H1N1 Spread in India: భారత్లో స్వైన్ఫ్లూ కేసుల పెరుగుదలపై ఆందోళన.. H1N1పై కీలక ప్రకటన జారీ చేసిన ICMR
Virus
H1N1 Spread in India: దేశంలోని పలు ప్రాంతాల్లో హెచ్1ఎన్1 కేసులు నమోదవుతున్న నేపథ్యంలో ప్రజల్లో ఆందోళన వ్యక్తమవుతోంది. అయితే దీనిపై భారత వైద్య పరిశోధనా మండలి (ICMR) కీలక స్పష్టత ఇచ్చింది. ప్రస్తుతం వ్యాప్తిలో ఉన్న హెచ్1ఎన్1 కొత్త వైరస్ కాదని, 2009లో ప్రపంచవ్యాప్తంగా మహమ్మారికి కారణమైన ఇన్ఫ్లుయెంజా-ఏ హెచ్1ఎన్1 పీడీఎం09 వైరస్ ప్రస్తుతం కాలానుగుణ ఫ్లూగా కొనసాగుతోందని తెలిపింది.
ఐసీఎంఆర్ డైరెక్టర్ జనరల్ డాక్టర్ రాజీవ్ బహల్ ప్రకారం.. వైరస్లలో కాలానుగుణంగా స్వల్ప జన్యు మార్పులు చోటుచేసుకోవడం సహజమే. ఈ మార్పులను చూసి కొత్తగా మరింత ప్రమాదకరమైన వైరస్ పుట్టుకొచ్చిందని భావించాల్సిన అవసరం లేదని ఆయన స్పష్టం చేశారు. ప్రస్తుతం నమోదవుతున్న హెచ్1ఎన్1 కేసుల్లో ఎక్కువ భాగం స్వల్ప లక్షణాలతోనే తగ్గిపోతున్నాయని తెలిపారు.
హెచ్1ఎన్1 పరిస్థితిని ఐసీఎంఆర్ నిరంతరం పర్యవేక్షిస్తోంది. దేశవ్యాప్తంగా 73 ప్రత్యేక ఆసుపత్రులతో కూడిన సెంటినెల్ నిఘా వ్యవస్థ ద్వారా ప్రతి వారం శ్వాసకోశ ఇన్ఫెక్షన్ల నమూనాలను పరీక్షిస్తున్నట్లు తెలిపింది. తీవ్రమైన శ్వాసకోశ సమస్యలతో ఆసుపత్రులకు వచ్చే రోగులతో పాటు ఫ్లూ లక్షణాలు ఉన్నవారి నుంచి కూడా నమూనాలను సేకరిస్తున్నారు.
ఇక దేశవ్యాప్తంగా మరో 167 వైరస్ పరిశోధన, నిర్ధారణ ప్రయోగశాలలు కూడా వివిధ శ్వాసకోశ వైరస్లపై పరీక్షలు నిర్వహిస్తున్నాయి. హెచ్1ఎన్1తో పాటు హెచ్3ఎన్2, ఇన్ఫ్లుయెంజా-బి, కొవిడ్-19, హెచ్ఎంపీవీ, అడెనోవైరస్ వంటి వైరస్లను కూడా ఈ పరీక్షల్లో గుర్తిస్తున్నారు. ప్రస్తుతం హెచ్3ఎన్2 కేసులు సుమారు 2–3 శాతం వరకు ఉన్నట్లు ఐసీఎంఆర్ పేర్కొంది.
అయితే కొన్ని వర్గాల ప్రజలు మాత్రం ఫ్లూ విషయంలో ప్రత్యేక జాగ్రత్తలు తీసుకోవాలి. వృద్ధులు, ఐదేళ్లలోపు చిన్నారులు, గర్భిణులు, రోగనిరోధక శక్తి తక్కువగా ఉన్నవారు ఫ్లూ బారిన పడితే తీవ్ర అనారోగ్యానికి గురయ్యే అవకాశం ఉంటుంది. ముఖ్యంగా న్యుమోనియా వంటి సమస్యలు ఏర్పడే ప్రమాదం ఉన్నందున లక్షణాలు తీవ్రంగా ఉంటే వైద్యులను సంప్రదించడం అవసరం. అవసరాన్ని బట్టి వైద్యుల సూచనతో సీజనల్ ఫ్లూ వ్యాక్సిన్ తీసుకోవచ్చని ఐసీఎంఆర్ సూచించింది. అయితే స్వయంగా మందులు వాడటం కంటే వైద్యుల సలహా తీసుకోవడం మంచిది.
హెచ్1ఎన్1 ఒక వైరల్ ఇన్ఫెక్షన్ కావడంతో యాంటీబయాటిక్స్ నేరుగా వైరస్పై పనిచేయవు. అవసరమైన సందర్భాల్లో వైద్యుల పర్యవేక్షణలో యాంటీవైరల్ మందులు ఉపయోగించాల్సి ఉంటుంది. జ్వరం, దగ్గు వంటి ఫ్లూ లక్షణాలు కనిపిస్తే తగినంత విశ్రాంతి తీసుకోవడం, దగ్గేటప్పుడు నోరు–ముక్కును కప్పుకోవడం, చేతులను తరచూ శుభ్రం చేసుకోవడం, రద్దీ ప్రాంతాల్లో మాస్క్ ధరించడం వంటి జాగ్రత్తలు పాటించాలని నిపుణులు సూచిస్తున్నారు.
మొత్తంగా.. ప్రస్తుతం హెచ్1ఎన్1 కొత్త వైరస్ కాదని, 2009లో గుర్తించిన వైరస్ రూపాంతరాలతో కాలానుగుణంగా కొనసాగుతున్న ఫ్లూ అని ఐసీఎంఆర్ స్పష్టం చేసింది. కాబట్టి ప్రజలు భయాందోళనలకు గురికాకుండా, అవసరమైన జాగ్రత్తలు పాటిస్తూ ఆరోగ్య పరిస్థితిని గమనించుకోవడం ముఖ్యమని వైద్య నిపుణులు సూచిస్తున్నారు.
- Four Storms Churning at Once: ఒకేసారి నాలుగు తుపాన్లు.. 8 ఏళ్ళ తరువాత పశ్చిమ పసిఫిక్ మహాసముద్రంలో అరుదైన వాతావరణ పరిణామం..
- GO 77 Controversy: జీవో నంబర్ 77 వెంటనే రద్దు చేయండి.. సీఎం రేవంత్ రెడ్డికి లేఖ రాసిన థియేటర్ యాజమాన్యాలు..
- H1N1 Spread in India: భారత్లో స్వైన్ఫ్లూ కేసుల పెరుగుదలపై ఆందోళన.. H1N1పై కీలక ప్రకటన జారీ చేసిన ICMR
- Bihar Protest: బీహార్లో BPSC అభ్యర్థుల ఆందోళన.. వాటర్ క్యానన్లతో చెదరగొట్టిన పోలీసులు.. సీఎం ఇంటి వైపు దూసుకెళ్లిన విద్యార్థులు..
- Telangana Municipal Elections: తెలంగాణ మున్సిపల్ ఎన్నికలపై కీలక అప్డేట్.. డిసెంబర్లో నోటిఫికేషన్ వచ్చే అవకాశం..
సంబంధిత వార్తలు
