Jantar Mantar Protest Ban: జంతర్ మంతర్ తొలగింపుపై సీజేపీ తీవ్ర ఆగ్రహం.. నరేంద్ర మోదీ ఎందుకు భయపడుతున్నారంటూ సూటి ప్రశ్న..
CJP Responds PM Modi Message
Jantar Mantar Protest Ban: ఢిల్లీలోని చారిత్రాత్మక జంతర్ మంతర్ వద్ద ధర్నాలు, ఆందోళనలు నిర్వహించడానికి వీల్లేకుండా కేంద్ర హోం మంత్రిత్వ శాఖ ఆ ప్రదేశాన్ని నిరసన వేదికల జాబితా నుంచి తొలగించడంపై కాక్రోచ్ జనతా పార్టీ (సీజేపీ) తీవ్రంగా మండిపడింది. కేంద్ర ప్రభుత్వ ఏకపక్ష నిర్ణయం ఆమోదయోగ్యం కాదని, దీనిని తాము ఏమాత్రం అంగీకరించబోమని సీజేపీ స్పష్టం చేసింది.
ఈ నిర్ణయంపై సీజేపీ సహ కన్వీనర్ సౌరవ్ దాస్ సామాజిక మాధ్యమం ‘ఎక్స్’ (X) వేదికగా తీవ్ర నిరసన వ్యక్తం చేశారు. “ఆమోదయోగ్యం కాదు.. జంతర్ మంతర్‌ను చూసి నరేంద్ర మోదీ ఎందుకు భయపడుతున్నారు?” అంటూ ఆయన సూటిగా ప్రశ్నించారు. జంతర్ మంతర్ అనేది కేవలం ఒక ప్రాంతం కాదని, అది భారత ప్రజలకు చెందిన వేదిక అని పేర్కొన్నారు. ఇలాంటి కీలక నిర్ణయం తీసుకునే ముందు కేంద్ర హోం మంత్రిత్వ శాఖ కనీసం ప్రజలను సంప్రదించిందా? సంబంధిత వర్గాలు, ప్రజా సంఘాల అభిప్రాయాలను పరిగణనలోకి తీసుకున్నారా? అని ఆయన నిలదీశారు.
ప్రభుత్వ తీరుపై విమర్శలు గుప్పిస్తూ.. ప్రజలకు చెందిన జంతర్ మంతర్‌ను నిరసనల వేదిక జాబితా నుంచి తొలగిస్తున్న తీరు చూస్తుంటే.. త్వరలో ప్రధానమంత్రి భారతదేశాన్ని ఒక ప్రజాస్వామ్య దేశంగా లేకుండా చేసే ప్రమాదం ఉందని సౌరవ్ దాస్ ఆందోళన వ్యక్తం చేశారు. ప్రస్తుత చర్య ఆ నియంతృత్వ ధోరణిలో భాగంగా వేసిన అడుగేనని ఆయన తీవ్రంగా అభివర్ణించారు.
శాంతియుతంగా సమావేశమయ్యే హక్కుపై, నిరసన తెలిపే ప్రాథమిక హక్కుపై ఇది ప్రత్యక్ష దాడి అని సీజేపీ ఆరోపించింది. ప్రభుత్వ నిర్బంధాలు ఎంతగా పెరిగినా, ప్రస్తుతం దేశమంతా జంతర్ మంతర్‌గా మారుతోందని, ప్రజల గొంతును ఎవరూ అణచివేయలేరని సీజేపీ కన్వీనర్ దీప్కే కూడా అభిప్రాయపడ్డారు.
ఢిల్లీ పోలీస్ కమిషనర్ అనురాగ్ కుమార్ అక్టోబర్ 11న జారీ చేసిన ఉత్తర్వుల ప్రకారం.. అధికారిక నిరసనలు, ఆందోళనల కోసం రామ్‌లీలా మైదాన్, బురారీ మైదాన్, తూర్పు ఢిల్లీలోని సీబీడీ మైదాన్‌లను మాత్రమే కొత్త వేదికలుగా గుర్తించిన విషయం తెలిసిందే. అయితే జంతర్ మంతర్ వద్ద ఆందోళనలు నిర్వహించడానికి వివిధ వర్గాల నుంచి పిలుపులు రావడంతో దేశ రాజధానిలో భద్రతా ఏర్పాట్లను పోలీసులు మరింత కట్టుదిట్టం చేశారు. ఈ పరిణామాల నేపథ్యంలో సీజేపీ లేవనెత్తిన అభ్యంతరాలు, దేశవ్యాప్తంగా వ్యక్తమవుతున్న నిరసనల పట్ల ప్రభుత్వం ఎలా స్పందిస్తుందనేది ఇప్పుడు సర్వత్రా తీవ్ర చర్చనీయాంశంగా మారింది.
సంబంధిత వార్తలు
