Saudi Airport Attacks: సౌదీ అరేబియా విమానాశ్రయాలపై హౌతీల మిస్సైల్, డ్రోన్ దాడులు.. ముగ్గురు మృతి, పలువురికి తీవ్ర గాయాలు

Saudi Airport Attacks: యెమెన్‌లోని హౌతీ తిరుగుబాటుదారులు సౌదీ అరేబియాలోని ప్రధాన విమానాశ్రయాలే లక్ష్యంగా బాలిస్టిక్ మిస్సైళ్లు, పేలుడు పదార్థాలతో కూడిన డ్రోన్లతో విరుచుకుపడ్డారు. ఈ భయానక దాడుల్లో ముగ్గురు వ్యక్తులు ప్రాణాలు కోల్పోగా, మరో 36 మంది తీవ్రంగా గాయపడినట్లు సౌదీ పౌర విమానయాన శాఖ ధృవీకరించింది. పశ్చిమాసియాలో ఇరాన్-అమెరికా మధ్య ఉద్రిక్తతలు కొనసాగుతున్న తరుణంలో, యెమెన్‌లో సౌదీ కూటమి , ఇరాన్ మద్దతు గల హౌతీల మధ్య యుద్ధం తీవ్రరూపం దాల్చడం అంతర్జాతీయంగా ఆందోళన కలిగిస్తోంది.

సౌదీ రాజధాని రియాద్‌లోని కింగ్ ఖలీద్ అంతర్జాతీయ విమానాశ్రయంతో పాటు అభా అంతర్జాతీయ విమానాశ్రయాలపై హౌతీలు ఈ దాడులకు తెగబడ్డారని అధికారులు వెల్లడించారు. రియాద్ ఎయిర్‌పోర్టుపై జరిగిన దాడిలో ఒక విదేశీ పౌరుడు మరణించగా ఎనిమిది మంది గాయపడ్డారని, అలాగే అభా ఎయిర్‌పోర్టు ప్రాంగణంలో జరిగిన మరో దాడిలో ఇద్దరు మృతి చెందగా 28 మంది తీవ్రంగా గాయపడ్డారని తెలిపారు. ఈ దాడుల వెనుక తమ ప్రమేయం ఉందని, సౌదీ వైమానిక స్థావరాలను లక్ష్యంగా చేసుకుని బాలిస్టిక్ క్షిపణులు, డ్రోన్లను ప్రయోగించినట్లు హౌతీ దళాల ప్రతినిధి అధికారికంగా ప్రకటించారు.

మరోవైపు యెమెన్‌లోని తాత్కాలిక రాజధాని అడెన్ అంతర్జాతీయ విమానాశ్రయం రన్‌వే సమీపంలో కూడా హౌతీలు క్షిపణి దాడికి పాల్పడ్డారు. కైరో నుండి వస్తున్న యెమెనియా ఎయిర్‌వేస్ విమానం ల్యాండ్ కావడానికి సరిగ్గా కొద్ది నిమిషాల ముందు ఈ దాడి జరగడంతో, ఆ విమానాన్ని తక్షణమే జెద్దా వైపు మళ్లించి ప్రయాణికులను సురక్షితంగా రక్షించారు. అంతర్జాతీయ నౌకా రవాణాకు అత్యంత కీలకమైన బాబ్ ఎల్-మందేవ్ జలసంధి ప్రాంతంలో కూడా దాడులు జరగడంతో ఎర్రసముద్రంలో వ్యాపార నౌకల రాకపోకలకు తీవ్ర విఘాతం ఏర్పడే ప్రమాదం కనిపిస్తోంది.

హౌతీల దాడులకు ప్రతిస్పందనగా సౌదీ నేతృత్వంలోని కూటమి సైన్యం యెమెన్‌లోని హౌతీ స్థావరాలపై ఎదురుదాడులను ఉధృతం చేసింది. ఈ దాడులకు పాల్పడిన హౌతీ మూకలను విడిచిపెట్టేది లేదని, వారికి తగిన రీతిలో బుద్ధి చెబుతామని సౌదీ అరేబియా స్పష్టం చేసింది. ఈ పరిణామాల నేపథ్యంలో పశ్చిమాసియాలో భద్రతా పరిస్థితులు మరింత దిగజారే అవకాశం ఉందనే ఆందోళనలు వ్యక్తమవుతున్నాయి.