Gujarat Power Crisis: మోదీ ఇలాకాలో తీవ్ర విద్యుత్ సంక్షోభం.. చీకట్లలో నివాస ప్రాంతాలు, పరిశ్రమలకు 8 గంటల కోతలు..
Telangana Tops India in Electricity Consumption Growth Rate
Gujarat Power Crisis: భారత ప్రధాని నరేంద్ర మోదీ స్వరాష్ట్రమైన గుజరాత్‌ను తీవ్ర విద్యుత్ సంక్షోభం అల్లాడిస్తోంది. రాష్ట్రవ్యాప్తంగా పెరుగుతున్న విద్యుత్ డిమాండ్‌కు తగినంత సరఫరా లేకపోవడంతో తీవ్రమైన కరెంటు కోతలతో ప్రజలు, పారిశ్రామికవేత్తలు అవస్థలు పడుతున్నారు. తీవ్ర బొగ్గు కొరత, విండ్ పవర్ నుంచి రావాల్సిన పవన విద్యుత్ ఉత్పత్తి అకస్మాత్తుగా పడిపోవడం, జలవిద్యుత్ ప్రాజెక్టులలో నీటి నిల్వలు ప్రమాదకరంగా తగ్గిపోవడం వంటి పరిణామాలు విద్యుత్ రంగాన్ని పక్షవాతానికి గురిచేశాయి. ఈ పరిస్థితిని అదుపులోకి తెచ్చేందుకు రాష్ట్ర ప్రభుత్వం పారిశ్రామిక ప్రాంతాల్లో వారానికి ఒకరోజు నిర్దేశిత వంతులవారీ సెలవు దినాల్లో సాయంత్రం 4 గంటల నుంచి అర్ధరాత్రి 12 గంటల వరకు ఏకంగా 8 గంటల పాటు విద్యుత్ కోతలు విధించాలని నిర్ణయించింది.
ఈ నిర్ణయంతో దక్షిణ గుజరాత్‌లోని సూరత్, నవ్‌సారి వంటి పారిశ్రామిక కారిడార్లు తీవ్రంగా ప్రభావితమవుతున్నాయి. నవ్‌సారి జీఐడీసీలోని 250కి పైగా చిన్న, పెద్ద తయారీ యూనిట్లు ఈ కోతల దెబ్బకు స్తంభించిపోయాయి. ప్రస్తుతం దీపావళి పండుగ సీజన్ సమీపిస్తుండటంతో వస్త్ర, వజ్రాల , విడిభాగాల తయారీ రంగాలు ఆర్డర్లను సరైన సమయానికి పూర్తి చేయాల్సిన ఒత్తిడిలో ఉన్నాయి. సరిగ్గా ఈ సమయంలో సాయంత్రం వేళల్లో కరెంటు నిలిచిపోవడంతో సరుకుల ఉత్పత్తి, ప్యాకింగ్, రవాణా , పంపిణీ వ్యవస్థలు గందరగోళంలో పడ్డాయి. గత 26 ఏళ్లలో ఈ స్థాయిలో విస్తృత కోతలు విధించడం ఇదే తొలిసారి అని సదరన్ గుజరాత్ ఛాంబర్ ఆఫ్ కామర్స్ అండ్ ఇండస్ట్రీ (SGCCI) అధ్యక్షుడు అశోక్ జిరావాలా ఆవేదన వ్యక్తం చేశారు. ఈ సంక్షోభం వల్ల వేల కోట్ల రూపాయల వ్యాపార నష్టం వాటిల్లడమే కాకుండా, దాదాపు 25 లక్షల మంది కార్మికుల ఉపాధి ప్రమాదంలో పడుతుందని హెచ్చరించారు.
పారిశ్రామిక రంగానికే కాకుండా గ్రామీణ ప్రాంతాలకు కూడా ఈ విద్యుత్ సెగ తాకింది. గ్రామాలకు 24 గంటల ఉచిత తాగునీరు, గృహ విద్యుత్ అందించే ప్రతిష్ఠాత్మక ‘జ్యోతిగ్రామ్’ పథకం పరిధిలోకి వచ్చే ప్రాంతాల్లోనూ ప్రస్తుతం విద్యుత్ కోతలు మొదలయ్యాయి. వేసవిలో పంటలకు సాగునీరు అందించేందుకు మోటార్లు పనిచేయక రైతులు తీవ్ర తీవ్ర ఇబ్బందులు ఎదుర్కొంటున్నారు. అధికారులు కొన్ని ప్రాంతాల్లో విద్యుత్ లోడ్‌ను తగ్గించేందుకు త్రీ ఫేజ్ సరఫరా నుంచి సింగిల్ ఫేజ్ సరఫరాకు మారుస్తున్నారు. ఈ పరిణామాలు రానున్న తీవ్ర వేసవిలో మరింత దిగజారి, నివాస ప్రాంతాలకూ విస్తరించే ప్రమాదం ఉందని ఆందోళనలు వ్యక్తమవుతున్నాయి.
గుజరాత్‌లో తలెత్తిన ఈ సంక్షోభంపై ప్రతిపక్షాలు తీవ్రస్థాయిలో ధ్వజమెత్తుతున్నాయి. “ఇదేనా మీరు చెప్పే గుజరాత్ మోడల్?” అంటూ బీజేపీ ప్రభుత్వంపై తీవ్ర విమర్శలు గుప్పిస్తున్నాయి. సాయంత్రం వేళల్లో నిరంతర విద్యుత్ కోతలను నిరసిస్తూ ఆమ్ ఆద్మీ పార్టీ (ఆప్) విసావదర్ ఎమ్మెల్యే గోపాల్ ఇటాలియా తన మద్దతుదారులతో కలిసి చిన్న లాంతర్లు పట్టుకుని సబ్‌స్టేషన్ , విద్యుత్ బోర్డు కార్యాలయాల వద్ద వినూత్నంగా నిరసన తెలిపారు. పండుగ వేళ తలెత్తిన ఈ విద్యుత్ గండం నుంచి పరిశ్రమలను, సామాన్య ప్రజలను గట్టెక్కించేందుకు ప్రభుత్వం ఎలాంటి అత్యవసర చర్యలు తీసుకుంటుందో వేచి చూడాల్సి ఉంది.
సంబంధిత వార్తలు
