High Alert at Borders: స్వాతంత్ర్య దినోత్సవ వేళ ఉగ్ర ముప్పు.. సరిహద్దుల్లో హై అలర్ట్

Prajapaksham 11 Aug 2026 1 నిమిషాల పఠనం జాతీయం

Indian Army

High Alert at Borders: దేశవ్యాప్తంగా స్వాతంత్ర్య దినోత్సవ వేడుకలకు ఏర్పాట్లు ముమ్మరంగా సాగుతున్న సమయంలో భద్రతా సంస్థలు కీలక హెచ్చరికలు జారీ చేశాయి. ఆగస్టు 15కు ముందు లేదా ఆ సమయంలో దేశంలో ఉగ్రవాద దాడులకు కుట్ర జరిగే అవకాశం ఉందని నిఘా వర్గాలు కేంద్ర ప్రభుత్వాన్ని అప్రమత్తం చేసినట్లు సమాచారం. పాకిస్థాన్‌కు చెందిన గూఢచారి సంస్థ ఐఎస్ఐ ప్రోత్సాహంతో ఉగ్రవాదులు భారత సరిహద్దుల గుండా చొరబడేందుకు, అవకాశం లభిస్తే దేశంలోని కీలక ప్రాంతాలను లక్ష్యంగా చేసుకునేందుకు ప్రయత్నించవచ్చని నిఘా సంస్థలు హెచ్చరించినట్లు తెలుస్తోంది.

నిఘా సమాచారం అందిన వెంటనే కేంద్ర ప్రభుత్వం భద్రతా యంత్రాంగాన్ని అప్రమత్తం చేసింది. ముఖ్యంగా పాకిస్థాన్, బంగ్లాదేశ్‌తో ఉన్న అంతర్జాతీయ సరిహద్దుల్లో నిఘాను మరింత పెంచారు. సరిహద్దు ప్రాంతాల్లో అనుమానాస్పద కదలికలపై ప్రత్యేకంగా దృష్టి సారించాలని భద్రతా బలగాలకు ఆదేశాలు జారీ చేసినట్లు సమాచారం.

స్వాతంత్ర్య దినోత్సవం సందర్భంగా దేశ రాజధాని ఢిల్లీ, జమ్మూ కాశ్మీర్ వంటి అత్యంత సున్నిత ప్రాంతాల్లో భద్రతా ఏర్పాట్లు భారీగా ఉంటాయని నిఘా వర్గాలు అంచనా వేస్తున్నాయి. ఈ పరిస్థితిని తమకు అనుకూలంగా మార్చుకునేందుకు ఉగ్రవాద సంస్థలు ఇతర ప్రాంతాల్లో దాడులకు ప్రయత్నించే అవకాశం ఉందనే కోణంలోనూ భద్రతా సంస్థలు అప్రమత్తంగా ఉన్నాయి.

ఉగ్రవాదులను భారత భూభాగంలోకి చొరబెట్టేందుకు జమ్మూ కాశ్మీర్ మార్గంతో పాటు బంగ్లాదేశ్ సరిహద్దును ఉపయోగించుకునే ప్రయత్నాలు జరిగే అవకాశం ఉందని నిఘా సంస్థలు హెచ్చరించినట్లు తెలుస్తోంది. అదే సమయంలో భద్రతా బలగాల దృష్టిని ఢిల్లీ, కశ్మీర్ వంటి ప్రాంతాలపై కేంద్రీకరించేలా చేసి.. తక్కువ భద్రత ఉండే ఇతర నగరాల్లో విధ్వంసానికి పాల్పడే వ్యూహాన్ని ఉగ్రవాదులు అనుసరించే అవకాశాన్ని కూడా అధికారులు పరిశీలిస్తున్నారు. ముఖ్యంగా టైర్-2 నగరాల్లో భద్రతను బలోపేతం చేయడంపై దృష్టి సారించినట్లు సమాచారం.

పాకిస్థాన్‌తో ఉన్న పశ్చిమ సరిహద్దు వెంబడి భద్రతా ఏర్పాట్లను మరింత కట్టుదిట్టం చేశారు. స్వాతంత్ర్య దినోత్సవం నేపథ్యంలో ఆగస్టు 10 నుంచి 17 వరకు ఆపరేషన్ అలర్ట్ చేపట్టినట్లు సమాచారం. ఈ చర్యలో భాగంగా సరిహద్దు భద్రతా దళం (BSF) అదనపు బలగాలను మోహరించడంతో పాటు పెట్రోలింగ్, నిఘా కార్యకలాపాలను పెంచింది. సీనియర్ అధికారులు పరిస్థితిని ఎప్పటికప్పుడు పర్యవేక్షిస్తూ, సరిహద్దు ప్రాంతాల్లో అనుమానాస్పద కదలికలను గుర్తించేందుకు ప్రత్యేక చర్యలు చేపట్టారు.

బంగ్లాదేశ్ సరిహద్దుల నుంచి జరిగే అక్రమ చొరబాట్లు, స్మగ్లింగ్ వంటి కార్యకలాపాలను అడ్డుకునేందుకు కేంద్ర ప్రభుత్వం దీర్ఘకాలిక చర్యలపై కూడా దృష్టి సారించింది. పశ్చిమ బెంగాల్‌లోని సరిహద్దు జిల్లాల్లో సుమారు 40 సబ్సిడరీ ఇంటెలిజెన్స్ బ్యూరో (SIB) యూనిట్లను** ఏర్పాటు చేసే ప్రతిపాదనపై కేంద్రం చర్యలు చేపట్టినట్లు సమాచారం. సరిహద్దు ప్రాంతాల్లో స్థానిక స్థాయిలో సమాచార సేకరణ, నిఘా వ్యవస్థను మరింత బలోపేతం చేయడమే దీని లక్ష్యంగా భావిస్తున్నారు.

ఉగ్ర ముప్పు హెచ్చరికల నేపథ్యంలో దేశవ్యాప్తంగా కీలక ప్రాంతాల్లో భద్రతను పెంచారు. ప్రధాన నగరాలతో పాటు విమానాశ్రయాలు, రైల్వే స్టేషన్లు, రద్దీ ప్రాంతాల్లో అనుమానాస్పద వ్యక్తులు, వస్తువులు, వాహనాలపై నిఘా ముమ్మరం చేసినట్లు సమాచారం. స్వాతంత్ర్య దినోత్సవ వేడుకలు ప్రశాంతంగా జరిగేలా కేంద్ర, రాష్ట్ర భద్రతా సంస్థలు సమన్వయంతో పనిచేస్తున్నాయి. ప్రజలు కూడా అనుమానాస్పద కదలికలు కనిపిస్తే వెంటనే సంబంధిత అధికారులకు సమాచారం అందించాలని భద్రతా సంస్థలు సూచిస్తున్నాయి.