FAIMA Survey: ప్రతి ఆరుగురు వైద్యుల్లో ఒకరికి ఆత్మహత్య ఆలోచనలు.. ఫైమా సర్వేలో కీలక విషయాలు

FAIMA Survey: భారతదేశంలోని వైద్య రంగాన్ని షాక్‌కు గురిచేసే సర్వే ఫలితాలు ఇటీవల వెలుగులోకి వచ్చాయి. దేశంలోని పోస్ట్ గ్రాడ్యుయేట్ వైద్య శిక్షణార్థులు (రెసిడెంట్ డాక్టర్లు) అనుభవిస్తున్న నరకప్రాయమైన పని పరిస్థితులపై ఈ సర్వే ఒక సంచలన చిత్రాన్ని ఆవిష్కరించింది. ‘ఫెడరేషన్ ఆఫ్ ఆల్ ఇండియా మెడికల్ అసోసియేషన్’ (FAIMA) ఆధ్వర్యంలో దేశంలోని 28 రాష్ట్రాలు, కేంద్రపాలిత ప్రాంతాలకు చెందిన 1,260 మంది రెసిడెంట్ డాక్టర్లపై నిర్వహించిన ఈ అధ్యయనంలో ఆశ్చర్యకరమైన అంశాలు బయటపడ్డాయి. దేశంలో పనిచేస్తున్న ప్రతి ఆరుగురు రెసిడెంట్ డాక్టర్లలో దాదాపు ఒకరు తీవ్రమైన పని ఒత్తిడి తట్టుకోలేక ఆత్మహత్య చేసుకోవాలనే ఆలోచనలను ఎదుర్కొన్నారని ఈ సర్వే వెల్లడించింది.

ఫైమా యొక్క ‘రివ్యూ మెడికల్ సిస్టమ్ 2.0’ (RMS 2.0) కింద జూన్ 29, సోమవారం నాడు విడుదలైన ఈ నివేదిక ప్రకారం.. సర్వేలో పాల్గొన్న వారిలో 87.5 శాతం మంది తీవ్రమైన మానసిక అశాంతి, అలసట (బర్న్‌అవుట్) లక్షణాలను ఎదుర్కొంటున్నారు. అలాగే సుదీర్ఘ డ్యూటీ గంటలు, మితిమీరిన పనిభారం కారణంగా 87.8 శాతం మంది నిద్రలేమి సమస్యతో నలిగిపోతున్నారు. తాము విరామం లేకుండా వరుసగా 36 గంటలకు పైగా పనిచేశామని 61 శాతానికి పైగా డాక్టర్లు చెప్పగా.. విధి నిర్వహణ ముగిసిన తర్వాత తప్పనిసరిగా తీసుకోవాల్సిన విశ్రాంతిని తాము ఎప్పుడూ పొందలేకపోతున్నామని 63.7 శాతం మంది ఆవేదన వ్యక్తం చేశారు.

ఈ సర్వేలో పాల్గొన్న వారిలో దాదాపు సగం మంది (46.7 శాతం) తాము వారానికి ఏకంగా 80 గంటలకు పైగా విధుల్లో గడుపుతున్నామని వివరించగా.. ప్రతి ఐదుగురిలో ఒకరు ఏకంగా 100 గంటల పని పరిమితిని కూడా దాటుతున్నట్లు తేలింది. ఈ పని ఒత్తిడిని భరించలేక 54 శాతానికి పైగా వైద్యులు తమ రెసిడెన్సీని (వైద్య వృత్తిని) పూర్తిగా వదిలివేయాలని ఆలోచించినట్లు పేర్కొన్నారు. ఆసుపత్రుల్లో తీవ్రమైన సిబ్బంది కొరత, మానసిక ఆరోగ్యానికి తగిన మద్దతు కరువడం, బాండ్ విధానాల ఒత్తిడి, స్టైపెండ్‌ సకాలంలో అందకపోవడం వంటి సమస్యలు ఈ దారుణ పరిస్థితికి మరింత ఆజ్యం పోస్తున్నాయని ఫైమా సర్వే గుర్తించింది.

ఈ షాకింగ్ సంక్షోభంపై స్పందించిన ఫైమా (FAIMA).. దేశంలోని అన్ని బోధనా ఆసుపత్రులలో రెసిడెంట్ డాక్టర్ల డ్యూటీ గంటలపై తక్షణమే ఒక జాతీయ నియంత్రణను తీసుకురావాలని డిమాండ్ చేసింది. సుదీర్ఘ షిఫ్టుల తర్వాత తప్పనిసరి విశ్రాంతి ఇవ్వడంతో పాటు.. వైద్యుల కోసం అత్యంత గోప్యమైన మానసిక ఆరోగ్య సేవలను అందుబాటులోకి తేవాలని కోరింది. అలాగే పారదర్శకమైన ఫిర్యాదుల పరిష్కార యంత్రాంగం, బాండ్ విధానాల హేతుబద్ధీకరణ, దేశవ్యాప్తంగా ఏకరీతిగా, సకాలంలో స్టైపెండ్ అందించే విధానాన్ని అమలు చేయాలని నియంత్రణ సంస్థలను కోరింది. రెసిడెంట్ డాక్టర్లను పీడిస్తున్న ఈ సమస్యలు కేవలం వారి సొంత శ్రేయస్సుపైనే కాకుండా.. రోగుల ప్రాణాల భద్రతపై, భారతదేశ వైద్య విద్యా వ్యవస్థ యొక్క భవిష్యత్తుపై తీవ్రమైన ప్రత్యక్ష ప్రభావం చూపుతాయని ఫెడరేషన్ గట్టిగా హెచ్చరించింది.