Rice Price: సన్నబియ్యం సరఫరాలో అక్రమాల ఆరోపణలు.. ఐదుగురు రైస్ మిల్లర్లను అదుపులోకి తీసుకున్న సీఐడీ

Rice Price: తెలంగాణలో కస్టమ్ మిల్లింగ్ రైస్ (సీఎంఆర్) సరఫరాకు సంబంధించిన వ్యవహారం మరోసారి చర్చనీయాంశంగా మారింది. ప్రభుత్వానికి అందించాల్సిన ధాన్యాన్ని పక్కదారి పట్టించడం, బియ్యం సరఫరాలో నిబంధనలు ఉల్లంఘించారనే ఆరోపణలపై సీఐడీ అధికారులు దర్యాప్తును ముమ్మరం చేశారు. ఈ క్రమంలో ములుగు జిల్లాకు చెందిన ఐదుగురు రైస్ మిల్లర్లను అదుపులోకి తీసుకుని వరంగల్‌లోని సీఐడీ కార్యాలయానికి తరలించారు.

ములుగు జిల్లాకు చెందిన ఐదుగురు మిల్లర్లు అదుపులోకి

సీఐడీ అదుపులోకి తీసుకున్న వారిలో ములుగు జిల్లా రైస్ మిల్లర్స్ అసోసియేషన్ అధ్యక్షుడు, బాదం, శ్రీమాత రైస్ మిల్లుల యజమాని బాదం ప్రవీణ్, లేపాక్షి రైస్ మిల్లు యజమాని మోహన్, సాయిరాం రైస్ మిల్లు యజమాని రఘోత్తమ్, వాసవి రైస్ మిల్లు యజమాని శ్రవణ్, ఎల్‌ఎస్‌ఆర్ రైస్ మిల్లు యజమాని హరినాథ్ ఉన్నారు.

ప్రభుత్వానికి తిరిగి అప్పగించాల్సిన సీఎంఆర్ ధాన్యం విషయంలో అవకతవకలు జరిగాయనే ఆరోపణలు వీరిపై ఉన్నాయి. మిల్లింగ్‌కు కేటాయించిన ధాన్యాన్ని సొంత అవసరాలకు వినియోగించడంతో పాటు, ప్రభుత్వానికి చెల్లించాల్సిన బకాయిలు భారీగా పేరుకుపోయినట్లు అధికారులు అనుమానిస్తున్నారు. ఈ నేపథ్యంలో గతంలోనే కొందరు మిల్లర్లకు నోటీసులు జారీ చేసినట్లు సమాచారం.

ఎఫ్‌సీఐకి బియ్యం సరఫరాపై విచారణ

ఫుడ్ కార్పొరేషన్ ఆఫ్ ఇండియా (ఎఫ్‌సీఐ)కి నిబంధనలకు అనుగుణమైన సన్నబియ్యం బదులుగా దొడ్డు బియ్యం సరఫరా చేశారనే ఆరోపణలు ఈ కేసులో కీలకంగా మారాయి. ఈ వ్యవహారంపై 2025-26 ఖరీఫ్ సీజన్‌కు సంబంధించి ధాన్యం కేటాయింపులు, మిల్లింగ్ ప్రక్రియ, బియ్యం సరఫరా వివరాలను సీఐడీ అధికారులు పరిశీలిస్తున్నారు.

నిజామాబాద్, కరీంనగర్, ములుగు జిల్లాల్లోని 16 రైస్ మిల్లుల నుంచి 3,385.820 మెట్రిక్ టన్నుల దొడ్డు బియ్యం సరఫరా చేసినట్లు అధికారులు గుర్తించినట్లు సమాచారం. ఈ వ్యవహారంలో బోనస్ చెల్లింపుల రూపంలో ప్రభుత్వానికి సుమారు రూ.1.69 కోట్ల మేర నష్టం వాటిల్లినట్లు ప్రాథమికంగా అంచనా వేసినట్లు తెలుస్తోంది.

రూ.242 కోట్ల ఆర్థిక ప్రభావంపై ఆరా

మరోవైపు, సంబంధిత మిల్లులకు 45,414.833 మెట్రిక్ టన్నుల ధాన్యాన్ని మిల్లింగ్ కోసం కేటాయించినట్లు అధికారులు గుర్తించారు. ఈ కేటాయింపులకు సంబంధించిన బోనస్ చెల్లింపుల వల్ల ప్రభుత్వంపై సుమారు రూ.242 కోట్ల మేర ఆర్థిక ప్రభావం పడే అవకాశం ఉందని అధికారులు పేర్కొన్నట్లు సమాచారం.

ధాన్యం కేటాయింపుల నుంచి బియ్యం తిరిగి అప్పగించే వరకు జరిగిన లావాదేవీలు, సరఫరా చేసిన బియ్యం రకం, బకాయిల వివరాలను దర్యాప్తు బృందాలు పరిశీలిస్తున్నాయి. అయితే, ప్రాథమిక అంచనాలు, ఆరోపణలపై తుది నిర్ధారణ దర్యాప్తు పూర్తయిన తర్వాతే వెలువడనుంది.

మిల్లర్లతో పాటు అధికారుల పాత్రపైనా దర్యాప్తు

ఈ వ్యవహారంలో రైస్ మిల్లర్ల పాత్రకే పరిమితం కాకుండా, ధాన్యం కేటాయింపులు, నాణ్యత తనిఖీలు, బియ్యం స్వీకరణ వంటి ప్రక్రియల్లో సంబంధిత అధికారుల ప్రమేయం ఉందా అనే కోణంలోనూ సీఐడీ విచారణ కొనసాగిస్తున్నట్లు సమాచారం.

ప్రభుత్వానికి ఆర్థిక నష్టం కలిగించేలా ఎవరైనా వ్యవహరించారా? నిబంధనల ఉల్లంఘనలకు ఇతరుల సహకారం ఉందా? అనే అంశాలపై అధికారులు ఆధారాలు సేకరిస్తున్నారు. దర్యాప్తులో వెల్లడయ్యే అంశాల ఆధారంగా తదుపరి చర్యలు తీసుకునే అవకాశం ఉంది.