Keralam Assembly: సీఈసీ జ్ఞానేశ్ కుమార్‌ను తొలగించాలని కేరళ శాసనసభ చారిత్రాత్మక తీర్మానం.. సభలో ఏకగ్రీవ ఆమోదం

Keralam Assembly ఓటర్ల జాబితాల ప్రత్యేక సమగ్ర సవరణ (SIR) ప్రక్రియలో భారీగా అక్రమాలు జరిగాయన్న తీవ్ర ఆరోపణల నడుమ కేరళ శాసనసభ చారిత్రాత్మక నిర్ణయం తీసుకుంది. కేంద్ర ఎన్నికల ప్రధాన కమిషనర్ (CEC) జ్ఞానేశ్ కుమార్‌ను పదవి నుంచి తక్షణమే తొలగించాలని, అలాగే బాధ్యతారాహిత్యంగా రద్దు చేసిన ఓటర్ల హక్కులను పునరుద్ధరించాలని డిమాండ్ చేస్తూ కేరళ అసెంబ్లీ సోమవారం ఒక ముఖ్యమైన తీర్మానాన్ని ఆమోదించింది. భారత ప్రజాస్వామ్య చరిత్రలో ఒక రాష్ట్ర శాసనసభ కేంద్ర ఎన్నికల ప్రధాన కమిషనర్‌ను తొలగించాలని కోరుతూ తీర్మానం చేయడం ఇదే తొలిసారి కావడం గమనార్హం.

ఈ తీర్మానాన్ని సీఎం వి.డి. సతీసన్ సభలో ప్రవేశపెట్టగా.. ప్రతిపక్ష నేత పినరయి విజయన్ తో పాటు ఇతర పార్టీ సభ్యులు పూర్తి మద్దతు తెలిపారు. సభలో తీర్మానం ఆమోదం పొందిన అనంతరం సతీసన్ సోషల్ మీడియా వేదికగా స్పందిస్తూ, ఓటు హక్కు అనేది రాజ్యాంగ ప్రజాస్వామ్యానికి మూలస్తంభమని, ఏ వ్యవస్థ కూడా పౌరుల ఈ హక్కులను దెబ్బతీయడానికి వీల్లేదని పేర్కొన్నారు. స్వేచ్ఛాయుత, నిష్పక్షపాత ఎన్నికల నిర్వహణ కోసం కేరళ అసెంబ్లీ ఎల్లప్పుడూ బలంగా నిలబడుతుందని స్పష్టం చేశారు.

కేరళ శాసనసభ ఆమోదించిన ఈ తీర్మానం ప్రధానంగా మూడు డిమాండ్లను లేవనెత్తింది:
ఎస్ఐఆర్ సవరణల వల్ల అన్యాయంగా ఓటర్ల జాబితా నుంచి వైదొలిగిన కోట్లాది మంది పౌరుల ఓటు హక్కులను తక్షణమే పునరుద్ధరించాలి. ఎన్నికల వ్యవస్థ నిష్పాక్షికతను దెబ్బతీశారనే ఆరోపణల దృష్ట్యా సీఈసీ జ్ఞానేశ్ కుమార్‌ను పదవి నుంచి తొలగించేందుకు రాజ్యాంగబద్ధమైన చర్యలను వెంటనే ప్రారంభించాలి. అలాగే, ఎన్నికల సంఘం పారదర్శకతను కాపాడేందుకు కమిషనర్ల ఎంపిక కమిటీలో ప్రధాని, లోక్‌సభ ప్రతిపక్ష నేతతో పాటు భారత ప్రధాన న్యాయమూర్తి (CJI) ని భాగస్వామిగా చేస్తూ ప్యానెల్‌ను పునర్నిర్మించాలి.

ఈ చర్చ సందర్భంలో ప్రతిపక్ష నాయకుడు పినరయి విజయన్ సూచించిన మౌఖిక సవరణను అసెంబ్లీ అంగీకరించింది. దేశవ్యాప్తంగా సుమారు 13 కోట్ల మంది అర్హులైన ఓటర్ల పేర్లను తొలగించారన్న తీవ్ర ఆరోపణల నేపథ్యంలో తీర్మానంలో ‘కోట్లాది మంది ఓటర్లు’గా మార్పులు చేశారు. సభలోని బీజేపీ ఎమ్మెల్యేల తీవ్ర వ్యతిరేకత మధ్య మెజారిటీ సభ్యుల మద్దతుతో ఈ తీర్మానం ఆమోదం పొందింది. ఈ పరిణామం కేంద్ర ప్రభుత్వంపై , భారత ఎన్నికల సంఘం విశ్వసనీయతపై తీవ్ర ఒత్తిడిని పెంచింది.