంబంలో జీవించిన వ్యక్తి స్వయంగా చెప్పబోయే కథగా Belongingపై ఇప్పుడు అందరి దృష్టి నెలకొంది.