కాంగ్రెస్‌లో చేరిన పెద్దపల్లి ఎంపి వెంకటేశ్‌ నేత, టిటిడి మాజీ సభ్యుడు మన్నె జీవన్‌ రెడ్డి
ప్రజాపక్షం/హైదరాబాద్‌ భారత రాష్ట్ర సమితి(బిఆర్‌ఎస్‌)కి గట్టి ఎదురుదెబ్బ తగిలింది. ఆ పార్టీకి చెందిన పెద్దపల్లి(ఎస్‌సి) లోక్‌సభ సభ్యుడు డాక్టర్‌ బొర్లకుంట వెంకటేశ్‌ నేత కాంగ్రెస్‌ పార్టీలో చేరారు. కొంతకాలంగా బిఆర్‌ఎస్‌ అధ్యక్షుడు కెసిఆర్‌, ఆయన కుమారుడు కెటిఆర్‌ అనుసరిస్తున్న వైఖరితో తీవ్ర అసంతృప్తిగా ఉన్న వెంకటేశ్‌ నేత బిఆర్‌ఎస్‌కు రాజీనామా చేసి కాంగ్రెస్‌ గూటికి చేరారు. న్యూ ఢిల్లీలో ఎఐసిసి ప్రధాన కార్యదర్శి (సంస్థాగత) కె.సి.వేణుగోపాల్‌, ముఖ్యమంత్రి రేవంత్‌ రెడ్డి సమక్షంలో మంగళవారం ఎంపి వెంకటేశ్‌ నేత కాంగ్రెస్‌లో చేరారు. కెసి వేణుగోపాల్‌ వెంకటేశ్‌ నేతకు కండువా కప్పి కాంగ్రెస్‌లోకి ఆహ్వానించారు. వేణుగోపాల్‌, ముఖ్యమంత్రి రేవంత్‌రెడ్డి సమక్షంలో ఉమ్మడి మహబూబ్‌ నగర్‌ జిల్లాకు చెందిన టిటిడి మాజీ సభ్యుడు మన్నె జీవన్‌ రెడ్డి కాంగ్రెస్‌ పార్టీలో చేరారు. ఆయనతో పాటు జిల్లాకు చెందిన బిఆర్‌ఎస్‌ నేత రెహమాన్‌, పలువురు కార్యకర్తలు కాంగ్రెస్‌ పార్టీలో చేరారు. చేరికల అనంతరం వేణుగోపాల్‌, ముఖ్యమంత్రి రేవంత్‌ రెడ్డితో కలిసి వెంకటేశ్‌ నేత, మన్నె జీవన్‌ రెడ్డి ఎఐసిసి అధ్యక్షుడు మల్లికార్జున్‌ ఖర్గెను ఆయన నివాసానికి వెళ్లి మర్యాదపూర్వకంగా కలిశారు. ఈ సందర్భంగా వెంకటేశ్‌ నేత, మన్నె జీవన్‌ రెడ్డిలను ముఖ్యమంత్రి రేవంత్‌రెడ్డి ఎఐసిసి అధ్యక్షుడు ఖర్గెకు పరిచయం చేశారు. వారిని పార్టీలోకి ఆహ్వానిస్తున్నట్లు ఖర్గె తెలిపారు. కార్యక్రమంలో ఉప ముఖ్యమంత్రి భట్టి విక్రమార్క, ఉమ్మడి మహబూబ్‌ నగర్‌ జిల్లాకు చెందిన ఎంఎల్‌ఎలు యెన్నం శ్రీనివాస్‌ రెడ్డి, జనంపల్లి అనిరుధ్‌ రెడ్డి, గవినోళ్ల మధుసూదన్‌ రెడ్డి, వీర్లపల్లి శంకర్‌ ఢిల్లీలో రాష్ట్ర ప్రభుత్వ ప్రత్యేక ప్రతినిధి డాక్టర్‌ మల్లు రవి, రాష్ట్ర మాజీ మంత్రి డాక్టర్‌ జి.చిన్నారెడ్డి, ఎఐసిసి ప్రత్యేక ఆహ్వానితుడు చల్లా వంశీచంద్‌ రెడ్డి తదితరులు పాల్గొన్నారు.
హైదరాబాద్‌కు సిఎం రేవంత్‌ రెడ్డి
ఎఐసిసి అగ్రనేత రాహుల్‌ గాంధీ చేపడుతున్న భారత్‌ జోడో న్యాయ్‌ యాత్రలో సోమవారం పాల్గొన్న ముఖ్యమంత్రి రేవంత్‌ రెడ్డి సోమవారం సాయంత్రానికి ఢిల్లీ చేరుకున్నారు. కాంగ్రెస్‌ పార్లమెంటరీ పార్టీ చైర్‌పర్సన్‌ సోనియా గాంధీని సోమవారం రాత్రి కలిసిన ముఖ్యమంత్రి రేవంత్‌రెడ్డి…. రాష్ట్ర ప్రభుత్వం అమలు చేస్తున్న గ్యారంటీలు, అమలు చేయనున్న గ్యారంటీలు, బిసి కుల గణన తదితర అంశాలను ఆమెకు వివరించారు. మంగళవారం పార్టీలో చేరికల అనంతరం మధ్యాహ్నం హైదరాబాద్‌కు తిరిగి వచ్చారు.
బిఆర్‌ఎస్‌కు బిగ్‌ షాక్‌
RELATED ARTICLES
