England vs India: రోహిత్ శర్మ సెంచరీ వృథా..మూడో వన్డేలో 27 పరుగుల తేడాతో భారత్ ఓటమి.. సిరీస్ను కైవసం చేసుకున్న ఇంగ్లండ్
England Beat India by 27 Runs in London to Seal ODI Series 2-1
England vs India: టీమిండియా స్టార్ ఓపెనర్ రోహిత్ శర్మ తన ఫామ్పై వస్తున్న విమర్శలకు ఒక్క ఇన్నింగ్స్తోనే సమాధానం చెప్పాడు. లార్డ్స్ వేదికగా జరిగిన మూడో వన్డేలో 39 ఏళ్ల రోహిత్ 110 బంతుల్లో 138 పరుగులు (17 ఫోర్లు, 5 సిక్సర్లు) చేసి వన్డేల్లో తన 34వ శతకాన్ని నమోదు చేశాడు. కెప్టెన్ శుభ్మన్ గిల్ (77), విరాట్ కోహ్లీ (74) కూడా అద్భుతంగా రాణించినప్పటికీ, భారీ లక్ష్యాన్ని ఛేదించే క్రమంలో భారత్ 27 పరుగుల తేడాతో ఓటమిపాలైంది. దీంతో మూడు మ్యాచ్ల వన్డే సిరీస్ను ఇంగ్లండ్ 2-1తో కైవసం చేసుకుంది.
388 పరుగుల భారీ లక్ష్యంతో బరిలోకి దిగిన భారత్కు తొలి ఓవర్లలో ఇంగ్లండ్ పేసర్లు కట్టుదిట్టంగా బౌలింగ్ చేశారు. తొలి ఐదు ఓవర్లలో భారత్ 17 పరుగులకే పరిమితమైంది. అయితే జోష్ టంగ్ వేసిన ఎనిమిదో ఓవర్లో రెండు ఫోర్లు, ఒక సిక్సర్తో రోహిత్ దూకుడు పెంచాడు. మరోవైపు శుభ్మన్ గిల్ కూడా ఆకట్టుకునే బ్యాటింగ్తో తొలి వికెట్కు 147 పరుగుల భాగస్వామ్యాన్ని నెలకొల్పాడు. గిల్ అవుటైన తర్వాత విరాట్ కోహ్లీతో కలిసి రోహిత్ ఇన్నింగ్స్ను చక్కగా ముందుకు నడిపించాడు. ఆదిల్ రషీద్ బౌలింగ్లో బౌండరీ కొట్టి తన 34వ వన్డే సెంచరీ పూర్తి చేశాడు.
రోహిత్-కోహ్లీ జోడీ రెండో వికెట్కు 113 పరుగులు జోడించి మ్యాచ్ను భారత్ వైపు తిప్పే ప్రయత్నం చేసింది. అయితే 138 పరుగుల వద్ద జాకబ్ బెథెల్ బౌలింగ్లో రోహిత్ బౌల్డ్ కావడంతో మ్యాచ్ మలుపు తిరిగింది. చివరి 10 ఓవర్లలో 121 పరుగులు అవసరమైన సమయంలో విరాట్ కోహ్లీ వరుస బౌండరీలు, సిక్సర్లతో ఆశలు రేకెత్తించాడు. కానీ సామ్ కరన్ అద్భుత బౌలింగ్తో మ్యాచ్ను ఇంగ్లండ్ వైపు మళ్లించాడు. 44వ ఓవర్లో ఇషాన్ కిషన్ (14), శ్రేయస్ అయ్యర్ (0)లను పెవిలియన్కు పంపిన కరన్, తర్వాతి ఓవర్లోనే కోహ్లీ (74) వికెట్ కూడా తీశాడు. అనంతరం కేఎల్ రాహుల్ (12), అక్షర్ పటేల్ (2) త్వరగా అవుట్ కావడంతో భారత్ 50 ఓవర్లలో 360/7కే పరిమితమైంది.
టాస్ ఓడి తొలుత బ్యాటింగ్ చేసిన ఇంగ్లండ్ భారత బౌలింగ్పై పూర్తి ఆధిపత్యం చెలాయించింది. జస్ప్రీత్ బుమ్రా గాయం కారణంగా దూరం కావడం భారత బౌలింగ్పై ప్రభావం చూపింది. ఓపెనర్లు బెన్ డకెట్ (141), జాకబ్ బెథెల్ (91) తొలి వికెట్కు 192 పరుగులు జోడించి జట్టుకు అద్భుత ఆరంభం అందించారు. అనంతరం జో రూట్ (74 నాటౌట్) వరుసగా మూడో అర్ధశతకం నమోదు చేయగా, కెప్టెన్ జోస్ బట్లర్ కేవలం 13 బంతుల్లో 41 నాటౌట్ పరుగులతో చెలరేగాడు. దీంతో ఇంగ్లండ్ 50 ఓవర్లలో 387/3 పరుగుల భారీ స్కోరు సాధించింది. ఇది లార్డ్స్ మైదానంలో నమోదైన అత్యధిక వన్డే స్కోరుగా నిలిచింది. భారత్ బౌలర్లలో ప్రసిద్ధ్ కృష్ణ రెండు వికెట్లు తీశాడు. జాకబ్ బెథెల్కు ‘ప్లేయర్ ఆఫ్ ద మ్యాచ్’ అవార్డు దక్కగా, జో రూట్ ‘ప్లేయర్ ఆఫ్ ద సిరీస్’గా ఎంపికయ్యాడు.
సంక్షిప్త స్కోర్లు
ఇంగ్లండ్: 50 ఓవర్లలో 387/3
(బెన్ డకెట్ 141, జాకబ్ బెథెల్ 91, జో రూట్ 74 నాటౌట్; ప్రసిద్ధ్ కృష్ణ 2/69)
భారత్: 50 ఓవర్లలో 360/7
(రోహిత్ శర్మ 138, శుభ్మన్ గిల్ 77, విరాట్ కోహ్లీ 74; సామ్ కరన్ 4/75)
సంబంధిత వార్తలు
