లోక్‌సభ ఎన్నికల మాదిరే హర్యానా, జమ్మూకశ్మీర్‌లలో ప్రజలు బిజెపికి గుణపాఠం చెప్పేందుకు సిద్ధం
వైద్యసంస్థల్లో వైద్యులు, సిబ్బంది భద్రత, రక్షణకోసం ప్రత్యేక చట్టం తేవాలి
సిపిఐ జాతీయ ప్రధాన కార్యదర్శి డి.రాజా
ప్రజాపక్షం / హన్మకొండ : లోక్‌సభ ఎన్నికల్లో 400 లకు పైగా సీట్లు సాధించి అధికారంలోకి వస్తామని డాంభీకాలు పలికిన బిజెపిని ప్రజలు సగం సీట్లకు తగ్గించి తగిన గుణపాఠం చెప్పారని, త్వరలో జరగనున్న హర్యానా, జమ్మూ కశ్మీర్‌ రాష్ట్రాల అసెంబ్లీ ఎన్నికలలో కూడా బిజెపిని ఓడించేందుకు ప్రజలు సిద్ధంగా ఉన్నారని సిపిఐ జాతీయ ప్రధాన కార్యదర్శి, మాజీ ఎంపీ డి.రాజా అన్నారు. బిజెపి నేతృత్వంలోని ఎన్‌డిఎ ప్రభుత్వం మూడోసారి అధికారంలోకి వచ్చినప్పటికీ ఈ ప్రభుత్వం ఎంత కాలం ఉంటుందనేది ప్రశ్నార్థకమేనని, ఎన్‌డిఎ ప్రభుత్వానికి మద్దతు ఇచ్చిన చంద్రబాబు నాయుడు, నితీష్‌కుమార్‌ వారి వెంట ఎంత కాలం ఉంటారో కూడా తెలియదని అన్నారు. హన్మకొండలో మూడు రోజుల పాటు జరగనున్న సిపిఐ రాష్ట్ర నిర్మాణ కౌన్సిల్‌ సమావేశాల్లో పాల్గొనేందుకు రాజా గురువారం హన్మకొండకు వచ్చారు. ఈ సందర్భంగా హరిత హోటల్‌లో ఏర్పాటు చేసిన మీడియా సమావేశంలో సిపిఐ రాష్ట్ర కార్యదర్శి కూనంనేని సాంబశివరావు, సిపిఐ జాతీయ కార్యదర్శులు డాక్టర్‌ కె.నారాయణ, సయ్యద్‌ అజీజ్‌పాషా, కార్యవర్గ సభ్యులు చాడ వెంకట్‌రెడ్డి, రాష్ట్ర కార్యదర్శివర్గ సభ్యులు పల్లా వెంకట్‌రెడ్డి, తక్కెళ్లపల్లి శ్రీనివాస్‌రావు, పశ్య పద్మ, కలవేణ శంకర్‌, వి.ఎస్‌.బోస్‌, ఎన్‌.బాలమల్లేష్‌, ఎం.బాలనరసింహ, ఇ.టి.నరసింహలతో కలిసి రాజా మాట్లాడారు. రాజా మాట్లాడుతూ ఆర్‌ఎస్‌ఎస్‌, బిజెపి రాజ్యాంగంపై ప్రత్యక్షంగా దాడి చేస్తున్నాయని, దేశంలో తీవ్రమైన సంక్షోభ పరిస్థితులు ఉన్నాయని, రాజ్యాంగాన్ని విస్మరిస్తూ ఉద్యోగ నియామకాల్లో లేటరల్‌ ఎంట్రీ పేరుతో బిజెపి ప్రభుత్వం ఆర్‌ఎస్‌ఎస్‌ పత్రినిధులను బ్యూరోక్రసీలో చొప్పించేందుకు పయ్రత్నం చేస్తుందన్నారు. ఇందుకు వ్యతిరేకంగా రాజ్యాంగం, ప్రజాస్వామ్య వ్యవస్థల పరిరక్షణ కోసం ప్రజాస్వామ్య శక్తులన్నీ కలిసి ముందుకు వెళ్ళాల్సిన అవసరం ఉందన్నారు. ఒకే దేశం ఒకే ఎలెక్షన్‌, ఒకే రిలీజీయన్‌ అనే నినాదంతో దేశంలో విచ్ఛిన్న పాలన సాగించాలని చూస్తున్నాయని, రాష్ట్రాల హక్కులు, అధికారాలను లాక్కుంటున్నదని, రాజ్యాంగం స్థానంలో కొత్త మతతత్వ రాజ్యాంగం తేవాలని బిజెపి ప్రయత్నం చేస్తున్నదని ఆయన ఆగ్రహం వ్యక్తం చేశారు. జమ్మూ కశ్మీర్‌ను కేంద్ర పాలిత ప్రాంతం చేస్తూ కేంద్ర పభ్రుత్వం అనుసరించిన విధానం పెద్ద వైఫల్యమని, అక్కడ ఎన్‌కౌంటర్లు, దాడులు జరుగుతున్నాయని, బిజెపి పభ్రుత్వం చెప్పిన శాంతి, సాధారణ పరిస్థితులు ఆ రాష్ట్రంలో ఎక్కడ ఉన్నాయని ఆయన ప్రశ్నించారు.
ఇటీవల ప్రవేశపెట్టిన బడ్జెట్‌లో కేంద్ర పభ్రుత్వం కార్పొరేటట్లకు విధేయతను చాటుకుందని, ప్రజల తక్షణ సమస్యల గురించి పట్టించుకోలేదని, ముఖ్యంగా గణనీయంగా పెరిగిన నిత్యావసర వస్తువుల ధరలను అరికటట్టేందుకు, విద్య, వైద్య, మౌళిక సదుపాయాల కల్పనకు ఎలాంటి నిధులను కేటాయించలేదని ఆయన విమర్శించారు. అభివృద్ధి చెందిన దేశంగా భారత్‌ మారిందని చెబుతున్న ప్రధాని మోదీ దేశంలో ఉచితంగా రేషన్‌ ఇచ్చే పరిస్థితి ఎందుకు వచ్చిందో సమాధానం చెప్పాలని ఆయన ప్రశ్నించారు. అదానీ సంస్థలలో భాగస్వామ్యం కలిగిన సెబి చైర్‌ పర్సన్‌ను ఆ పదవి నుంచి తప్పుకోవాలని ప్రధాని మోదీ ఎందుకు కోరడం లేదని, ఈ మొత్తం వ్యవహారంపై జాయింట్‌ పార్లమెంటరీ కమిటీ (జెపిసి)ని ఏర్పాటు చేసేందుకు మోదీ ఎందుకు వెనుకాడుతున్నారని ఆయన ప్రశ్నించారు. కోల్‌కతాలో వైద్యురాలిపై జరిగిన ఘటన అత్యంత దారుణమైన నేరమని, దీనిపై సుప్రీంకోర్టు జోక్యం చేసుకోవాల్సిన పరిస్థితి ఏర్పడిందని, ఇప్పటికైనా మోదీ మౌనం వీడి తగిన చర్యలు తీసుకోవాలన్నారు. ఆసుపత్రులు, వైద్య సంస్థల్లో వైద్యులు, సిబ్బంది భధ్రత, రక్షణ కోసం ప్రత్యేక చట్టం తీసుకురావాలని రాజా డిమాండ్‌ చేశారు. రిజర్వేసన్లు, సామాజిక న్యాయాన్ని ఎత్తి వేసేందుకు బిజెపి ప్రభుత్వం కుట్రలు చేస్తుందని ఆయన విమర్శించారు. ప్రైవేట్‌ సెక్టార్‌ లోనూ రిజర్వేషన్‌ అమలు చేయాలని ఆయన డిమాండ్‌ చేశారు.
రెజ్లర్‌ వినేష్‌ పొగట్‌ ఒలపింక్‌లో పాల్గొంటే గోల్‌ మెడల్‌ తీసుకువచ్చేదని, బిజెపి కుట్రలలో బలై పోయిందని, ఆమె గోల్‌ మెడల్‌ తేలేకపోయినా విస్తృతమైన ప్రజాభిమానాన్ని చూరగొన్నారన్నారు. ప్రధాని మోదీ ప్రభుత్వం రాజ్యాంగ, ప్రజాస్వామ్య హక్కులను, జీవించే హక్కులను హరిస్తున్నదని, బిజెపి, ఆర్‌ఎస్‌ఎస్‌ శక్తులు అనుసరిస్తున్న ఈ విధానాలను సైద్ధాంతికంగా, రాజకీయంగా, ఎన్నికల పరంగా ఓడిరచాల్సిన అవసరం ఉందని ఆయన అన్నారు. గత లోక్‌సభ ఎన్నికల సందర్భంగా భావసారూప్యత కలిగిన పార్టీలతో కలిసి పోటీ చేసిన కాంగెస్‌ పార్టీ బలమైన పత్రిపక్షంగా ఆవిర్భవించిందని, దేశ ప్రయోజనాల దృష్ట్యా పజ్రా సమస్యలపై, రాజకీయ అంశాలపై కాంగెస్‌ పార్టీ భాగస్వామ్యం పార్టీలతో చర్చించి ముందుకు వెళ్ళాలన్నారు. తెలంగాణ రాష్ట్రం లో కాంగ్రెస్‌తో కలిసి పనిచేసిన సిపిఐ ఒక ఎంఎల్‌ఎ స్థానంలో విజయం సాధించిందని, రెండు ఎంఎల్‌సి పదవులను ఇస్తామని హామీ ఇచ్చిన కాంగ్రెస్‌ పార్టీ ఇంకా అధికారికంగా ప్రకటించలేదని ఆయన గుర్తు చేశారు. అదే విధంగా ప్రభుత్వ ఏర్పాటు సందర్భంగా కాంగ్రెస్‌ అనేక హామీలు ఇచ్చిందని, వాటిని అమలు చేయాలని ఆయన కోరారు.
కాంగ్రెస్‌ ప్రభుత్వం ప్రజల ఆకాంక్షలు నెరవేర్చాలి సిపిఐ రాష్ట్ర కార్యదర్శి కూనంనేని సాంబశివరావు
రాష్ట్రంలోని కాంగ్రెస్‌ ప్రభుత్వం ప్రజల ఆకాంక్షలు నెరవేర్చే దిశగా ముందుకు సాగాలని కోరుకుంటున్నట్లు సిపిఐ రాష్ట్ర కార్యదర్శి, కొత్తగూడెం ఎమ్మెల్యే కూనంనేని సాంబశివరావు అన్నారు. హనుమకొండ హరిత కాకతీయలో విలేకరుల సమావేశంలో కూనంనేని మాట్లాడుతూ కాంగ్రెస్‌ ప్రభుత్వం అధికారంలోకి వచ్చి ఎనిమిది నెలలు కావస్తున్నదని, నేటికీ గత ప్రభుత్వం సృష్టించిన సంక్షోభాల నుండి బయట పడలేక పోతున్నదని అన్నారు. ఎన్నికలలో ఇచ్చిన హామీ మేరకు రైతుల రుణ మాఫీ, గృహ జ్యోతి, గ్యాస్‌ సబ్సిడీ అందరికి అందేలా చూడాలని, ఇలాంటి విషయాలపై ప్రజా వ్యతిరేకత కూడగట్టుకోవద్దని కోరుకుంటున్నామని, మిత్రపక్షంగా తాము సూచనలిస్తామని అన్నారు. తెలంగాణలో బీఆర్‌ఎస్‌ పని అయిపోయిందని, బీజేపీ రాకూడదని, కాంగ్రెస్‌ ప్రభుత్వమే ఉండాలని తాము కోరుకుంటున్నామని అన్నారు. సిపిఐ ని ఒక పోరాట పార్టీగా నిలబెట్టేందుకు హనుమకొండలో రాష్ట్ర నిర్మాణ కౌన్సిల్‌ సమావేశాలు నిర్వహిస్తున్నామని, ప్రజాసమస్యలపై చర్చించి, పార్టీ పరంగా శ్రేణులను ఎలా కదిలించాలన్న విషయాలపై చర్చించనున్నట్లు తెలిపారు.ఈ ఏడాది డిసెంబర్‌ 26కు సీపీఐ ఆవిర్భవించి వందేళ్లు పూర్తి కావస్తున్నదని, దేశంలో సిపిఐ ఒక చోదక శక్తిగా ఎదిగిందని అన్నారు. అలాగే సెప్టెంబర్‌ 11 నుండి 19 వరకు తెలంగాణ సాయుధ పోరాట వార్షికోత్సవాలను ఘనంగా నిర్వహించడం జరుగుతుందని, నాడు సీపీఐ పోరాటం వల్లనే నేటి తెలంగాణ సాధించుకున్న విషయం అందరికీ తెలిసిందేనని చెప్పారు.
సిపిఐ పతాకాన్ని ఆవిష్కరించిన జాతీయ ప్రధాన కార్యదర్శి డి.రాజా
సిపిఐ రాష్ట్ర నిర్మాణ కౌన్సిల్‌ సమావేశాలు చారిత్రక మహానగరం, కాకతీయుల రాజధాని హనుమకొండలో గురువారం ఘనంగా ప్రారంభం అయ్యాయి. ఈ నెల 24 వరకు మూడు రోజుల పాటు జరుగనున్న ఈ సీపీఐ రాష్ట్ర నిర్మాణ కౌన్సిల్‌ సమావేశాల తొలిరోజున హన్మకొండలోని హరిత కాకతీయ ప్రాంగణంలో ఏర్పటు చేసిన పార్టీ పతాకాన్ని జాతీయ ప్రధాన కార్యదర్శి డి.రాజా ఎగురవేశారు. అనంతరం ఈ రాష్ట్ర సమావేశాలను ఆయన లంచనంగా ప్రారంభించారు. చారిత్రక నగరమైన హన్మకొండలోని హరిత కాకతీయ హోటల్‌ వేదికగా ఈ రాష్ట్ర నిర్మాణ కౌన్సిల్‌ సమావేశాలు నిర్వహించడం సంతోషంగా ఉందన్నారు.
ఈ సమావేశాలకు రాజాతో పాటు ముఖ్య అతిథులుగా సిపిఐ జాతీయ ప్రధాన కార్యదర్శి, మాజీ ఎంపి డి. రాజా, జాతీయ కార్యదర్శులు డాక్టర్‌ కె.నారాయణ, మాజీ ఎంపి అజీజ్‌ పాషా, జాతీయ కర్యవర్గ సభ్యులు చాడ వెంకట్‌ రెడ్డి, రాష్ట్ర కార్యదర్శి, కొత్తగూడెం ఎమ్మెల్యే కూనంనేని సాంబశివరావు తదితరులు హాజరయ్యారు. రాష్ట్ర వ్యాప్తంగా అన్ని జిల్లాల నుండి రాష్ట్ర కౌన్సిల్‌ సభ్యులు, రాష్ట్ర కార్యవర్గ,కార్యదర్శి వర్గ సభ్యులు హాజరయ్యారు. ఈ సమావేశాలలో కేంద్ర, రాష్ట్ర ప్రభుత్వాల విధానాలపై, దేశంలో, రాష్ట్రంలో నెలకొన్న ప్రస్తుత రాజకీయ పరిస్థితులపై చర్చించనున్నారు. అలాగే రానున్న పార్టీ అనుసరించాల్సిన వ్యూహంతో పాటు భవిష్యత్‌ కార్యాచరణను రూపొందించడం జరుగుతుందని తెలిపారు. కాగా గతంలో హన్మకొండ వేదికగా సిపిఐ రాష్ట్ర మహాసభలు, రాష్ట్ర నిర్మాణ మహాసభలు నిర్వహిస్తుండగా ఉమ్మడి జిల్లా పార్టీ నాయకులు సిపిఐ రాష్ట్ర కార్యదర్శి వర్గ సభ్యులు తక్కళ్లపల్లి శ్రీనివాసరావు, జిల్లాల కార్యదర్శుల నేతృత్వంలో రాష్ట్ర, జాతీయ నాయకులకు ఘనంగా స్వాగతం పలికారు.
