హార్ముజ్ జలసంధిపై ముంచుకొస్తున్న ముప్పు .. చర్చలపై ఇరాన్ కీలక ప్రకటన..

Prajapaksham 12 Aug 2026 1 నిమిషాల పఠనం ప్రపంచం

Iran vs America

ప్రపంచ భౌగోళిక రాజకీయాల్లో ఇరాన్ – అమెరికాల మధ్య ఉద్రిక్తతలు మరోసారి తీవ్రరూపం దాల్చాయి. ఇరు దేశాల నడుమ శాంతిని నెలకొల్పేందుకు జరుగుతున్న దౌత్యపరమైన చర్చల్లో ఏమాత్రం పురోగతి లేదని.. సమీప భవిష్యత్తులో నూతన ఒప్పందం లేదా రాజీ కుదిరే సంకేతాలు కనిపించడం లేదని ఇరాన్ ప్రభుత్వం అధికారికంగా ప్రకటించింది.

అమెరికాతో జరుగుతున్న దైపాక్షిక చర్చలు ఫలవంతం కాకపోవడమే కాకుండా, మునుపటి పరిస్థితిలోనే ప్రతిష్టంభన కొనసాగుతోందని టెహ్రాన్ వర్గాలు స్పష్టం చేశాయి. అంతేకాకుండా, ప్రస్తుతమున్నట్టుగా భావిస్తున్న కాల్పుల విరమణను పొడిగించే ఆలోచనను ఇరాన్ పూర్తిగా తోసిపుచ్చింది. అసలు కాల్పుల విరమణకు సంబంధించి ముందస్తుగా ఎటువంటి అధికారిక తేదీ లేదా ప్రకటన లేదు. ప్రారంభమే లేనప్పుడు పొడిగింపు ప్రసక్తే తలెత్తదని ఒక సీనియర్ ఇరాన్ అధికారి కుండబద్దలు కొట్టారు.

అమెరికాతో ఒప్పందాలపై తమకు ఏమాత్రం నమ్మకం లేదని ఇరాన్ విదేశాంగ వర్గాలు బాహాటంగానే వెల్లడించాయి. గతంలో ఒక మధ్యంతర ఒప్పందంపై సంతకం చేసిన కేవలం 48 గంటల వ్యవధిలోనే అమెరికా దానిని ఉల్లంఘించి.. ఆ తర్వాత పూర్తిగా వైదొలిగిందని ఆరోపించాయి. ఈ చేదు అనుభవాల దృష్ట్యా, అమెరికా తన బాధ్యతలను నెరవేర్చడానికి పటిష్టమైన గడువు విధిస్తేనే నూతన అవగాహన ఒప్పందానికి అంగీకరిస్తామని, గడువు లేని హామీలను అంగీకరించేది లేదని స్పష్టం చేశాయి.

ఇరు దేశాల మధ్య దౌత్యపరమైన సంక్షోభం కారణంగా ప్రపంచంలోనే అత్యంత కీలకమైన సముద్ర మార్గం హార్ముజ్ జలసంధి పరిసర ప్రాంతాల్లో ఉద్రిక్తతలు అమాంతం పెరిగాయి. ప్రపంచవ్యాప్తంగా సరఫరా అయ్యే ముడి చమురు, సహజ వాయువు రవాణాలో ఈ జలసంధి అత్యంత కీలకమైనది.

ఒకవేళ ఇక్కడ నౌకా రవాణాకు అంతరాయం ఏర్పడితే, అంతర్జాతీయంగా ముడి చమురు ధరలు ఆకాశాన్ని తాకడం ఖాయమని, ఇది ప్రపంచవ్యాప్తంగా తీవ్ర ద్రవ్యోల్బణానికి, ఆర్థిక మాంద్యానికి దారితీస్తుందని ఆర్థిక విశ్లేషకులు తీవ్ర ఆందోళన వ్యక్తం చేస్తున్నారు. ప్రస్తుతం ప్రపంచ దేశాలన్నీ ఈ పరిణామాలను నిశితంగా గమనిస్తున్నాయి.