CEC Gyanesh Kumar Row: సీఈసీని కాపాడేందుకే ఇదంతా.. ‘ఒకే దేశం, ఒకే పార్టీ’ అజెండా ఉందంటూ కేంద్రంపై అభిజిత్ దీప్కే సంచలన ఆరోపణలు..

CEC Gyanesh Kumar Row: ప్రధాన ఎన్నికల కమిషనర్ (సీఈసీ) జ్ఞానేష్ కుమార్‌ను కాపాడేందుకు ప్రధానమంత్రి నరేంద్ర మోదీ నేతృత్వంలోని కేంద్ర ప్రభుత్వం మొత్తం ప్రభుత్వ యంత్రాంగాన్ని దుర్వినియోగం చేస్తోందని ‘కాక్రోచ్ జనతా పార్టీ’ (CJP) వ్యవస్థాపకుడు అభిజిత్ దీప్కే తీవ్ర సంచలన ఆరోపణలు చేశారు. ఎన్నికల సంఘం పనితీరుపై, సీఈసీ రాజీనామాపై డిమాండ్ చేస్తూ నిరసన తెలుపుతున్న యువతను, ప్రతిపక్ష నేతలను ప్రభుత్వం లక్ష్యంగా చేసుకుని అణచివేసేందుకు యత్నిస్తోందని విమర్శించారు. ప్రసిద్ధ నటుడు, సామాజిక కార్యకర్త ప్రకాష్ రాజ్ , పొలిటికల్ యాక్టివిస్ట్ నేహా బోరాలతో కలిసి ఢిల్లీలో గురువారం ఏర్పాటు చేసిన విలేకరుల సమావేశంలో ఆయన మాట్లాడారు.

సీజేపీ ముఖ్య నాయకులు సౌరవ్ దాస్, ఆశుతోష్ రంకాలను ఢిల్లీ పోలీసులు అరెస్ట్ చేసి తీహార్ జైలుకు తరలించిన నేపథ్యంలో ఈ అత్యవసర విలేకరుల సమావేశం జరిగింది. ఈ సందర్భంగా అభిజిత్ దీప్కే మాట్లాడుతూ, కేవలం ఒకే ఒక్క అధికారి అయిన జ్ఞానేష్ కుమార్‌ను రక్షించడం కోసం ఢిల్లీ వీధుల్లోకి వచ్చి ప్రజాస్వామ్యబద్ధంగా నిరసన తెలుపుతున్న యువతను పోలీసులు ఈడ్చుకెళ్లి జైళ్లలో పెడుతున్నారని ఆవేదన వ్యక్తం చేశారు. కేంద్ర ప్రభుత్వం తన సొంత పౌరులపైనే యుద్ధం ప్రకటిస్తోందని, ఒక్క సీఈసీని కాపాడటానికి ప్రభుత్వం ఎందుకు ఇంత రాద్ధాంతం చేస్తోందని నిలదీశారు.

ఎన్నికల సంఘం చేపట్టిన ఓటర్ల జాబితా ప్రత్యేక సమగ్ర సవరణ (SIR) ప్రక్రియను, సీఈసీ తీరును దీప్కే తీవ్రంగా తప్పుబట్టారు. గత 2024 లోక్‌సభ ఎన్నికల్లో ఎన్డీఏ (NDA) , ఇండియా (INDIA) కూటముల మధ్య ఓట్ల వ్యత్యాసం కేవలం 2 శాతమేనని గుర్తుచేసిన ఆయన, ఈ సవరణల పేరుతో సీఈసీ జ్ఞానేష్ కుమార్ అధికార పార్టీకి సహకరిస్తున్నారని ప్రజలు బలంగా అనుమానిస్తున్నారని పేర్కొన్నారు. ఈ ఎస్ఐఆర్ ప్రక్రియలో భాగంగా దేశవ్యాప్తంగా ఏకంగా 13 కోట్ల మంది ఓటర్ల పేర్లను జాబితా నుంచి తొలగించారని తీవ్ర ఆరోపణ చేశారు. అధికారికంగా చనిపోయినట్లు ఓటరు జాబితాలో నమోదు చేసిన కొందరు వ్యక్తులు స్వయంగా తమ నిరసనల్లో సజీవంగా పాల్గొన్నారని, ఇది ప్రజాస్వామ్య వ్యవస్థకే ముప్పు అని వ్యాఖ్యానించారు.

కేంద్ర ప్రభుత్వం ముందుకు తెచ్చిన ‘ఒకే దేశం, ఒకే ఎన్నిక’ విధానం కేవలం పైకి కనిపించే ఒక ప్రచార నినాదం మాత్రమేనని, దాని వెనుక ఉన్న అసలు కుట్ర ‘ఒకే దేశం, ఒకే పార్టీ’ వ్యవస్థను తీసుకురావడమేనని దీప్కే ఆరోపించారు. ప్రభుత్వం వద్ద నిజంగా ధైర్యం ఉంటే దేశంలో అధికారికంగా ఎమర్జెన్సీ ప్రకటించాలని ప్రధాని మోదీకి సవాల్ విసిరారు. అంతర్జాతీయ సమాజం ఏమనుకుంటుందోననే భయంతోనే ప్రభుత్వం వెనుకాడుతోందని అన్నారు. ఈ సమావేశంలో పాల్గొన్న నటుడు ప్రకాష్ రాజ్ మాట్లాడుతూ, ఓటు హక్కు కోసం పౌరులను వీధుల్లో నిలబెట్టి భిక్షమెత్తుకునేలా చేయడం దేశ పౌరులను అవమానించడమేనని మండిపడ్డారు.

సీఈసీ జ్ఞానేష్ కుమార్ తక్షణమే రాజీనామా చేయాలని డిమాండ్ చేస్తూ మంగళవారం జంతర్ మంతర్ వద్ద సీజేపీ నేతలు సౌరవ్ దాస్, ఆశుతోష్ రంకా, అజింక్యా షిండే నిరసన చేపట్టారు. భద్రతా బారికేడ్లను దాటి పోలీసుల ఆంక్షలను ఉల్లంఘించారనే కారణంతో వారిని భద్రతా దళాలు అదుపులోకి తీసుకున్నాయి. ప్రభుత్వ అధికారిక విధులకు ఆటంకం కలిగించారనే అభియోగంపై కేసు నమోదు చేసి, సౌరవ్ దాస్, ఆశుతోష్ రంకాలను 5 రోజుల జ్యుడీషియల్ కస్టడీకి పంపి తీహార్ జైలుకు తరలించినట్లు సీజేపీ లీగల్ టీమ్ హెడ్ రత్నా సింగ్ వెల్లడించారు. అజింక్యా షిండేను వ్యక్తిగత పూచీకత్తుపై విడుదల చేసినట్లు తెలిపారు. ప్రభుత్వ అణచివేత చర్యలకు భయపడేది లేదని, రాజ్యాంగ పరిరక్షణ కోసం తమ పోరాటాన్ని దేశవ్యాప్తంగా కొనసాగిస్తామని సీజేపీ స్పష్టం చేసింది.