భారీ వర్షాలతో అప్రమత్తంగా ఉండాలి
రెవెన్యూ బిల్లుపై ప్రజల నుంచి విస్తృతస్థాయిలో అభిప్రాయాలు సేకరించాలి
ఎల్‌ఆర్‌ఎస్‌ను మరింత వేగవంతం చేయాలి
కలెక్టర్లకు మంత్రి పొంగులేటి శ్రీనివాస్‌రెడ్డి ఆదేశం
ప్రజాపక్షం/హైదరాబాద్‌
రాష్ట్రంలో విస్తృతంగా కురుస్తున్న భారీ వర్షాల నేపథ్యంలో అందరూ అప్రమత్తంగా ఉండాలని, జనజీవనానికి ఎటువంటి ఆటంకాలు లేకుండా తక్షణ చర్యలు చేపట్టాలని రెవెన్యూ,సమాచార పౌరసంబంధాల శాఖ మంత్రి పొంగులేటి శ్రీనివాస్‌ రెడ్డి జిల్లా కలెక్టర్లను ఆదేశించారు. మరో ఐదు రోజులపాటు భారీ వర్షాలు కొనసాగుతాయని వాతావరణ శాఖ హెచ్చరికల నేపథ్యంలో ఎటువంటి పరిస్థితులనైనా ఎదుర్కొనేందుకు జిల్లా యంత్రాంగం పూర్తి స్థాయిలో సిద్ధంగా ఉండాలన్నారు. రాష్ట్రంలో కురుస్తున్న భారీ వర్షాలు, నూతన రెవెన్యూ చట్టం -2024 ముసాయిదా, ధరణి దరఖాస్తులు,ఎల్‌ఆర్‌ఎస్‌ తదితర అంశాలపై ప్రభుత్వ ప్రధానకార్యదర్శి శాంతికుమారి,జిల్లా కలెక్టర్లతో ఖమ్మం జిల్లా కలెక్టరేట్‌ నుంచి మంత్రి పొంగులేటి శ్రీనివాస్‌రెడ్డి మంగళవారం వీడియో కాన్ఫరెన్స్‌ నిర్వహించారు.ఈ సందర్భంగా ఆయన మాట్లాడుతూ వచ్చే ఐదు రోజుల్లో వర్షాలను దృష్టిలో పెట్టుకుని స్థానిక పరిస్థితులకు అనుగుణంగా విద్యా సంస్థలకు సెలవులు ప్రకటించే అంశంపైన కలెక్టర్లదే నిర్ణయమని సూచించారు.గత రాత్రి నుంచి గ్రేటర్‌ హైదరాబాద్‌, నిజామాబాద్‌ తదితర జిల్లాల్లో భారీ వర్షాలు కురిసినా వీలైనంత మేరకు ప్రజలకు ఇబ్బంది లేకుండా అధికారులు చర్యలు తీసుకోవడం పట్ల సంతృప్తి వ్యక్తం చేశారు. భారీ వర్షాల నేపథ్యంలో రాష్ట్రంలోని వివిధ జిల్లాల్లో స్థానిక పరిస్థితిని మంత్రి జిల్లా కలెక్టర్లను అడిగి తెలుసుకున్నారు. లోతట్టు ప్రాంతాలు, వరద ముప్పు ప్రాంతాలలో చేపట్టాల్సిన రక్షణ చర్యల తీసుకోవాలని ఆదేశించారు.ప్రధానంగా గ్రేటర్‌ హైదరాబాద్‌లో మున్సిపల్‌,మెట్రో వాటర్‌ బోర్డు, ట్రాఫిక్‌ విభాగాలు సమన్వయంతో పని చేసి, ప్రజలకు ఎటువంటి ఇబ్బందులు లేకుండా చూడాలని సూచించారు. జిల్లా కలెక్టర్లు ఏ విధమైన ప్రాణ, ఆస్తి నష్టం జరగకుండా సంబంధిత ప్రభుత్వ విభాగాలతో కలిసి ముందు జాగ్రత్త చర్యలు తీసుకోవాలని, ప్రతి కలెక్టరేట్లలో కంట్రోల్‌ రూమ్‌లను ఏర్పాటు చేసుకోవాలని సూచించారు.
ఈనెల 23, 24న జిల్లాల్లో నూతన రెవెన్యూ బిల్లుపైన వర్క్‌షాపులు :
రాష్ట్ర ప్రభుత్వం ప్రతిష్టాత్మకంగా తీసుకురాబోతున్న నూతన రెవెన్యూ బిల్లు 2024పై ప్రజల నుంచి విస్తృత స్థాయిలో అభిప్రాయ సేకరణ చేపట్టాలని మంత్రి పొంగులేటి శ్రీనివాస్‌ రెడ్డి తెలిపారు. ఈ నెల 23,24న ఆయా జిల్లాల్లో స్థానిక పరిస్థితులను బట్టి నూతన రెవెన్యూ బిల్లు ముసాయిదాపై వివిధ రంగాల మేధావులతో వర్క్‌షాప్‌లను నిర్వహించాలని కలెక్టర్లను ఆదేశించారు. ధరణి సమస్యలపై గత ప్రభుత్వంలో వచ్చిన దరఖాస్తులతో పాటు ఇటీవల కాలంలో కొత్తగా వచ్చిన దరఖాస్తులను వచ్చే పది రోజుల్లో పరిష్కరించాలని కలెక్టర్లను సూచించారు. తిరస్కరించిన దరఖాస్తులకు సరైన కారణాలను తెలియజేయాలన్నారు. ముఖ్యంగా రంగారెడ్డి, సంగారెడ్డి, వికారాబాద్‌ జిల్లాల్లో దరఖాస్తుల పెండింగ్‌ అధికంగా ఉన్నదని,ఈ జిల్లాలపై ప్రధానంగా దృష్టి సారించాలని రెవెన్యూ ముఖ్యకార్యదర్శి నవీన్‌ మిట్టల్‌ను మంత్రి పొంగులేటి శ్రీనివాస్‌ రెడ్డి ఆదేశించారు.
ఎల్‌ఆర్‌ఎస్‌ తనిఖీల కోసం స్పెషల్‌ టీమ్..
లక్షాలాది కుటుంబాలకు ప్రయోజనం చేకూర్చే లే అవుట్‌ రెగ్యులరైజేషన్‌(ఎల్‌ఆర్‌ఎస్‌) ప్రక్రియను మరింత వేగవంతం చేయాలని మంత్రి పొంగులేటి శ్రీనివాస్‌ రెడ్డి జిల్లా కలెక్టర్లను ఆదేశించారు. నిబంధనల ప్రకారం మాత్రమే భూముల క్రమబద్ధీకరణ జరగాలని,ఎటువంటి అక్రమాలకు తావు లేకుండా పకడ్బంధీ చర్యలు తీసుకోవాలన్నారు. ఎల్‌ఆర్‌ఎస్‌ క్షేత్రస్థాయి తనిఖీల కోసం స్పెషల్‌ టీమ్‌లతో పాటు హెల్ప్‌డెస్క్‌ లను కూడా ఏర్పాటు చేసుకోవాలన్నారు. ఎల్‌ఆర్‌ఎస్‌ ప్రక్రియను పర్యవేక్షించేందుకు ప్రతి జిల్లాకు స్పెషల్‌ గ్రేడ్‌ డిప్యూటీ కలెక్టర్‌ను పర్యవేక్షణ అధికారిగా నియమించాలని ప్రభుత్వ ప్రధాన కార్యదర్శిని మంత్రి సూచించారు. ఎల్‌ఆర్‌ఎస్‌ కోసం దరఖాస్తు చేసుకున్న సమయంలో అవసరమైన మేరకు డాక్యుమెంట్లను సమర్పించని వారి నుంచి ఇప్పుడు తీసుకుని, ఎల్‌ఆర్‌ఎస్‌ కోసం ఏర్పాటు చేసిన ప్రత్యేక ‘ఆప్‌’లో అప్‌లోడ్‌ చేయాలన్నారు. ప్రతి జిల్లాలో పైలట్‌ ప్రాజెక్టు కింద మొదటి దశలో వంద ఎల్‌ఆర్‌ఎస్‌ దరఖాస్తులను పరిష్కరించాలని సూచించారు. ఇందులో ఎదురయ్యే మంచి చెడులను దృష్టిలో పెట్టుకుని భవిష్యత్తు కార్యాచరణను రూపొందించుకోవాలని అధికారులను సూచించారు. గత ప్రభుత్వంలో 2020 లో ఎల్‌ఆర్‌ఎస్‌ కోసం దాదాపు 25 లక్షల దరఖాస్తులు వచ్చాయని, గత నాలుగు సంవత్సరాలుగా ఈ దరఖాస్తులు ఎటువంటి పరిష్కారానికి నోచుకోలేదన్నారు. దీనిని దృష్టిలో పెట్టుకుని ఈ దరఖాస్తులను అత్యంత ప్రాధాన్యత క్రమంలో పరిష్కరించాలని మంత్రి పొంగులేటి కలెక్టర్లకు సూచించారు.
