Ukraine – Russia War: ఉక్రెయిన్‌పై రష్యా క్షిపణి దాడులు…రష్యా చమురు కేంద్రాలపై ఉక్రెయిన్ డ్రోన్లతో దాడి…

రష్యా సైన్యం ఉక్రెయిన్‌లోని కీవ్‌తో పాటు పలు ప్రధాన నగరాలపై రాత్రికి రాత్రే బాలిస్టిక్ క్షిపణులతో భారీ దాడులు జరిపింది. ఈ దాడుల్లో తీవ్ర ఆస్తి, ప్రాణనష్టం సంభవించిందని ఉక్రెయిన్ ప్రకటించింది. పెరిగిన రష్యా వైమానిక దాడులను తట్టుకోవడానికి తమకు వెంటనే అదనపు గగనతల రక్షణ వ్యవస్థలను అందించాలని నాటోతో పాటు పాశ్చాత్య దేశాలకు కూడా ఉక్రెయిన్ అధ్యక్షుడు వ్లాదిమిర్ జెలెన్స్కీ విజ్ఞప్తి చేశారు.

కాగా, ఉక్రెయిన్ బలగాలు రష్యా సరిహద్దులకు చాలా దూరంలో ఉన్న చమురు శుద్ధి కర్మాగారాలపై రాత్రికి రాత్రే డ్రోన్లతో దాడులు చేశాయి. రష్యా యుద్ధ ఆధారిత ఆర్థిక వ్యవస్థను దెబ్బతీయడంతో పాటు క్రెమ్లిన్‌పై ఒత్తిడి పెంచడమే లక్ష్యంగా ఈ దాడులు జరిగినట్టు జెలెన్స్కీ ధ్రువీకరించారు. ఫ్రంట్‌లైన్‌కు దాదాపు 1,300 కిలోమీటర్ల దూరంలో ఉన్న బాష్కార్టోస్తాన్, యారోస్లావ్ ప్రాంతాల్లోని రిఫైనరీలతో పాటు నల్ల సముద్రంలో రష్యా మిలిటరీ పట్రోలింగ్ పడవలు, షాడో ఫ్లీట్ నౌకలపై కూడా దాడులు చేశామని ఆయన తెలిపారు.

మరోవైపు తమ భూభాగంపైకి వచ్చిన 605 ఉక్రెయిన్ డ్రోన్లను కూల్చివేశామని రష్యా రక్షణ మంత్రిత్వ శాఖ వెల్లడించింది. అదే సమయంలో రష్యా ప్రయోగించిన గ్లైడ్ బాంబులు, క్షిపణి దాడుల కారణంగా ఉక్రెయిన్‌లోని ఖార్కివ్, సుమీ, ఖేర్సన్ ప్రాంతాల్లో ముగ్గురు పౌరులు మరణించగా, 22 మంది గాయపడ్డారు.

ప్రస్తుతం రష్యా తీవ్రమైన బాలిస్టిక్ క్షిపణి దాడులు కొనసాగిస్తుండడంతో, ఉక్రెయిన్ వద్ద గగనతల రక్షణ వ్యవస్థల కొరత ఏర్పడింది. వీటిని అడ్డుకోవడానికి అవసరమైన పేట్రియట్ వంటి ఇంటర్‌సెప్టర్ క్షిపణులను అత్యవసరంగా సరఫరా చేయాలని జెలెన్స్కీ కోరుతున్నారు. ఉక్రెయిన్ నిరోధక శక్తిని క్రమంగా క్షీణింపజేయాలని రష్యా భావిస్తున్న తరుణంలో ఈ ఆయుధాల సరఫరా అత్యంత కీలకమని ఆయన నొక్కిచెప్పారు.

దాడి, ప్రతిదాడులు కొనసాగుతున్న కారణంగా, రష్యా-ఉక్రెయిన్ మధ్య శాంతి స్థాపన సాధ్యం కావడం లేదని పరిశీలకుల అభిప్రాయం.

ఇదిలావుంటే, జర్మనీలోని లైప్‌జిగ్ విమానాశ్రయంలో ఉక్రెయిన్‌కు చెందిన విమానాలు నిలిపి ఉంచిన స్థలానికి సమీపంలో పేలుడు పదార్థాలతో నిండి ఉన్న ఒక డ్రోన్‌ను జర్మన్ అధికారులు గుర్తించారు. తక్షణమే స్పందించిన భద్రతా బలగాలు ఆ డ్రోన్ డిటోనేటర్‌ను తొలగించడంతో పెద్ద ప్రమాదం తప్పింది.

ఈ ఘటనపై తీవ్రంగా స్పందించిన జర్మనీ హోంశాఖ అధికారులు, ఇది తమ దేశ భద్రతకు అత్యంత ప్రమాదకరమైన కొత్త స్థాయి సవాలని పేర్కొన్నారు. రష్యా-ఉక్రెయిన్ యుద్ధం కేవలం సరిహద్దులకే పరిమితం కాకుండా, ఐరోపా సమాఖ్య దేశాల భద్రతకు తీవ్ర ముప్పుగా మారుతోందని ఈ ఘటనలు స్పష్టం చేస్తున్నాయి.