కెసిఆర్‌ అంటే కావో కమిషన్‌రావు

ఆర్మూర్‌: కెసిఆర్‌ అంటే కావో కమిషన్‌రావు అని అర్థమ‌ని ఎఐసిసి అధ్య‌క్షుడు రాహుల్‌గాంధీ ఎద్దేవా చేశారు. రాష్ట్ర సంపదను తన కుటుంబానికి వెచ్చిస్తున్నార‌ని, రాష్ట్రంలో రూ.2.50లక్షల కోట్ల మేర అప్పులు చేసి ఒక్కో పౌరుడి పేరిట రూ.2.50లక్షల అప్పు పెట్టార‌ని విమ‌ర్శించారు. తెలంగాణ అసెంబ్లీ ఎన్నికల ప్రచారంలో భాగంగా గురువారం ఆయన ఆర్మూర్‌లో జరిగిన బహిరంగ సభలో ఆయ‌న మాట్లాడుతూ… ఇటీవల తెలంగాణ ముఖ్యమంత్రి ఓ నిజం చెప్పారని, ఈ ఎన్నికల్లో ఓడిపోతే తాను విశ్రాంతి తీసుకుంటానని అన్నారని, అది నిజమేనని ఎద్దేవా చేశారు. తెలంగాణ ప్రజల ఆకాంక్షలను కెసిఆర్‌ నెరవేరుస్తారని ఆశిస్తే.. ప్రజలకు ఇచ్చిన ఒక్క హామీ కూడా నెరవేర్చలేద‌న్నారు. రైతులు పండించే పంటలకు మద్దతు ధర లభించడం లేద‌ని, మద్దతు ధరలు అడిగే రైతులను కొట్టించార‌ని ఆరోపించారు. పంటలకు నీరు అడిగితే పోలీసులతో లాఠీఛార్జి చేయించారు. భూ నిర్వాసితులకు పరిహారం చెల్లించలేదు. రైతుల అనుమతి లేకుండా భూములు తీసుకోవద్దని భూసేకరణ చట్టంలో ఉంది. ఆ చట్టాన్ని రద్దు చేసి రైతుల భూములను బలవంతంగా తీసుకున్నారు. కెసిఆర్‌, ఆయన కుమార్తె కవిత కూడా పసుపు బోర్డు ఏర్పాటు చేస్తామని చెప్పారు. కానీ, అలా చేయలేకపోయారు. కాంగ్రెస్‌ పార్టీ అధికారంలోకి వచ్చిన వెంటనే రైతుల సమస్యలు పరిష్కరిస్తాం.17రకాల పంటలకు మద్దతు ధర ఇస్తామ‌ని హామీ ఇచ్చారు. మోడీ స‌ర్కారు ప్ర‌వేశ‌పెట్టిన జిఎస్‌టి ‘‘గబ్బర్‌సింగ్‌ ట్యాక్స్‌’’ సమీక్షిస్తామ‌న్నారు. బీడీ కార్మికులు, యాజమాన్యాలపై జిఎస్‌టి భారం లేకుండా చూస్తామ‌న్నారు. ‘‘కాంగ్రెస్‌ అధికారంలోకి వస్తే గల్ఫ్‌ బాధితుల సమస్యలు పరిష్కరిస్తాం. రూ.500కోట్లతో నిధిని ఏర్పాటు చేస్తాం.’’ అని ప్రజలకు హామీ ఇచ్చారు.