జిహెచ్‌ఎంసిపై ప్రత్యేక దృష్టి కేంద్రీకరించండి
జోన్ల వారీగా నగరం విభజన
ఒక్కో జోన్‌ను ఒక్కో యూనిట్‌గా పరిగణించాలి
ప్రతి యూనిట్‌కు ఒక ప్రత్యేక అధికారి నియామకం
మరింత పకడ్బందీగా కంటైన్మెంట్ల నిర్వహణ
అధికారులకు సిఎం కెసిఆర్‌ ఆదేశం
ప్రజాపక్షం/ హైదరాబాద్‌ : తెలంగాణ రాష్ర్టంలో కరోనా వైరస్‌ సోకిన వారిలో జిహెచ్ఎంసి పరిధిలోని వారే ఎక్కువ సంఖ్యలో ఉంటున్నందున హైదరాబాద్‌ నగరంపై ప్రత్యేక దృష్టి కేంద్రీకరించాలని ముఖ్యమంత్రి కె.చంద్రశేఖర్‌ రావు అధికారులను ఆదేశించారు. హైదరాబాద్‌ నగరాన్ని జోన్ల వారీగా విభజించి, ఒక్కో జోన్‌ను ఒక్కో యూనిట్‌గా పరిగణించి, ప్రత్యేక అధికారులను నియమించాలని సూచించారు. పాజిటివ్‌ కేసులు నమోదైన కంటైన్మెంట్లను మరింత పకడ్బందీగా నిర్వహించాలని ఆదేశించారు. దేశంలో, రాష్ర్టంలో, సరిహద్దు రాష్ట్రాల్లో పాజిటివ్‌ కేసులు ఎక్కువవుతున్న నేపథ్యంలో ప్రజలు, అధికారులు మరింత అప్రమత్తంగా ఉండాలన్నారు. వైద్యశాఖ అన్ని విధాలా సర్వసన్నద్ధంగా ఉండాలని కోరారు. కరోనా వ్యాప్తి నిరోధానికి తీసుకుంటన్న చర్య లు, లాక్‌డౌన్‌ అమలు తదితర అంశాలపై సిఎం కెసిఆర్‌ సోమవారం ప్రగతి భవన్‌లో ఉన్నత స్థాయి సమీక్ష నిర్వహించారు. వైద్య,ఆరోగ్య శాఖమంత్రి ఈటల రాజెందర్‌, ప్రభుత్వ ముఖ్యసలహాదారు రాజీవ్‌శర్మ, సిఎస్‌ సోమేశ్‌ కుమార్‌, డిజిపి మహేందర్‌రెడ్డి, ముఖ్య కార్యద ర్శి ఎస్‌.నర్సింగ్‌ రావు తదితరులు పాల్గొన్నారు. సమీక్షా సమావేశ వివరాలను సిఎం కార్యాలయం ఒక ప్రకటన ద్వారా విడుదల చేసింది. సోమవారం కొత్తగా 32 మందికి కరోనా పాజిటివ్‌ వచ్చిందని, ఒకరు మరణించారని అధికారులు సిఎంకు వెల్లడించారు. పాజిటివ్‌ కేసులు ఎక్కువవుతున్న నేపథ్యంలో అన్ని లాబరేటరీలను, ఆసుపత్రులను సిద్ధం చేశామని చెప్పారు. ఒక్క రోజు వెయ్యి నుంచి 1100 మందికి పరీక్షలు నిర్వహించే విధంగా, ఎన్ని కేసులొచ్చినా వైద్యం అందించే విధంగా వ్యవస్థను సిద్ధం చేసినట్లు వివరించారు. రాష్ర్ట రాజధాని హైదరాబాద్‌తో పాటు, ఇతర జిల్లాల్లో కరోనా వ్యాప్తి నివారణకు జరుగుతున్న ప్రయత్నాలను, లాక్‌డౌన్‌ అమలును, ధాన్యం కొనుగోళ్ల వ్యవహారాలను సిఎం సమీక్షించారు. కొందరు జిల్లా అధికారులతో నేరుగా మాట్లాడి పలు సూచనలు చేశారు.
హైదరాబాద్‌కు ప్రత్యేక వ్యూహం
“గ్రేటర్‌ హైదరాబాద్‌ పరిధిలోనే ఎక్కువ కేసులు నమోదవుతున్నాయి. పాజిటివ్‌ వచ్చిన వారి ద్వారా ఇతరులకు తొందరగా స్ప్రెడ్‌ అయ్యే అవకాశాలు కూడా హైదరాబాద్‌లో ఎక్కువ ఉన్నాయి. కాబట్టి హైదరాబాద్‌ విషయంలో ప్రత్యేక వ్యూహం అనుసరించాలి. నగరంలోని మొత్తం 17 సర్కిళ్లను 17 యూనిట్లుగా విభజించాలి. ప్రతీ యూనిట్‌కు ప్రత్యేకంగా వైద్యాధికారిని, పోలీసు అధికారిని, మున్సిపల్‌ అధికారిని, రెవెన్యూ అధికారిని నియమించాలి. మున్సిపల్‌ యంత్రాంగమంతా కరోనా వ్యాప్తి నివారణ చర్యల్లో నిమగ్నం కావాలి. ప్రస్తుతం హైదరాబాద్‌ నగరానికంతా ఒక్క డిఎం అండ్‌ హెచ్‌ఓ ఉన్నారు. 17 సర్కిళ్లకు వేర్వేరుగా సీనియర్‌ వైద్యాధికారిని నియమించాలి” అని ముఖ్యమంత్రి చెప్పారు. “పాజిటివ్‌ కేసుల ఆధారంగా రాష్ర్టం మొత్తం 246 కంటైన్మెంటులు ఏర్పాటు చేశాం. ఒక్క హైదరాబాద్‌ నగరంలోనే 126 కంటైన్మెంటులున్నాయి. వీటిని మరింత పకడ్బందీగా నిర్వహించాలి. ఈ కంటైన్మెంట్లలోని ప్రజలను ఎట్టి పరిస్థితుల్లోనూ బయటకు రానీయవద్దు. బయట వారిని లోపలికి పోనీయవద్దు. ప్రతీ కంటైన్మెంటుకు ప్రత్యేక పోలీసు అధికారిని, నోడల్‌ అధికారిని నియమించాలి. వారి ఆధ్వర్యలో అత్యంత కఠినంగా నియంత్రణ చేయాలి. ప్రజలకు కావాల్సిన నిత్యావసర సరుకులను ప్రభుత్వ యంత్రాంగమే అందించాలి” అని ముఖ్యమంత్రి కెసిఆర్‌ సూచించారు. అత్యధిక జనసమ్మర్థం ఉండే జిహెచ్‌ఎంసిలో పాజిటివ్‌ కేసులు ఎక్కువవుతుండడాన్ని అత్యంత తీవ్రమైన విషయంగా పరిగణించాలని ముఖ్యమంత్రి అన్నారు. మున్సిపల్‌ శాఖ మంత్రి, వైద్య ఆరోగ్యశాఖ మంత్రి,ఇతర సీనియర్‌ అధికారులు ప్రతీ రోజు ఉదయం ప్రగతి భవన్‌లోనే జిహెచ్‌ఎంసిలోని సర్కిళ్ల వారీగా ప్రత్యేక సమీక్ష జరపాలని, పరిస్థితికి తగ్గట్టు అవసరమైన చర్యలు చేపట్టాలని ఆదేశించారు. కరోనా పాజిటివ్‌ కేసులు ఎక్కువవుతున్న నేపథ్యంలో ప్రజలు చాలా అప్రమత్తంగా ఉండాలని, ఇండ్ల నుంచి బయటకు రావద్దని ముఖ్యమంత్రి మరోసారి విజ్ఞప్తి చేశారు.
