Peddi Sudarshan Reddy No More: నర్సంపేట మాజీ ఎమ్మెల్యే పెద్ది సుదర్శన్ రెడ్డి మృతి.. తీవ్ర అనారోగ్యంతో పోరాడి కన్నుమూసిన బీఆర్ఎస్ నేత..

Prajapaksham 31 Jul 2026 1 నిమిషాల పఠనం తెలంగాణ

Peddi Sudarshan Reddy No More

బీఆర్ఎస్ సీనియర్ నాయకుడు, నర్సంపేట మాజీ ఎమ్మెల్యే పెద్ది సుదర్శన్ రెడ్డి కన్నుమూశారు. గుండెపోటు రావడంతో ఐదు రోజులుగా హైదరాబాద్‌లోని ఓ ప్రైవేట్ ఆస్పత్రిలో చికిత్స పొందుతున్న ఆయన గురువారం అర్ధరాత్రి తుదిశ్వాస విడిచారు.

Peddi Sudarshan Reddy No More: తెలంగాణ రాజకీయాల్లో, ముఖ్యంగా ఉమ్మడి వరంగల్ జిల్లా రాజకీయాల్లోనూ, తెలంగాణ ప్రత్యేక రాష్ట్ర ఉద్యమంలోనూ తనదైన ముద్ర వేసిన భారత రాష్ట్ర సమితి (బీఆర్ఎస్) సీనియర్ నేత, నర్సంపేట మాజీ ఎమ్మెల్యే పెద్ది సుదర్శన్‌రెడ్డి (52) కన్నుమూశారు. గత ఐదు రోజులుగా తీవ్రమైన గుండెపోటుతో బాధపడుతూ సికింద్రాబాద్‌లోని యశోద ఆసుపత్రిలో చికిత్స పొందుతున్న ఆయన గురువారం అర్ధరాత్రి 12.50 గంటలకు తుదిశ్వాస విడిచినట్లు వైద్యులు అధికారికంగా ప్రకటించారు. ఆయన అకాల మరణవార్త తెలిసిన వెంటనే బీఆర్ఎస్ శ్రేణుల్లో, నర్సంపేట నియోజకవర్గంతో పాటు ఉమ్మడి వరంగల్ జిల్లా వ్యాప్తంగా తీవ్ర విషాదఛాయలు అలుముకున్నాయి.

ఈ నెల 26న హనుమకొండలోని తన నివాసంలో ఉన్న సమయంలో పెద్ది సుదర్శన్‌రెడ్డికి ఒక్కసారిగా ఛాతీలో తీవ్రమైన నొప్పి వచ్చింది. పరిస్థితిని గమనించిన కుటుంబ సభ్యులు, అనుచరులు ఆయనను వెంటనే స్థానిక ప్రైవేటు ఆసుపత్రికి తరలించారు. ఆసుపత్రికి చేరేసరికి ఆయన పరిస్థితి అత్యంత విషమించి కార్డియాక్ అరెస్ట్‌కు గురైనట్లు వైద్యులు గుర్తించారు. అత్యవసర విభాగం వైద్యులు సుమారు గంట పాటు శ్రమించి, తొమ్మిది సార్లు సీపీఆర్ (CPR) చేసిన తర్వాత ఆయన గుండె తిరిగి స్పందించింది.

అనంతరం అత్యంత మెరుగైన వైద్య సేవల కోసం ఆయనను వెంటనే సికింద్రాబాద్‌లోని యశోద ఆసుపత్రికి తరలించారు. అక్కడ నిపుణులైన ప్రత్యేక వైద్య బృందం ఆయనను వెంటిలేటర్‌పై ఉంచి చికిత్స అందించడం ప్రారంభించింది. అయితే, కార్డియాక్ అరెస్ట్ సమయంలో గుండె ఆగిపోవడం వల్ల మెదడుకు ఆక్సిజన్ సరఫరాలో తీవ్ర అంతరాయం ఏర్పడింది. సుదీర్ఘకాలం పాటు స్పృహలోకి రాకపోవడంతో నాడీ సంబంధిత స్పందనలు కనిపించలేదు. ఆక్సిజన్ అందకపోవడం వల్ల మెదడు తీవ్రంగా దెబ్బతిన్నట్లు వైద్యులు నిర్వహించిన ఈసీజీ, బ్రెయిన్ ఎంఆర్‌ఐ పరీక్షల్లో తేలింది. ఐదు రోజులుగా వెంటిలేటర్‌పై మృత్యువుతో సుదీర్ఘంగా పోరాడిన ఆయన చివరకు కోలుకోలేక ప్రాణాలు విడిచారు.

ఉమ్మడి వరంగల్ జిల్లాలోని నల్లబెల్లి మండలంలో 1974 ఆగస్టు 6న ఒక సాధారణ వ్యవసాయ కుటుంబంలో సుదర్శన్‌రెడ్డి జన్మించారు. చిన్నతనం నుంచే గ్రామీణ ప్రాంత సమస్యలపై అవగాహన పెంచుకున్న ఆయన, విద్యార్థి దశ నుంచే ప్రజా జీవితంలో చురుగ్గా పాల్గొనేవారు. తొలుత కాంగ్రెస్ పార్టీ ద్వారా తన రాజకీయ ప్రస్థానాన్ని ప్రారంభించిన సుదర్శన్‌రెడ్డి, తెలంగాణ సాధనకై ఉద్యమం ఊపందుకుంటున్న సమయంలో కేసీఆర్ పిలుపుతో ప్రభావితమై 2001లో టీఆర్‌ఎస్ (ప్రస్తుత బీఆర్ఎస్) పార్టీలో చేరారు. అదే ఏడాది జరిగిన స్థానిక సంస్థల ఎన్నికల్లో నల్లబెల్లి జడ్పీటీసీగా పోటీ చేసి విజయం సాధించి, తొలిసారిగా ప్రత్యక్ష రాజకీయంలో తన ఉనికిని చాటుకున్నారు.

తెలంగాణ మలిదశ ఉద్యమంలో బీఆర్ఎస్ పార్టీ అధినేత కేసీఆర్‌కు ఆప్తమిత్రుడిగా, నంబర్ టు కేడర్‌గా ఉమ్మడి వరంగల్ జిల్లా ఉద్యమ క్షేత్రంలో ముందు వరుసలో నిలిచారు. నియోజకవర్గంలో పార్టీ పటిష్టతకు, ఉద్యమ వ్యాప్తికి రాత్రింబవళ్లు కృషి చేశారు. ఆయన సేవలను గుర్తించిన బీఆర్ఎస్ అధిష్టానం, 2015లో ఆయనకు తెలంగాణ రాష్ట్ర పౌర సరఫరాల సంస్థ (సివిల్ సప్లైస్ కార్పొరేషన్) ఛైర్మన్‌గా బాధ్యతలు అప్పగించింది. ఆ పదవిలో ఉన్న సమయంలో ధాన్యం కొనుగోలు ప్రక్రియను, ప్రజా పంపిణీ వ్యవస్థను బలోపేతం చేయడంలో కీలక పాత్ర పోషించారు.

ఆ తర్వాత 2018 శాసనసభ ఎన్నికల్లో నర్సంపేట నియోజకవర్గం నుంచి బీఆర్ఎస్ అభ్యర్థిగా పోటీ చేసి భారీ మెజార్టీతో విజయం సాధించి తొలిసారిగా ఎమ్మెల్యేగా అసెంబ్లీలో అడుగుపెట్టారు. శాసనసభ్యుడిగా ఉన్న కాలంలో నర్సంపేట ప్రాంతంలో సాగునీటి ప్రాజెక్టులు, చెరువుల పునరుద్ధరణ, మౌలిక వసతుల కల్పనపై ప్రత్యేక దృష్టి సారించారు. నియోజకవర్గ ప్రజలకు ఎల్లప్పుడూ అందుబాటులో ఉండే నాయకుడిగా ఆయన మంచి గుర్తింపు తెచ్చుకున్నారు. పెద్ది సుదర్శన్‌రెడ్డి మృతి పట్ల పలువురు ప్రముఖులు, వివిధ రాజకీయ పార్టీల నేతలు గాఢ సానుభూతి తెలిపారు.