Jantar Mantar Protest: అభిజీత్‌ దీప్కే అరెస్ట్‌తో ఉద్యమ బాధ్యతలు అజింక్య షిండేకే.. అతని నేపథ్యం ఇదే!
Jantar Mantar Protest: సీజేపీ నేత అభిజీత్‌ దీప్కేకు సంబంధించిన వీడియో వైరల్‌గా మారింది. తన తర్వాత ఉద్యమాన్ని అజింక్య షిండే నడిపిస్తారని పేర్కొన్నారు. ఢిల్లీ విమానాశ్రయంలో ముగ్గురు నేతలను పోలీసులు అదుపులోకి తీసుకున్నట్లు సమాచారం.
కాక్రోచ్‌ జనతా పార్టీ (సీజేపీ) నేత అభిజీత్‌ దీప్కేను ఢిల్లీ పోలీసులు అదుపులోకి తీసుకున్న నేపథ్యంలో సోషల్‌ మీడియాలో ఆయనకు సంబంధించిన ఓ వీడియో వైరల్‌గా మారింది. తనను, ఆశుతోష్‌ రాంకా, సౌరవ్‌ దాస్‌లను అరెస్టు చేస్తే ఉద్యమాన్ని ముందుకు నడిపించే బాధ్యతలను అజింక్య షిండేకు అప్పగిస్తున్నట్లు ఆ వీడియోలో అభిజీత్‌ పేర్కొన్నారు. ఈ ఉద్యమానికి మద్దతుగా నిలుస్తున్న వారంతా అజింక్య షిండేను అనుసరించాలని కోరారు.
వైరల్‌ అవుతున్న వీడియోలో అభిజీత్‌ దీప్కే మాట్లాడుతూ.. “అందరికీ నమస్కారం. మీరు ఈ వీడియో చూస్తున్నారంటే నన్ను, ఆశుతోష్‌ రాంకా, సౌరవ్‌ దాస్‌లను పోలీసులు అరెస్టు చేసినట్లు అర్థం. మా తర్వాత ఈ ఉద్యమాన్ని అజింక్య షిండే ముందుండి నడిపిస్తారు. ఈ వీడియో చూస్తున్నవారంతా దయచేసి అజింక్యను ఫాలో అవ్వండి. మా ముగ్గురి తర్వాత ఈ ఉద్యమాన్ని ఆయన ముందుకు తీసుకెళ్తారు” అని పేర్కొన్నారు.
ఎవరీ అజింక్య షిండే?
మహారాష్ట్రలోని అలీబాగ్‌కు చెందిన అజింక్య షిండే ప్రస్తుతం కాక్రోచ్‌ జనతా పార్టీ (సీజేపీ) జాతీయ సంస్థాగత వ్యవహారాల బాధ్యతలు నిర్వహిస్తున్నట్లు కథనాలు పేర్కొంటున్నాయి. ఆయనకు అభిజీత్‌ దీప్కేతో చాలా సంవత్సరాలుగా పరిచయం ఉంది. రాజకీయాల్లోనూ ఆయనకు గత అనుభవం ఉంది. గతంలో ఆమ్‌ ఆద్మీ పార్టీ (ఆప్‌) మహారాష్ట్ర విభాగంలో సోషల్‌ మీడియా బాధ్యతలు నిర్వహించినట్లు సమాచారం.
ఉద్యోగం వదిలి రాజకీయాల్లోకి..
అభిజీత్‌ దీప్కే, అజింక్య షిండేల మధ్య పరిచయం సుమారు పదేళ్ల క్రితం ఏర్పడినట్లు కథనం పేర్కొంది. అప్పట్లో మంచి ఉద్యోగంలో ఉన్న అజింక్య.. ఉద్యోగానికి రాజీనామా చేసి ఆమ్‌ ఆద్మీ పార్టీతో పూర్తిస్థాయిలో పనిచేయాలని నిర్ణయించుకున్నట్లు తెలిపింది. గోవాలో పనిచేసిన తర్వాత ఆప్‌ మహారాష్ట్ర విభాగంలో చేరినట్లు వివరించింది.
ప్రస్తుతం సీజేపీ కార్యకలాపాల్లో కీలక బాధ్యతలు నిర్వహిస్తున్న అజింక్య షిండేకు ఉద్యమాన్ని ముందుకు నడిపించే బాధ్యతలను అప్పగిస్తున్నట్లు అభిజీత్‌ వీడియోలో పేర్కొనడం ప్రాధాన్యం సంతరించుకుంది.
ఢిల్లీ విమానాశ్రయంలో అదుపులోకి తీసుకున్న పోలీసులు
అభిజీత్‌ దీప్కే, ఆశుతోష్‌ రాంకా, సౌరవ్‌ దాస్‌ శనివారం ఉదయం ముంబై నుంచి ఢిల్లీకి బయలుదేరినట్లు కథనం పేర్కొంది. వారి విమానం ఢిల్లీ విమానాశ్రయంలో దిగిన వెంటనే ఢిల్లీ పోలీసుల బృందం విమానంలోకి ప్రవేశించి ముగ్గురినీ అదుపులోకి తీసుకున్నట్లు తెలిపింది.
అనంతరం పోలీసులు వారిని వాహనంలో తీసుకెళ్లినట్లు సమాచారం. ప్రస్తుతం ముగ్గురినీ వేర్వేరు గదుల్లో ఉంచినట్లు కథనాలు పేర్కొంటున్నాయి. అయితే, వారిని అధికారికంగా అరెస్టు చేశారా? ఏ కేసులో అదుపులోకి తీసుకున్నారు? ప్రస్తుతం ఎక్కడ ఉంచారు? అనే అంశాలపై పోలీసుల అధికారిక ప్రకటనతో స్పష్టత రావాల్సి ఉంది.
జంతర్‌ మంతర్‌ వద్ద సీజేపీ నిరసనల నేపథ్యంలో ఈ పరిణామాలు చోటుచేసుకోవడంతో ఉద్యమ తదుపరి కార్యాచరణపై ఆసక్తి నెలకొంది.
సంబంధిత వార్తలు
