Air Pollution Alert: దేశంలో పెరుగుతున్న వాయు కాలుష్యం.. ప్రపంచంలోని 20 అత్యంత కాలుష్య నగరాల్లో 13 భారత్‌లోనే..

Air Pollution Alert: ప్రపంచంలోనే అత్యంత కాలుష్య నగరాల గ్లోబల్ ర్యాంకింగ్‌లో మళ్లీ భారతీయ నగరాలు ఆధిపత్యం ప్రదర్శించాయి. అంతర్జాతీయ వాయు నాణ్యతా నివేదికల ఆధారంగా విడుదలైన టాప్ 20 కాలుష్య నగరాల జాబితాలో ఏకంగా 13 భారతీయ నగరాలు చోటు దక్కించుకోవడం దేశంలో కాలుష్య తీవ్రత ఏ స్థాయిలో ఉందో స్పష్టం చేస్తోంది. సోమవారం మధ్యాహ్నం సేకరించిన గాలి నాణ్యత సూచీ (AQI) గణాంకాల ప్రకారం, అత్యధిక కాలుష్యంతో ఇండోనేషియాకు చెందిన పలాంగ్‌కరాయా నగరం ప్రపంచంలోనే మొదటి స్థానంలో నిలవగా, భారతీయ పట్టణాలు తర్వాతి స్థానాల్లో నిలిచాయి.

ఈ తాజా నివేదికలోని అత్యంత ఆసక్తికరమైన అంశం ఏమిటంటే, నిరంతరం తీవ్రమైన వాయు కాలుష్యంతో వార్తల్లో నిలిచే దేశ రాజధాని ఢిల్లీ ఈసారి గ్లోబల్ టాప్ 20 జాబితాలో చోటు దక్కించుకోకపోవడం గమనార్హం. అయితే, ఢిల్లీకి సమీపంలో ఉన్న ఉత్తర ప్రదేశ్‌లోని బులంద్ షహర్ నగరం 198 ఏక్యూఐ విలువతో ప్రపంచంలోనే మూడవ అత్యంత కాలుష్య నగరంగా నమోదైంది. ఈ స్థాయి కాలుష్యాన్ని పర్యావరణ నిపుణులు ‘అనారోగ్యకరమైనది’గా వర్గీకరించారు. ఆ తర్వాత త్రిపుర రాజధాని అగర్తల 181 ఏక్యూఐ విలువతో ప్రపంచంలో నాల్గవ స్థానంలో నిలిచింది.

టాప్ 20 కాలుష్య నగరాల పట్టికలో మిగిలిన భారతీయ నగరాలు కూడా ప్రమాదకర గణాంకాలను నమోదు చేశాయి. రాజస్థాన్‌కు చెందిన పాలి, ఉత్తర్ ప్రదేశ్‌లోని ముజఫర్‌నగర్ నగరాల్లో గాలి నాణ్యత సూచీ సమానంగా 174గా నమోదైంది. అలాగే మధ్యప్రదేశ్‌లోని బుర్హన్‌పూర్‌లో 174, హర్యానాలోని రోహ్‌తక్‌లో 172, రాజస్థాన్‌లోని కోటాలో 170 ఏక్యూఐ పాయింట్లు నమోదయ్యాయి. ఇక దేశ ఆర్థిక రాజధాని ముంబై 167 ఏక్యూఐ నమోదు చేయగా, ఆ తర్వాత వరుసగా హాపుర్ (166), హిస్సార్ (165), బికనేర్ (165), బరేలీ (164) నగరాలు అత్యంత కాలుష్య పూరిత పట్టణాలుగా నిలిచాయి.

మెట్రో నగరాల కంటే కూడా ద్వితీయ, తృతీయ శ్రేణి పట్టణాల్లో వాయు కాలుష్యం వేగంగా పెరుగుతుండటం ఆందోళన కలిగిస్తోంది. పారిశ్రామిక ఉద్గారాలు, వాహనాల వినియోగం పెరగడం, నిర్మాణ రంగ కార్యకలాపాలు విస్తరించడమే చిన్న నగరాల్లో కూడా గాలి నాణ్యత క్షీణించడానికి ప్రధాన కారణాలని విశ్లేషకులు చెబుతున్నారు. పర్యావరణ పరిరక్షణకు, గాలి నాణ్యతను మెరుగుపరచడానికి ప్రభుత్వాలు తక్షణమే కఠిన చర్యలు తీసుకోకపోతే, ఈ నగరాల్లో ప్రజా ఆరోగ్యం మరింత ప్రమాదంలో పడే అవకాశం ఉందనే హెచ్చరికలు వ్యక్తమవుతున్నాయి.