New Bars in Telangana: తెలంగాణలో కొత్తగా 41 బార్లు.. నేటి నుంచే దరఖాస్తుల స్వీకరణ.. అక్టోబర్ 12 వరకు అవకాశం

New Bars in Telangana: తెలంగాణలో కొత్తగా 41 ‘2బీ’ బార్ అండ్ రెస్టారెంట్ల ఏర్పాటుకు రాష్ట్ర ప్రొహిబిషన్ అండ్ ఎక్సైజ్ శాఖ అనుమతి ఇచ్చింది. ఈ మేరకు శాఖ నోటిఫికేషన్ విడుదల చేసి, అర్హులైన వారి నుంచి దరఖాస్తులను ఆహ్వానించింది. కొత్తగా మంజూరు చేయనున్న 41 బార్ లైసెన్సుల్లో 14 తెలంగాణ కోర్ అర్బన్ రీజియన్ (టీసీయూఆర్) పరిధిలో ఉండగా.. మరో 27 బార్లను రాష్ట్రంలోని ఇతర మున్సిపల్ కార్పొరేషన్లు, మున్సిపాలిటీల్లో ఏర్పాటు చేయనున్నారు.

కొత్త బార్ లైసెన్సుల కోసం దరఖాస్తుల స్వీకరణ సెప్టెంబర్ 28న ప్రారంభమైంది. అక్టోబర్ 12 వరకు ప్రభుత్వ పని దినాల్లో ఉదయం 10 గంటల నుంచి సాయంత్రం 5 గంటల వరకు దరఖాస్తులు సమర్పించేందుకు అవకాశం ఉంటుంది. ఒక్కో దరఖాస్తుకు రూ.1 లక్ష నాన్‌-రిఫండబుల్ ఫీజుగా చెల్లించాల్సి ఉంటుంది. నిర్ణీత గడువు ముగిసిన తర్వాత దరఖాస్తులను పరిశీలించి, అవసరమైన చోట్ల లాటరీ విధానంలో లైసెన్సులను కేటాయించనున్నారు. అక్టోబర్ 16న ఉదయం 11 గంటలకు లాటరీ నిర్వహించనున్నట్లు నోటిఫికేషన్‌లో పేర్కొన్నారు.

టీసీయూఆర్ పరిధిలోని గ్రేటర్ హైదరాబాద్, సైబరాబాద్, మల్కాజిగిరి ప్రాంతాల్లో మొత్తం 14 కొత్త బార్లకు అవకాశం కల్పించారు. మిగిలిన 27 బార్లు రాష్ట్రంలోని వివిధ మున్సిపల్ కార్పొరేషన్లు, మున్సిపాలిటీల పరిధిలో ఏర్పాటు కానున్నాయి. జనాభా పెరుగుదల, కొత్త మున్సిపాలిటీల ఏర్పాటు, సమీప గ్రామాల విలీనం వంటి అంశాలను పరిగణనలోకి తీసుకుని కొత్త బార్ లైసెన్సులు కేటాయించినట్లు అధికారులు వెల్లడించారు.

కొత్తగా బార్ లైసెన్సులు ఇవ్వనున్న ప్రాంతాల్లో కొన్ని చోట్ల తొలిసారిగా 2బీ బార్లకు అవకాశం లభిస్తోంది. దేవరకద్ర, ఎల్లంపల్లి, మద్దూర్, గుమ్మడిదల వంటి ప్రాంతాలు ఈ జాబితాలో ఉన్నాయి. వీటితో పాటు అశ్వారావుపేట, కల్లూరు, మక్తల్, చేవెళ్ల, మొయినాబాద్, కొడంగల్, పరిగి, నర్సంపేట, స్టేషన్ ఘన్‌పూర్, కేసముద్రం, ములుగు, బోధన్, కోహిర్, బిచ్కుంద తదితర ప్రాంతాల్లోనూ కొత్త లైసెన్సులకు దరఖాస్తులు స్వీకరిస్తున్నారు.

కొత్త బార్లకు చెల్లించాల్సిన వార్షిక బార్ ఎక్సైజ్ ట్యాక్స్ (BET)ను ప్రాంతాల వారీగా నిర్ణయించారు. టీసీయూఆర్ పరిధిలోని బార్లకు సంవత్సరానికి రూ.44 లక్షలుగా ఫీజు ఖరారు చేశారు. నిజామాబాద్ జిల్లాలోని బోధన్‌కు రూ.42 లక్షలు, మిగిలిన నోటిఫై చేసిన ప్రాంతాల్లోని బార్లకు ఏడాదికి రూ.30 లక్షల BET వర్తిస్తుంది. ఈ రేట్ల ఆధారంగా 41 కొత్త బార్ల ద్వారా ప్రభుత్వానికి సంవత్సరానికి సుమారు రూ.14.62 కోట్ల మేర అదనపు బార్ ఎక్సైజ్ ఆదాయం వచ్చే అవకాశం ఉందని అధికారులు అంచనా వేస్తున్నారు.

లాటరీలో ఎంపికైన దరఖాస్తుదారు లైసెన్స్ తీసుకోవడానికి నిరాకరించినా, లైసెన్స్‌ను వదులుకున్నా లేదా నోటిఫికేషన్‌లో పేర్కొన్న నిబంధనలను ఉల్లంఘించినా రూ.5 లక్షలు ప్రభుత్వానికి చెల్లించాల్సి ఉంటుందని అధికారులు స్పష్టం చేశారు. దరఖాస్తుదారులు అర్హతలు, ప్రాంతాల వారీగా వివరాలు, లైసెన్స్ నిబంధనలు తదితర సమాచారాన్ని తెలంగాణ ప్రొహిబిషన్ అండ్ ఎక్సైజ్ శాఖ అధికారిక వెబ్‌సైట్‌లో పరిశీలించవచ్చు.

ప్రస్తుతం తెలంగాణలో సుమారు 1,185 బార్లు ఉన్నాయని ఎక్సైజ్ అధికారులను ఉటంకిస్తూ తాజా నివేదికలు పేర్కొంటున్నాయి. వీటిలో హైదరాబాద్‌లోనే సుమారు 657 బార్లు ఉన్నట్లు సమాచారం. తాజా నోటిఫికేషన్‌తో రాష్ట్రంలోని మరికొన్ని పట్టణాలు, మున్సిపాలిటీల్లో 2బీ బార్ లైసెన్సుల పరిధి విస్తరించనుంది.

• Supreme Court: ఢిల్లీ నిరసనలపై ఆంక్షలు.. పిటిషన్‌పై ఈ రోజు సుప్రీంకోర్టు ప్రత్యేక విచారణ
• CJP Protest: పోలీసు క్యాంపుగా మారిన ఢిల్లీ.. 7 వేల మందికి పైగా నిర్బంధం..మహిళలపై ఖాకీల కీచకపర్వం..
• Delhi Viral Video: ఢిల్లీ వీధుల్లో యువతిపై ఆర్ఎస్ఎస్ గూండాల దాడి…ప్రేక్షకులుగా చూస్తున్న ఢిల్లీ పోలీసులు..
• SIR Protest: ఢిల్లీ అష్ట దిగ్బంధం…3,000 మందికి పైగా అరెస్ట్‌..అభిజీత్‌ దీప్కేను గుర్తు తెలియని ప్రదేశానికి తరలింపు..
• H-1B Visa Row: H-1B వీసాలు రాకపోవడమే భారత్‌కు మేలు.. పీయూష్ గోయల్ వ్యాఖ్యల వెనుక కారణమిదే!