Rahul Gandhi’s Petition on SIR: రాహుల్ గాంధీ పిటిషన్‌పై సుప్రీంకోర్టు స్పందన.. ఈసీ, ప్రధాన ఎన్నికల కమిషనర్‌కు నోటీసులు..
Supreme Court Directs Meenakshi Natarajan to Seek Relief from Election Commission
Rahul Gandhi’s Petition on SIR: దేశవ్యాప్తంగా సాగుతున్న ఓటర్ల జాబితా ప్రత్యేక సమగ్ర సవరణ (SIR) ప్రక్రియలో భారీగా అక్రమాలు, ఏకపక్షంగా ఓట్ల తొలగింపులు జరిగాయంటూ ప్రతిపక్షాలు దాఖలు చేసిన పిటిషన్‌పై భారత అత్యున్నత న్యాయస్థానం సుప్రీంకోర్టు తీవ్రంగా స్పందించింది. ప్రతిపక్ష నాయకుడు రాహుల్ గాంధీ , ప్రతిపక్ష కూటమికి చెందిన ఇతర సీనియర్ నాయకులు సంయుక్తంగా దాఖలు చేసిన ఈ సంచలన పిటిషన్‌ను విచారణకు స్వీకరించిన ధర్మాసనం.. ఈ వ్యవహారంపై పూర్తిస్థాయి సమాధానం ఇవ్వాలని కోరుతూ కేంద్ర ఎన్నికల సంఘం (ECI), ప్రధాన ఎన్నికల కమిషనర్ (CEC) జ్ఞానేష్ కుమార్ , ఇద్దరు ఎన్నికల కమిషనర్లకు అధికారికంగా నోటీసులు జారీ చేసింది.
జస్టిస్ సూర్యకాంత్ , జస్టిస్ జాయ్‌మాల్య బాగ్చితో కూడిన ద్విసభ్య ధర్మాసనం గురువారం ఈ కీలక పిటిషన్‌పై విచారణ చేపట్టింది. ఎన్నికల వ్యవస్థలో పారదర్శకత, ఓటర్ల రాజ్యాంగ హక్కుల పరిరక్షణ అత్యంత కీలకమని భావించిన కోర్టు, ఈ పిటిషన్‌లో లేవనెత్తిన తీవ్రమైన అంశాలపై సీఈసీ స్పందనను కోరింది. ప్రత్యేక సమగ్ర సవరణ ప్రక్రియ ప్రారంభమైనప్పటి నుంచి జరిపిన ఓట్ల తొలగింపులు, మార్పులపై స్వతంత్ర సంస్థతో ఆడిట్ నిర్వహించాలని ప్రతిపక్ష నేతలు న్యాయస్థానాన్ని కోరారు. ఇందుకోసం సుప్రీంకోర్టు రిటైర్డ్ న్యాయమూర్తి నేతృత్వంలో సాంకేతిక నిపుణులు, పౌర సమాజ ప్రతినిధులతో కూడిన స్వతంత్ర పర్యవేక్షణ కమిటీని ఏర్పాటు చేయాలని విజ్ఞప్తి చేశారు.
ఈ పిటిషన్‌లో ప్రతిపక్ష నేతలు పలు కీలక విన్నపాలను ధర్మాసనం ముందుంచారు. ఏ ఒక్క అర్హత గల ఓటరునూ ముందస్తు నోటీసు ఇవ్వకుండా, అలాగే వారి వివరణ లేదా వాదనను వినే అవకాశం కల్పించకుండా ఏకపక్షంగా ఓటర్ల జాబితా నుంచి తొలగించకుండా స్పష్టమైన ఆదేశాలు ఇవ్వాలని కోరారు. పంజాబ్‌తో పాటు త్వరలో శాసనసభ ఎన్నికలు జరగనున్న ఇతర రాష్ట్రాల్లో చట్టం అనుమతించిన చివరి తేదీ వరకు అర్హులైన పౌరులందరికీ తమ పేర్లను నమోదు చేసుకునే వెసులుబాటు కల్పించాలని అభ్యర్థించారు.
పిటిషన్‌పై తుది తీర్పు వెలువడే వరకు ప్రస్తుతం దేశవ్యాప్తంగా సాగుతున్న ఎస్ఐఆర్ ప్రక్రియపై తాత్కాలిక స్టే విధించి, అన్ని పనులను నిలిపివేయాలని కోర్టును వేడుకున్నారు. కాంగ్రెస్ నేత రాహుల్ గాంధీతో పాటు కాంగ్రెస్ అధ్యక్షుడు మల్లికార్జున ఖర్గే, సమాజ్‌వాదీ పార్టీ అధినేత అఖిలేష్ యాదవ్, ఆర్జేడీ నేత తేజస్వి ప్రసాద్ యాదవ్, సౌగతా రాయ్, సుప్రియా సూలే, సంజయ్ రౌత్, డీ. రాజా వంటి అగ్రనేతలు ఈ పిటిషన్‌లో సహ-పిటిషనర్లుగా ఉన్నారు.
అదే సమయంలో, ఢిల్లీలోని జంతర్ మంతర్ వద్ద నిరసనలు తెలిపే హక్కును పరిమితం చేయడంపై దాఖలైన పిటిషన్‌ను కూడా ధర్మాసనం విచారించింది. జంతర్ మంతర్‌ను నిరసన ప్రదేశంగా గుర్తించిన హోదాను తొలగించడాన్ని సవాలు చేస్తూ స్వాతి సింగ్ దాఖలు చేసిన పిటిషన్‌పై స్పందించిన సుప్రీంకోర్టు, సంబంధిత అధికారులకు నోటీసులు జారీ చేసింది. అక్టోబర్ 10న ఢిల్లీలో ప్రధాన ఎన్నికల కమిషనర్ జ్ఞానేష్ కుమార్‌కు వ్యతిరేకంగా ప్రతిపక్షాలు చేపట్టిన భారీ ఆందోళనల సందర్భంగా సుప్రీంకోర్టు ప్రాంగణం, సమీప మెట్రో స్టేషన్ల మూసివేత , ట్రాఫిక్ నిలిచిపోవడంపై నమోదైన ఇతర పిటిషన్లను కూడా పరిగణనలోకి తీసుకున్న కోర్టు, సుప్రీంకోర్టు పరిసర ప్రాంతాల్లోని సీసీటీవీ (CCTV) దృశ్యాలను భద్రపరచాలని పోలీసులకు ఆదేశాలు జారీ చేసింది.
సంబంధిత వార్తలు
