హైదరాబాద్‌ : తెలంగాణ అసెంబ్లీ ఎన్నికల్లో పోలైన ఓట్లకు, కౌంటింగ్‌ ఓట్లకు తేడా వచ్చిందని, వేల సంఖ్యలో ఓట్ల తేడా ఎలా వచ్చిందో ఎన్నిక‌ల సంఘం, ప్రభుత్వం చెప్పాలని శాసన మండలి ప్రతిపక్ష నేత షబ్బీర్‌ అలీ డిమాండ్‌ చేశారు. రాత్రికిరాత్రే 11 శాతం పోలింగ్ ఎలా పెరిగిందని ప్రశ్నించారు. బుధవారం ఆయన మీడియాతో మాట్లాడుతూ.. కాంగ్రెస్‌ నుంచి గెలిచి టిఆర్‌ఎస్‌లోకి చేరిన దామోదర రెడ్డిపై చర్యలు తీసుకోవాలని డిమాండ్‌ చేశారు. దామోదర రెడ్డి ఫిరాయింపున‌కు సంబంధించి పూర్తి వివరాలు మండలి చైర్మన్‌కు అందించామన్నారు. ఇటీవలే కాంగ్రెస్‌లో చేరిన ముగ్గురు టిఆర్‌ఎస్ ఎంఎల్‌సిలకు నోటీసులు ఇచ్చిన చైర్మన్‌.. తాము ఇచ్చిన ఫిర్యాదులను ఎందుకు పట్టించుకోవడం లేదో చెప్పాలని డిమాండ్‌ చేశారు. పార్టీలు ఫిరాయించిన ఎంఎల్‌ఎలు, ఎంఎల్‌సిలపై చర్యలు తీసుకోవాలని నాలుగేళ్లుగా ఫిర్యాదు చేసిన కెసిఆర్‌ పట్టించుకోవడం లేదని ఆరోపించారు. పార్టీ ఫిరాయించిన తలసాని శ్రీనివాస్‌ యాదవ్‌ను నాలుగున్నరేళ్లు మంత్రిగా ఎలా కొనసాగించారని విమర్శించారు. కెసిఆర్‌కి చిత్తశుద్ధి ఉంటే ఇప్పటికైనా టిఆర్‌ఎస్‌లో చేరిన ఎంఎల్‌సిలపై చర్యలు తీసుకోవాలన్నారు. ఇక రాజకీయాల్లో గెలుపు ఓటమిలు సహజమని షబ్బీర్‌ అలీ అన్నారు. ఓడిపోయినంత మాత్రన ఇంట్లో ఉండమని, ప్రజల పక్షాన పోరాడుతామని చెప్పారు. నిరుద్యోగ భృతి, రైతు రుణమాఫీలపై అప్పుడే కెసిఆర్‌ మాటమార్చారన్నారు. మూడు రాష్ట్రాల్లో రైతు రుణ మాఫీపై తొలి సంతకం చేసిన ఘనత కాంగ్రెస్‌ పార్టీదని చెప్పారు. పంచాయతీ ఎన్నికల్లో బిసి రిజర్వేషన్లపై ప్రభుత్వం ఎందుకు పిటిషన్‌ వేయలేదని ప్రశ్నించారు. ప్రభుత్వం తీరుతో వేయి మంది బిసి సర్పంచ్‌లు, 9వేల మంది వార్డ్‌ మెంబర్‌లు నష్టపోయారని ఆరోపించారు.
రాత్రికిరాత్రే పోలింగ్ శాతం ఎలా పెరిగింది
RELATED ARTICLES
