Sai Krishna Custodial Death Case: గాదె సాయికృష్ణ కేసులో కీలక మలుపు.. సీబీఐకి అప్పగించాలని ఏపీ హైకోర్టు ఆదేశాలు..

Sai Krishna Custodial Death Case: ఆంధ్రప్రదేశ్ వ్యాప్తంగా తీవ్ర కలకలం రేపిన మార్కాపురం యువకుడు గాదె సాయికృష్ణ కస్టోడియల్ టార్చర్ , లాకప్ డెత్ కేసులో రాష్ట్ర ఉన్నత న్యాయస్థానం (AP High Court) అత్యంత సంచలన తీర్పును వెలువరించింది. ఈ కేసు సమగ్ర, నిష్పాక్షిక దర్యాప్తు కోసం విచారణ బాధ్యతలను కేంద్ర దర్యాప్తు సంస్థ (CBI)కి బదిలీ చేస్తూ శుక్రవారం ఆదేశాలు జారీ చేసింది. అంతేకాకుండా, పోలీసుల అక్రమ నిర్బంధం, చిత్రహింసల వల్ల కుమారుడిని కోల్పోయిన బాధితుడి తల్లి గాదె విజయలక్ష్మికి రూ. 25 లక్షల నష్టపరిహారాన్ని నాలుగు వారాల్లోగా చెల్లించాలని ఆంధ్రప్రదేశ్ రాష్ట్ర ప్రభుత్వాన్ని ధర్మాసనం ఆదేశించింది.

ఈ కేసు పూర్వాపరాల్లోకి వెళితే.. కొన్ని పాత నాన్-బెయిలబుల్ వారెంట్ల ఆధారంగా 25 ఏళ్ల సాయికృష్ణను 2026 మే నెలలో ప్రకాశం జిల్లా మార్కాపురం సమీపంలో టాస్క్ ఫోర్స్ పోలీసులు అదుపులోకి తీసుకున్నారు. తదనంతరం తదుపరి విచారణ నిమిత్తం విజయవాడలోని కృష్ణలంక పోలీస్ స్టేషన్‌కు తరలించారు. అయితే, నిందితుడిని అరెస్ట్ చేసిన 24 గంటల్లోగా న్యాయమూర్తి ముందు హాజరుపరచాల్సి ఉండగా, పోలీసులు ఆ ప్రక్రియను విస్మరించారు. ఆ తర్వాత నుంచి సాయికృష్ణ ఆచూకీ పూర్తిగా గల్లంతు కావడంతో, తన కుమారుడిని రక్షించాలని కోరుతూ ఆయన తల్లి విజయలక్ష్మి హైకోర్టులో ‘హెబియస్ కార్పస్’ పిటిషన్ దాఖలు చేశారు.

ఈ అంశంపై తీవ్ర ఆగ్రహం వ్యక్తం చేసిన ఉన్నత న్యాయస్థానం ఆదేశాలతో రాష్ట్ర ప్రభుత్వం ప్రత్యేక దర్యాప్తు బృందాన్ని (SIT) రంగంలోకి దింపింది. సిట్ జరిపిన సమగ్ర విచారణలో మే 6 నుంచి 8వ తేదీల మధ్య కృష్ణలంక పోలీస్ స్టేషన్ కస్టడీలో జరిగిన దారుణమైన చిత్రహింసల వల్లే సాయికృష్ణ మరణించినట్లు నిర్ధారణ అయింది. ఆపై విషయాన్ని కప్పిపుచ్చేందుకు మృతదేహాన్ని అర్ధరాత్రి వేళ ద్విచక్రవాహనంపై స్వర్గపురి శ్మశానవాటికకు తరలించి దహనం చేయడమే కాకుండా, స్టేషన్‌లోని సీసీటీవీ ఫుటేజీలను సైతం తొలగించినట్లు తేలింది. ఈ తీవ్ర ఆరోపణలపై అప్పటి సీఐ నాగరాజుతో సహా ఏడుగురు పోలీసు సిబ్బందిని అరెస్ట్ చేసి చార్జిషీట్ దాఖలు చేశారు.

అయితే, నిందితులైన పోలీసుల నుంచి కీలక సాక్ష్యాల ధ్వంసం జరిగిందని, రాష్ట్ర పోలీసు యంత్రాంగం పరిధిలోని సిట్ దర్యాప్తుపై తమకు పూర్తి నమ్మకం లేదని బాధితుడి తల్లి , ఇతర పిటిషనర్లు ఉన్నత న్యాయస్థానాన్ని ఆశ్రయించారు. గతంలో ఈ కేసు పరిణామాలను పరిశీలించిన భారత సుప్రీంకోర్టు సైతం ఎఫ్‌ఐఆర్ నమోదులో జాప్యం, న్యాయమూర్తి ముందు హాజరుపరచకపోవడంపై సీరియస్ అయింది. ఈ నేపథ్యంలో తుది విచారణ పూర్తి చేసిన ఏపీ హైకోర్టు, కస్టడీ మరణాల పట్ల సహించేది లేదని స్పష్టం చేస్తూ కేసును సీబీఐకి అప్పగిస్తూ నిష్పాక్షిక న్యాయానికి పటముట్టింది.