CJP Protest: ఢిల్లీ దిగ్బంధనంపై సుప్రీంకోర్టు అసంతృప్తి.. ఈగను చంపేందుకు పెద్ద సుత్తి వాడొద్దని హితవు…

CJP Protest: ప్రధాన న్యాయమూర్తి జస్టిస్‌ సూర్యకాంత్‌ నేతృత్వంలోని ధర్మాసనం.. అవసరమైన ప్రాంతాలకే భద్రతా ఆంక్షలను పరిమితం చేయాలని సూచించింది. రోడ్ల మూసివేతపై మరోసారి సమీక్ష జరపాలని పేర్కొంది.

CJP Protest: ఢిల్లీలో సీజేపీ నిరసనల నేపథ్యంలో పోలీసులు చేపట్టిన కట్టడి చర్యలపై సుప్రీంకోర్టు కీలక వ్యాఖ్యలు చేసింది. ప్రజలకు నిరసన తెలిపే హక్కు ఉన్నప్పటికీ, అది చట్టానికి లోబడి ఉండాలని స్పష్టం చేసింది. అనుమతి లేకుండా నిరసనలు చేపట్టడం చట్టవిరుద్ధమని పేర్కొన్న ధర్మాసనం.. పౌరుల ప్రాథమిక హక్కులను కాపాడటంతోపాటు శాంతిభద్రతలను పరిరక్షించడం కూడా అంతే ముఖ్యమని వ్యాఖ్యానించింది.

మరోవైపు, నిరసనల నేపథ్యంలో ఢిల్లీలో పోలీసులు చేపట్టిన దిగ్బంధనం, మెట్రో రైళ్ల రద్దుపైనా అత్యున్నత న్యాయస్థానం స్పందించింది. 57 మెట్రో స్టేషన్లను మూసివేయాలన్న నిర్ణయం, రైళ్ల రాకపోకలపై ఆంక్షల విషయంలో అసంతృప్తి వ్యక్తం చేసింది. ప్రజలకు అందుబాటులో ఉండాల్సిన కనీస రవాణా సదుపాయాలను పూర్తిగా నిలిపివేయడం సరికాదని అభిప్రాయపడింది.

ప్రధాన న్యాయమూర్తి జస్టిస్‌ సూర్యకాంత్‌ నేతృత్వంలోని ధర్మాసనం.. అవసరమైన ప్రాంతాలకే భద్రతా ఆంక్షలను పరిమితం చేయాలని సూచించింది. రోడ్ల మూసివేతపై మరోసారి సమీక్ష జరపాలని పేర్కొంది. పరిస్థితిని అదుపులో ఉంచేందుకు తీసుకునే చర్యలు ప్రజలకు తీవ్ర ఇబ్బందులు కలిగించకూడదన్న అభిప్రాయాన్ని వ్యక్తం చేసింది. ఈ సందర్భంగా ‘ఈగను చంపేందుకు పెద్ద సుత్తిని వాడొద్దు’ అనే వ్యాఖ్యతో, సమస్య తీవ్రతకు తగినట్లుగానే ఆంక్షలు ఉండాలన్న విషయాన్ని ధర్మాసనం స్పష్టం చేసింది.

నిరసనల సమయంలో శాంతిభద్రతలను కాపాడటం ప్రభుత్వ బాధ్యతే అయినప్పటికీ, ఆ పేరుతో ప్రజల రాకపోకలకు, నిత్యావసర సేవలకు అనవసరమైన ఆటంకాలు కలగకుండా చూడాలని కోర్టు వ్యాఖ్యలు సూచిస్తున్నాయి. నిరసన హక్కు, ప్రజా భద్రత, సాధారణ జనజీవనం మధ్య సమతుల్యత పాటించాల్సిన అవసరాన్ని ఈ పరిణామం మరోసారి తెరపైకి తెచ్చింది.