Colombia Earthquake: కొలంబియాలో భారీ భూకంపం..169కు చేరిన మృతుల సంఖ్య.. మరింతగా పెరిగే అవకాశం

Prajapaksham 11 Aug 2026 1 నిమిషాల పఠనం ప్రపంచం

Colombia Earthquake

Colombia Earthquake: దక్షిణ అమెరికా దేశమైన కొలంబియాలో సోమవారం సంభవించిన అత్యంత శక్తివంతమైన భూకంపం తీవ్ర విషాదాన్ని నింపింది. రిక్టర్ స్కేలుపై 7.4 తీవ్రతతో సంభవించిన ఈ భూకంప ధాటికి ఇప్పటివరకు 169 మంది ప్రాణాలు కోల్పోగా.. 570 మందికి పైగా తీవ్రంగా గాయపడ్డారు. ప్రధాన భూకంపం తర్వాత కూడా దాదాపు 21 ప్రకంపనలు (ఆఫ్టర్‌షాక్స్) రావడం ప్రజలను తీవ్ర భయాందోళనకు గురిచేసింది.

భూకంప తీవ్రతకు కొలంబియా వ్యాప్తంగా భారీ ఆస్తి నష్టం వాటిల్లింది. అధ్యక్షుడు అబెలార్డో డి లా ఎస్ప్రియెల్లా తెలిపిన వివరాల ప్రకారం.. 61 భవనాలు పూర్తిగా నేలమట్టం కాగా.. 1,575 ఇళ్లు, 18 ఆసుపత్రులు, 52 పాఠశాలలు తీవ్రంగా దెబ్బతిన్నాయి. పెరీరా నగరంలో నాలుగు అంతస్తుల భవనం క్షణాల్లో కుప్పకూలడం, మనిజాలెస్‌లోని ప్రసిద్ధ నియో-గోతిక్ కేథడ్రల్ పక్క టవర్ కూలిపోవడం భూకంప భీభత్సానికి అద్దం పడుతోంది. కాలీ నగరంలో శిథిలాల కింద చిక్కుకున్న ఆరు నెలల పసిపాపతో పాటు ఆమె తల్లిని రక్షణ బృందాలు ప్రాణాలతో సురక్షితంగా బయటకు తీశాయి. పరిస్థితి అత్యంత దారుణంగా ఉండటంతో ప్రభుత్వం ప్రభావిత ప్రాంతాల్లో అత్యవసర పరిస్థితి (Emergency) ప్రకటించింది.

కొలంబియా జియోలాజికల్ సర్వీస్ వివరాల ప్రకారం.. ఇది 21వ శతాబ్దంలోనే దేశంలో నమోదైన అత్యంత శక్తివంతమైన భూకంపంగా ఇది రికార్డులకెక్కింది. భూకంప కేంద్రం భూగర్భంలో లోతుగా ఉన్నప్పటికీ.. 7.4 తీవ్రత కారణంగా జనసాంద్రత అధికంగా ఉండే లోయ ప్రాంతాల్లో తీవ్ర నష్టం వాటిల్లింది.

కొలంబియా పసిఫిక్ తీర ప్రాంతం ‘రింగ్ ఆఫ్ ఫైర్’ (Ring of Fire) పరిధిలో ఉంది. పసిఫిక్ మహాసముద్రం చుట్టూ ఉన్న ఈ ప్రాంతంలో ప్రపంచంలోనే అత్యధికంగా తీవ్ర భూకంపాలు, అగ్నిపర్వత విస్ఫోటనాలు సంభవిస్తుంటాయి. శిథిలాల కింద ఇంకా అనేకమంది చిక్కుకుపోవడంతో సహాయక బృందాలు అహోరాత్రులు శ్రమిస్తున్నాయి. మృతుల సంఖ్య మరింత పెరిగే అవకాశముందని అధికారులు భావిస్తున్నారు.