Is INDIA Bloc Losing Unity? ఇండియా బ్లాక్ కూటమిలో కొనసాగుతున్న విబేధాలు.. CEC జ్ఞానేష్ కుమార్‌పై సుప్రీంకోర్టులో పిటిషన్‌కు దూరంగా 4 ప్రధాన పార్టీలు..

Is INDIA Bloc Losing Unity? కేంద్ర ప్రభుత్వ విధానాలకు, ఎన్నికల నిర్వహణ తీరుకు వ్యతిరేకంగా పోరాడేందుకు ఏర్పడిన ‘ఇండియా’ (INDIA) ప్రతిపక్ష కూటమిలో అంతర్గత విభేదాలు మరోసారి బహిర్గతమయ్యాయి. చీఫ్ ఎలక్షన్ కమీషనర్ (సీఈసీ) జ్ఞానేష్ కుమార్‌కు వ్యతిరేకంగా, అలాగే ఎన్నికల నిర్వహణలో జరుగుతున్నాయన్న అవకతవకలపై కాంగ్రెస్ అగ్రనేత రాహుల్ గాంధీ నాయకత్వంలో ఇండియా కూటమి పార్టీలు సోమవారం సుప్రీంకోర్టులో పిటిషన్ దాఖలు చేశాయి. అయితే, ఈ సంయుక్త పిటిషన్‌పై కేవలం 11 ప్రతిపక్ష పార్టీలు మాత్రమే సంతకాలు చేయగా, కూటమిలో అత్యంత కీలకమైన నాలుగు ప్రధాన పార్టీలు దూరంగా ఉండటం తీవ్ర రాజకీయ చర్చకు దారితీసింది.

విశేషమేమిటంటే, ఇండియా కూటమిలో క్రియాశీల భాగస్వాములుగా ఉన్న అరవింద్ కేజ్రీవాల్ నాయకత్వంలోని ఆమ్ ఆద్మీ పార్టీ (ఆప్), తమిళనాడు ముఖ్యమంత్రి ఎం.కే. స్టాలిన్ ఆధ్వర్యంలోని డిఎంకే (DMK)లు ఈ సుప్రీంకోర్టు పిటిషన్‌పై సంతకం చేయకపోవడం గమనార్హం. వీటితో పాటు కూటమి బయట ఉన్నప్పటికీ బీజేపీ, ఎన్‌డీయేలకు ప్రత్యర్థులుగా నిలుస్తున్న నవీన్ పట్నాయక్ నేతృత్వంలోని బిజూ జనతా దళ్ (బీజేడీ), తమిళనాడులో నటుడు విజయ్ స్థాపించిన తమిళగ వెట్రి కజగం (టీవీకే) పార్టీలు కూడా ఈ న్యాయపోరాటానికి దూరంగా ఉన్నాయి. ఈ పార్టీలన్నీ సీఈసీ జ్ఞానేష్ కుమార్ రాజీనామాను బహిరంగంగా డిమాండ్ చేసినవే అయినప్పటికీ.. రాహుల్ గాంధీ నేతృత్వంలో సుప్రీంకోర్టుకు వెళ్లే విషయంలో మాత్రం వెనకడుగు వేశాయి.

కూటమిలో అంతర్భాగంగా ఉంటూనే ఆప్, డీఎంకేలు దూరంగా ఉండటం కాంగ్రెస్తో ఆయా పార్టీలకు ఉన్న ప్రాంతీయ విభేదాలను ఎత్తిచూపుతోంది. తమిళనాడులో కాంగ్రెస్, డీఎంకే మధ్య పొత్తులో ఘర్షణ వాతావరణం నెలకొంది. ఇటీవల విజయ్ నేతృత్వంలోని టీవీకే పార్టీకి కాంగ్రెస్ సంకేతాలు ఇవ్వడం, రాష్ట్ర ప్రభుత్వంలో భాగస్వామ్యం కోరడంపై డీఎంకే తీవ్ర అసంతృప్తితో ఉంది. మరోవైపు పంజాబ్, ఢిల్లీ వంటి రాష్ట్రాల్లో కాంగ్రెస్‌తో స్థానిక పూచీకత్తు కుదరకపోవడంతో ఆమ్ ఆద్మీ పార్టీ కూడా ఇండియా కూటమికి కొంతకాలంగా దూరంగా ఉంటోంది.

ఇక ఒడిశాలో బీజేడీ అధినేత, మాజీ ముఖ్యమంత్రి నవీన్ పట్నాయక్ ఎన్నికల ప్రక్రియను, సీఈసీ తీరును తీవ్రంగా వ్యతిరేకిస్తున్నారు. ఇటీవల బీజేడీ ఎంపీలు ప్రతిపక్షాల ర్యాలీలో కూడా పాల్గొన్నారు. కానీ, కాంగ్రెస్ సారథ్యంలో దాఖలైన పిటిషన్‌లో భాగస్వామి కావడానికి సుముఖత చూపలేదు. రాబోయే ఎన్నికల నాటికి కూటమిని ఏకతాటిపైకి తెచ్చేందుకు కాంగ్రెస్ ప్రయత్నిస్తున్నప్పటికీ, ప్రాంతీయ సమీకరణాలు, నాయకత్వ వైరుధ్యాల వల్ల ప్రతిపక్ష కూటమిలో చీలికలు స్పష్టంగా కనిపిస్తున్నాయి.