Invest Telangana Global Summit 2026: తెలంగాణ గ్లోబల్ సమ్మిట్ మరో పండుగ లాంటిది.. కేంద్ర మంత్రి పీయూష్ గోయల్ కీలక వ్యాఖ్యలు

Invest Telangana Global Summit 2026: భారత్‌ను 2047 నాటికి అభివృద్ధి చెందిన దేశంగా తీర్చిదిద్దాలంటే ప్రతి ఒక్కరూ తమ వంతు కృషి చేయాలని కేంద్ర వాణిజ్య, పరిశ్రమల శాఖ మంత్రి పీయూష్ గోయల్ పిలుపునిచ్చారు. దేశ ఆర్థికాభివృద్ధిలో భాగస్వాములు కావాలని పారిశ్రామికవేత్తలు, వ్యాపార రంగ ప్రతినిధులకు సూచించారు. తెలంగాణలో పెట్టుబడులను ప్రోత్సహించే లక్ష్యంతో నిర్వహిస్తున్న గ్లోబల్ సమ్మిట్‌ను ఆయన స్వాగతించారు.

ఢిల్లీలో జరిగిన ఇన్వెస్ట్ తెలంగాణ గ్లోబల్ సమ్మిట్‌–2026 కర్టెన్ రైజర్ కార్యక్రమంలో పీయూష్ గోయల్ మాట్లాడారు. ఈ కార్యక్రమానికి తెలంగాణ ముఖ్యమంత్రి రేవంత్‌రెడ్డితో పాటు మంత్రులు శ్రీధర్ బాబు, వివేక్ వెంకటస్వామి, పలువురు పారిశ్రామికవేత్తలు, పరిశ్రమల ప్రతినిధులు హాజరయ్యారు.

తెలంగాణ గ్లోబల్ సమ్మిట్‌తో మరో పండుగ

దేశంలో దసరా, కర్వా చౌత్, దీపావళి పండుగల సందడి కొనసాగుతోందని పీయూష్ గోయల్ పేర్కొన్నారు. ఈ సమయంలో తెలంగాణ గ్లోబల్ సమ్మిట్ రూపంలో మరో పండుగ వచ్చినట్లుగా ఉందని వ్యాఖ్యానించారు. రాష్ట్రంలో పెట్టుబడులకు ఉన్న అవకాశాలను ప్రపంచానికి పరిచయం చేయడంలో ఈ సదస్సు కీలక పాత్ర పోషిస్తుందని ఆయన అభిప్రాయపడ్డారు.

700 ఏళ్ల క్రితమే వాణిజ్యంపై ప్రత్యేక దృష్టి

తెలంగాణకు వాణిజ్య రంగంలో సుదీర్ఘ చరిత్ర ఉందని కేంద్ర మంత్రి గుర్తుచేశారు. సుమారు 700 ఏళ్ల క్రితం కాకతీయ గణపతి చక్రవర్తి కాలంలో మోటుపల్లి శాసనం ద్వారా నౌకా వాణిజ్యానికి సంబంధించిన అంశాలను ప్రస్తావించారు.

ఆ కాలంలోనే వ్యాపారులు తమ పెట్టుబడులకు భద్రత, విధానాల్లో స్థిరత్వం కోరుకునేవారని పీయూష్ గోయల్ వివరించారు. నేటి పారిశ్రామికవేత్తలు కూడా పెట్టుబడులకు రక్షణ, స్పష్టమైన విధానాలు, వ్యాపారానికి అనుకూలమైన పరిస్థితులను ఆశిస్తున్నారని పేర్కొన్నారు.

ప్రపంచంలోనే ప్రముఖ ఆర్థిక వ్యవస్థల్లో భారత్

ప్రధాని నరేంద్ర మోదీ నాయకత్వంలో భారత్ ప్రపంచంలోని ఐదు అతిపెద్ద ఆర్థిక వ్యవస్థల్లో ఒకటిగా ఎదిగిందని పీయూష్ గోయల్ తెలిపారు. దేశ ఆర్థిక వ్యవస్థ అంచనాలకు మించి వృద్ధి సాధిస్తోందని చెప్పారు.

అంతర్జాతీయంగా మధ్య ఆసియా సంక్షోభం వంటి సవాళ్లు ఎదురవుతున్నప్పటికీ, భారత్ ఎగుమతులను పెంచగలిగిందని పేర్కొన్నారు. సంప్రదాయ అంచనాలను అధిగమిస్తూ దేశం ఆర్థిక రంగంలో ముందుకు సాగుతోందని వివరించారు.

తెలంగాణ ఆర్థిక లక్ష్యంపై ప్రశంసలు

2047 నాటికి తెలంగాణను మూడు ట్రిలియన్ డాలర్ల ఆర్థిక వ్యవస్థగా తీర్చిదిద్దాలన్న ముఖ్యమంత్రి రేవంత్‌రెడ్డి లక్ష్యాన్ని పీయూష్ గోయల్ స్వాగతించారు. రాష్ట్ర అభివృద్ధికి పెట్టుబడులు, పరిశ్రమల విస్తరణ కీలకమని ఈ సందర్భంగా ఆయన అభిప్రాయపడ్డారు.

దేశం మొత్తం అభివృద్ధి సాధించాలంటే రాష్ట్రాలు కూడా ఆర్థికంగా బలోపేతం కావాలని, ఇందుకోసం ప్రభుత్వాలు, పారిశ్రామికవేత్తలు కలిసి పనిచేయాలని కేంద్ర మంత్రి పిలుపునిచ్చారు. ‘వికసిత్ భారత్ 2047’ లక్ష్య సాధనలో ప్రతి భారతీయుడికి భాగస్వామ్యం ఉందని స్పష్టం చేశారు.