Telangana Power Cuts: తెలంగాణలో పవర్ కట్స్‌పై రేవంత్ రెడ్డి ఫైర్.. నిర్లక్ష్యం వహిస్తే సస్పెన్షన్లకు వెనుకాడనని అధికారులకు కీలక హెచ్చరిక
CM Revanth Reddy’s Key Message at Tungabhadra Brings New Hope for Farmers of Three States
Telangana Power Cuts: తెలంగాణ వ్యాప్తంగా ఇటీవల తరచూ ఎదురవుతున్న అస్పష్ట విద్యుత్ అంతరాయాలు, సరఫరా లోపాలపై ముఖ్యమంత్రి ఎ. రేవంత్ రెడ్డి తీవ్ర ఆగ్రహం వ్యక్తం చేశారు. విద్యుత్ శాఖ ఉన్నతాధికారుల నిర్లక్ష్య వైఖరిపై సచివాలయంలో బుధవారం నిర్వహించిన ఉన్నత స్థాయి సమీక్షా సమావేశంలో ఆయన నిప్పులు చెరిగారు. ప్రజలకు నిరంతర విద్యుత్ అందించాలని ఎన్నిసార్లు కఠిన ఆదేశాలు జారీ చేసినప్పటికీ అధికారుల తీరులో మార్పు రాకపోవడంపై తీవ్ర అసహనాన్ని వ్యక్తం చేసిన సీఎం, ఇకపై బాధ్యతారాహిత్యాన్ని ఏమాత్రం సహించేది లేదని స్పష్టం చేశారు. పనితీరు మార్చుకోకపోతే ఉన్నత స్థాయి అధికారులను సైతం సస్పెండ్ చేయడానికి వెనుకాడబోనని గట్టి హెచ్చరికలు జారీ చేశారు.
ఈ సమీక్షా సమావేశంలో సీఎం రేవంత్ రెడ్డి మాట్లాడుతూ, భవిష్యత్తులో ఏర్పడే విద్యుత్ డిమాండ్‌కు అనుగుణంగా ఉత్పత్తిని పెంచడంలో అధికారులు ఘోరంగా విఫలమవుతున్నారని మండిపడ్డారు. నైనీ , మహానది బొగ్గు గనుల నుంచి రాష్ట్ర విద్యుత్ ఉత్పత్తి కేంద్రాలకు తగినంత బొగ్గు సరఫరా లింకేజీలు అందుబాటులో ఉన్నప్పటికీ, థర్మల్ కేంద్రాల్లో పూర్తిస్థాయి ఉత్పత్తి ఎందుకు జరగడం లేదని నిలదీశారు. పదేపదే హెచ్చరించినా అధికారుల్లో చలనం రాకపోవడంపై ఆగ్రహం వ్యక్తం చేస్తూ, ఈ పరిస్థితి ఇలాగే కొనసాగితే స్పెషల్ చీఫ్ సెక్రటరీ, జెన్‌కో (GENCO) సీఎండీ స్థాయి అధికారులపైనా కఠిన చర్యలు తీసుకుంటామని హెచ్చరించారు. విద్యుత్ అంతరాయాలకు దారితీసిన పరిస్థితులపై తక్షణమే పూర్తిస్థాయి నివేదికను సమర్పించాలని, యుద్ధప్రాతిపదికన సరఫరాను పునరుద్ధరించాలని ఆదేశించారు.
మరో కీలక పరిణామంలో, యునైటెడ్ కింగ్‌డమ్ (యూకే) దేశానికి చెందిన ప్రముఖ నగరాల మేయర్లతో కూడిన ఉన్నత స్థాయి ప్రతినిధి బృందం ఎంసీఆర్ హెచ్‌ఆర్‌డీ (MCR HRD) ఇన్సిస్టిట్యూట్‌లో ముఖ్యమంత్రి రేవంత్ రెడ్డిని మర్యాదపూర్వకంగా కలిసింది. సౌత్ యార్క్‌షైర్ మేయర్ ఒలివర్ కాపర్డ్ నేతృత్వంలోని ఈ ప్రతినిధి బృందంతో జరిగిన సమావేశంలో రాష్ట్రంలో విస్తృత పెట్టుబడుల అవకాశాలపై సుదీర్ఘంగా చర్చించారు. ప్రత్యేకించి హెల్త్‌కేర్, డిజిటల్ టెక్నాలజీ, ఏరోస్పేస్ అండ్ డిఫెన్స్, టెక్స్‌టైల్స్, విద్య పరిశోధన , తయారీ రంగాలలో నూతన పరిశ్రమల స్థాపనకు ఉన్న అనుకూలతలను సీఎం వారికి వివరించారు. రాష్ట్రంలో పారిశ్రామిక రంగానికి నిలకడైన విధానాలు, నైపుణ్యం కలిగిన మానవ వనరులు లభ్యమవుతాయని నొక్కి చెప్పారు.
ఈ సదస్సు సందర్భంగా “యూకే-ఇండియా సిఈటిఏ అండ్ రీజనల్ సినర్జీస్” (UK-India CETA) పేరిట యూకే-ఇండియా బిజినెస్ కౌన్సిల్ రూపొందించిన ప్రత్యేక నివేదికను సీఎం రేవంత్ రెడ్డి ఆవిష్కరించారు. ఈ సమావేశంలో ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు, ప్రభుత్వ ముఖ్య కార్యదర్శి సంజయ్ జాజు కూడా పాల్గొన్నారు. అనంతరం ఈ ఏడాది డిసెంబర్ 7 నుంచి 9 వరకు తెలంగాణ ప్రభుత్వం ప్రతిష్టాత్మకంగా నిర్మిస్తున్న భారత్ ఫ్యూచర్ సిటీలో జరగనున్న “ఇన్వెస్ట్ తెలంగాణ గ్లోబల్ సమ్మిట్ 2026” (Invest Telangana Global Summit 2026)కు ముఖ్య అతిథులుగా హాజరు కావాలని, బ్రిటన్ పారిశ్రామికవేత్తలను ఆకర్షించేందుకు సహకరించాలని యూకే ప్రతినిధులను ముఖ్యమంత్రి ఆహ్వానించారు.
సంబంధిత వార్తలు
