CJP Protest: వీడియో ఇదిగో.. అభిజీత్ దీప్కేపై ఇంక్ చల్లిన మహిళ.. జంతర్మంతర్ వద్ద తీవ్ర ఉద్రిక్తత.. ఆసుపత్రికి సోనం వాంగ్చుక్
CJP Protest: వీడియో ఇదిగో.. అభిజీత్ దీప్కేపై ఇంక్ చల్లిన మహిళ.. జంతర్మంతర్ వద్ద తీవ్ర ఉద్రిక్తత.. ఆసుపత్రికి సోనం వాంగ్చుక్
CJP Protest: న్యూఢిల్లీలోని జంతర్మంతర్ నిరసన వేదిక వద్ద శనివారం తీవ్ర ఉద్రిక్తత పరిస్థితులు చోటుచేసుకున్నాయి. నీట్ (NEET) పరీక్ష అక్రమాలపై కాక్రోచ్ జనతా పార్టీ (CJP) నేతృత్వంలో జరుగుతున్న నిరసనలో భాగంగా, ఆ పార్టీ వ్యవస్థాపకుడు అభిజీత్ దీప్కేపై ఒక మహిళ ఇంక్ (సిరా) చల్లడంతో అక్కడ ఒక్కసారిగా గందరగోళం నెలకొంది. దీప్కే ఉదయం నుంచి నిరాహార దీక్ష చేస్తూ, మధ్యాహ్న సమయంలో నిరసనకారులను ఉద్దేశించి ప్రసంగిస్తుండగా ఈ ఘటన జరిగింది. సదరు మహిళ హఠాత్తుగా ముందుకు వచ్చి ఆయనపై సిరా లాంటి ద్రవాన్ని విసరడంతో వెంటనే అప్రమత్తమైన పోలీసులు ఆమెను అదుపులోకి తీసుకుని విచారణ జరుపుతున్నారు.
మరోవైపు, ఈ పోరాటానికి మద్దతుగా గత 20 రోజులుగా జంతర్మంతర్లో ఆమరణ నిరాహార దీక్ష చేస్తున్న ప్రముఖ సామాజిక కార్యకర్త సోనం వాంగ్చుక్ ఆరోగ్య పరిస్థితి తీవ్రంగా క్షీణించింది. జూన్ 28 నుంచి నిరవధిక దీక్షలో ఉన్న ఆయన ఇప్పటికే దాదాపు 9.5 కిలోల బరువు తగ్గినట్లు వైద్యులు వెల్లడించారు. ప్రాణాపాయ స్థితికి చేరుకోవడంతో ఢిల్లీ హైకోర్టు ఆదేశాలు, వైద్య నిపుణుల అత్యవసర సూచనల మేరకు శనివారం తెల్లవారుజామునే ఢిల్లీ పోలీసులు ఆయనను బలవంతంగా సఫ్దర్జంగ్ ఆస్పత్రికి తరలించారు.
ఆ సమయంలో నిరసనకారులు పోలీసుల చర్యను అడ్డుకోవడానికి ప్రయత్నించడంతో ఇరువర్గాల మధ్య తోపులాట జరిగి ఉద్రిక్తతకు దారితీసింది. శాంతియుతంగా నిరసన తెలుపుతున్న వాంగ్చుక్ను పోలీసులు అక్రమంగా తరలించారని సీజేపీ నాయకులు తీవ్ర అభ్యంతరం వ్యక్తం చేస్తున్నారు. ప్రస్తుతం జంతర్మంతర్ వద్ద భారీగా పోలీసు బలగాలను మోహరించారు.
సంబంధిత వార్తలు
