Gold Rates Today: బంగారం కొనేవారికి గుడ్ న్యూస్.. రెండు రోజుల్లో రూ. 22 వేలకు పైగా పతనం.. రూ. 5 వేలు తగ్గిన వెండి ధర..

Gold Rates Today: జూలై 24, 2026న భారతీయ మార్కెట్లలో బంగారం, వెండి ధరలు వరుసగా రెండో రోజు భారీగా పతనం అయ్యాయి. అంతర్జాతీయంగా పెరుగుతున్న ముడి చమురు ధరలు, బలపడుతున్న అమెరికన్ డాలర్, పెరుగుతున్న బాండ్ ఈల్డ్స్, రాబోయే యూఎస్ ఫెడరల్ రిజర్వ్ వడ్డీ రేట్ల విధానంపై తలెత్తిన అనిశ్చితి వల్ల ఇన్వెస్టర్లు అమ్మకాలకు మొగ్గు చూపడంతో ఈ పతనం చోటుచేసుకుంది. అమెరికా-ఇరాన్ ఉద్రిక్తతల నేపథ్యంలో చమురు ధర బారెల్‌కు 101 డాలర్లకు దాటడం ద్రవ్యోల్బణ ఆందోళనలను పెంచింది. వడ్డీ రేట్లు పెరిగితే డాలర్, బాండ్లపై రాబడి పెరిగి బంగారం లాంటి రాబడినివ్వని ఆస్తుల డిమాండ్ తగ్గడమే ఈ భారీ క్షీణతకు కారణమైంది.

ధరల వివరాల్లోకి వెళ్తే, 24 క్యారెట్ల 10 గ్రాముల బంగారం ధర రూ. 1,850 తగ్గి రూ. 1,44,330 కి చేరగా.. 100 గ్రాముల బంగారం ధర రూ. 18,500 తగ్గి రూ. 14,43,300 కి పడిపోయింది. అదేవిధంగా, 22 క్యారెట్ల 10 గ్రాముల బంగారం ధర రూ. 1,700 తగ్గి రూ. 1,32,300 కి, 18 క్యారెట్ల 10 గ్రాముల బంగారం ధర రూ. 1,390 తగ్గి రూ. 1,08,250 వద్ద నిలిచింది. ఇక వెండి విషయానికి వస్తే.. కేజీ వెండి ధర రూ. 5 వేలు తగ్గి రూ. 2,35,000 కు పడిపోగా, 10 గ్రాముల వెండి ధర రూ. 2,350 గా నమోదైంది.

నగరాల వారీగా చూస్తే హైదరాబాద్, విజయవాడ, విశాఖపట్నం, బెంగళూరు, ముంబైలలో 24 క్యారెట్ల బంగారం గ్రాముకు రూ. 14,433 గానూ, 22 క్యారెట్ల బంగారం రూ. 13,230 గానూ, 18 క్యారెట్ల బంగారం రూ. 10,825 గానూ ఉంది. ఢిల్లీలో 24 క్యారెట్ల బంగారం గ్రాముకు రూ. 14,448 గా ఉండగా, చెన్నైలో 18 క్యారెట్ల బంగారం రూ. 11,045 గా నమోదైంది. ద్రవ్యోల్బణ ఒత్తిళ్లు ఉన్నప్పటికీ.. రాబోయే రోజుల్లో వెలువడే యూఎస్ ఫెడ్ విధాన నిర్ణయాలే పసిడి తదుపరి దిశను నిర్దేశిస్తాయని మార్కెట్ నిపుణులు అభిప్రాయపడుతున్నారు.

ధరల పతనానికి దారితీసిన ప్రధాన కారణాలు

పెరిగిన ముడి చమురు ధరలు , ద్రవ్యోల్బణ భయాలు: పశ్చిమ ఆసియాలో ముఖ్యంగా అమెరికా , ఇరాన్‌ల మధ్య ఉద్రిక్తతలు 13వ రోజుకు చేరుకోవడంతో అంతర్జాతీయంగా ఇంధన సరఫరాపై ఆందోళనలు వ్యక్తమయ్యాయి. దీని ఫలితంగా ఈ వారం ముడి చమురు ధర బారెల్‌కు $101 మార్కును దాటి దూసుకెళ్లింది. ముడి చమురు ధరలు పెరిగితే అది ప్రపంచవ్యాప్తంగా రవాణా , తయారీ ర రంగాలపై భారం మోపి, ద్రవ్యోల్బణం తీవ్రమవడానికి కారణమవుతుంది.

యూఎస్ ఫెడరల్ రిజర్వ్ వడ్డీ రేట్ల పెంపు అంచనాలు: ద్రవ్యోల్బణాన్ని అదుపు చేయడానికి అమెరికా కేంద్ర బ్యాంక్ అయిన యూఎస్ ఫెడరల్ రిజర్వ్ రాబోయే పాలసీ సమావేశంలో వడ్డీ రేట్లను పెంచే అవకాశాలు మళ్లీ బలపడ్డాయి. మార్కెట్ వర్గాలు వడ్డీ రేట్లు 3.50 శాతం నుండి 3.75 శాతం వద్ద యథాతథంగా ఉంచుతాయని భావించినప్పటికీ.. చమురు ధరాఘాతం వల్ల ఫెడ్ మరింత కఠిన వైఖరిని అవలంబించవచ్చనే భయాలు పెరిగాయి. రాబోయే సెప్టెంబర్ నాటికి రేట్ల పెంపునకు 81 శాతానికి పైగా సంభావ్యత ఉందని మార్కెట్లు అంచనా వేస్తున్నాయి.

బాండ్ ఈల్డ్స్ , డాలర్ బలోపేతం: అమెరికా ఫెడ్ వడ్డీ రేట్లను పెంచే సూచనలు కనిపించడంతో యూఎస్ డాలర్ విలువ , బాండ్ల ఈల్డ్స్ పుంజుకున్నాయి. వడ్డీ రేట్లు పెరిగినప్పుడు బాండ్లు, డిపాజిట్ల వంటి రాబడినిచ్చే ఆస్తులు ఇన్వెస్టర్లకు మరింత ఆకర్షణీయంగా మారతాయి. అయితే బంగారం, వెండి వంటి లోహాలు ఎలాంటి స్థిరమైన వడ్డీని లేదా రాబడిని ఇవ్వవు. అందువల్ల ఇన్వెస్టర్లు తమ పెట్టుబడులను బంగారం నుంచి మళ్లించి డాలర్, బాండ్ల వైపు తరలించడంతో పసిడికి డిమాండ్ తగ్గి ధరలు పడిపోయాయి.

అమెరికా నూతన సుంకాలు , వాణిజ్య అనిశ్చితి: అమెరికా ప్రభుత్వం తన ప్రధాన వాణిజ్య భాగస్వామ్య దేశాల నుంచి వచ్చే దిగుమతులపై కొత్తగా 10 శాతం నుండి 12.5 శాతం వరకు సుంకాలను (Tariffs) విధించింది. ఈ నిర్ణయం అంతర్జాతీయ వాణిజ్య వర్గాల్లో అనిశ్చితిని సృష్టించి, గ్లోబల్ మార్కెట్లను ఒత్తిడిలోకి నెట్టింది.

నిపుణుల విశ్లేషణ , భవిష్యత్ తీరుతెన్నులు : సాధారణంగా యుద్ధాలు లేదా భౌగోళిక వివాదాలు తలెత్తినప్పుడు సురక్షితమైన పెట్టుబడిగా భావించి బంగారాన్ని కొనుగోలు చేస్తారని.. కానీ ప్రస్తుత పరిస్థితి భిన్నంగా ఉందని మార్కెట్ నిపుణులైన కేడియా అడ్వైజరీ డైరెక్టర్ అజయ్ కేడియా అభిప్రాయపడ్డారు. రష్యా-ఉక్రెయిన్ , పశ్చిమ ఆసియా వివాదాలను మార్కెట్ ఇప్పుడు ఒక శాశ్వతమైన వాతావరణంగా స్వీకరించిందని ఆయన విశ్లేషించారు.

వడ్డీ రేట్లు పెరిగితే పసిడి పడిపోవడం సహజమే అయినా, అమెరికాలో ప్రస్తుతం ఉద్యోగావకాశాలు మందగించడాన్ని మార్కెట్ గమనిస్తోందని కేడియా తెలిపారు. ఒకవేళ ఉద్యోగాల వృద్ధి తక్కువగా ఉంటే ఫెడరల్ రిజర్వ్ భావించినంత వేగంగా వడ్డీ రేట్లను పెంచకపోవచ్చని, ఇది రాబోయే రోజుల్లో మార్కెట్లకు మళ్లీ ఊరటనిచ్చే అవకాశముందని పేర్కొన్నారు. వచ్చే వారం వెలువడే యూఎస్ ఫెడరల్ రిజర్వ్ విధాన నిర్ణయాలు మాత్రమే బంగారం, వెండి లోహాల తదుపరి భవిష్యత్ దిశను స్పష్టంగా నిర్దేశిస్తాయి.