75 నుంచి 86 స్థానాలు ప్ర‌జాఫ్రంట్‌వే
సహకరించిన కార్యకర్తలకు, ప్రజలకు ధన్యవాదాలు
ప్ర‌జాఫ్రంట్ నేత‌ల మీడియా స‌మావేశంలో ఉత్త‌మ్‌కుమార్‌రెడ్డి
హైదరాబాద్‌: 100కు పైగాస్థానాలు వస్తాయన్న కెసిఆర్‌, కెటిఆర్‌ ఇప్పుడు టిఆర్‌ఎస్‌కు 80 సీట్లు మాత్రమే వస్తాయని అంటున్నారని, ఓట్ల లెక్కింపు తర్వాత మాత్రం వాళ్లకు 35కి మించి రావని తెలంగాణ పిసిసి అధ్యక్షుడు ఉత్తమ్ కుమార్‌ రెడ్డి జోస్యం చెప్పారు. శనివారం మధ్యాహ్నం ఆయన గోల్కొండ హోటల్‌లో ఫ్రంట్‌ నేతలతో కలిసి మీడియాతో మాట్లాడారు. ఎగ్జిట్‌ ఫలితాల్లో కొన్ని బిజెపి అనుకూల ఛానళ్లు టిఆర్‌ఎస్‌కు అనుకూలంగా చెప్పాయని ఆరోపించారు. సర్వేలను నమ్మొద్దని తనకు రాజ్‌దీప్‌ సర్దేశాయ్‌ ఫోన్‌లో చెప్పారని వెల్లడించారు. కెసిఆర్‌ కుటుంబంపై ప్రజలు తీవ్ర ఆగ్రహంతో ఉన్నారన్నారు. ప్రజాస్వామ్యానికి, సామాన్య ప్రజల హక్కులను కాపాడేందుకే తామంతా ఒక్కటయ్యామని వెల్లడించారు. ఫ్రంట్‌ నేతలు, కార్యకర్తలు ఈ ఎన్నికల్లో బాగా పనిచేశారని, పార్టీల మధ్య ఓటు బదిలీ జరిగిందన్నారు. ప్ర‌జాఫ్రంట్ విజయంపై ధీమా వ్యక్తంచేశారు. తమ కూటమి 75 నుంచి 86 స్థానాలు గెలుచుకుంటుందని ఉత్తమ్ ఆశాభావం వ్యక్తం చేశారు. ఎన్నికల పోలింగ్‌లో భాగస్వాములైన, సహకరించిన కార్యకర్తలకు, ప్రజలకు ధన్యవాదాలు చెప్పారు. ఈ ఎన్నికల్లో ఎన్నికల సంఘం అనేక విషయాల్లో విఫలమైందని విమర్శించారు. ఎన్నికల ప్రక్రియలో దొర్లిన పొరపాట్లపై ఎన్నికల ప్రధాన అధికారి రజత్‌కుమార్‌ కూడా క్షమాపణలు చెప్పారన్నారు. ఇవిఎంలు తరలింపు, భద్రపరిచే విషయంలో అవకతవకలు జరుగుతాయోమేనని కొందరికి అనుమానాలు వ్యక్తమవుతున్నాయని వ్యాఖ్యానించారు. ఇవిఎంలు మారవచ్చనే అనుమానాలు కూడా తమకు ఉన్నాయన్నారు. స్ట్రాంగ్‌ రూమ్‌లను కార్యకర్తలు, నేతలు పరిశీలిస్తూ ఉండాలని సూచించారు. ఓట్ల లెక్కింపు సందర్భంలో పూర్తిస్థాయిలో జాగ్రత్తలు తీసుకోవాలన్నారు. స్ట్రాంగ్‌ రూమ్‌లో ఒకసారి లాక్‌చేసిన తర్వాత అధికారులు ఎవరూ వెళ్లకూడదని, కొందరులోపలకు వెళ్తున్నారనే సమాచారం తమకు అందిందని వ్యాఖ్యానించారు. అందువల్ల ఆయా పార్టీలకు చెందిన కార్యకర్తలు అక్కడ ఉండే విధంగా అనుమతి ఇవ్వాలని కోరారు. 11న లెక్కింపు జరగనుందన్నారు. అనేకమంది ప్రజల ఓట్లు గల్లంతయ్యాయని, ఓటరు లిస్టులను సరిగా చేయకుండా ఎవరి కోసం ఇంత తొందరగా ఎన్నికలు నిర్వహించారని ప్రశ్నించారు. పోలింగ్ బూత్‌ ఏజెంటే కౌంటింగ్‌ ఏజెంట్‌గా ఉంటే బాగుంటుందనే అభిప్రాయాన్ని ఆయన వ్యక్తంచేశారు.
