నిధులివ్వండి

తెలంగాణకు రావాల్సిన నిధులను త్వరగా విడుదల చేయాలని కేంద్ర ఆర్థికమంత్రి నిర్మలా సీతారామన్‌కు సిఎం రేంత్‌రెడ్డి విజ్ఞప్తి
యుపిఎస్‌సి చైర్మన్‌తో భేటీ
రక్షణ భూముల కోసం రాజ్‌నాథ్‌తో సమావేశం
ప్రజాపక్షం / హైదరాబాద్‌ తెలంగాణ రాష్ట్రానికి కేంద్ర ప్రభుత్వం నుండి రావాల్సిన నిధులను త్వరగా విడుదల చేయాలని కేంద్ర ఆర్థికమంత్రి నిర్మలా సీతారామన్‌కు ముఖ్యమంత్రి ఎనుముల రేవంత్‌రెడ్డి విజ్ఞప్తి చేశారు. వెనుకబడిన ప్రాంతాల అభివృద్ధి నిధి కింద 2019 20, 2021- నుంచి 2023 వరకు సంవత్సరానికి రూ.450 కోట్ల చొప్పు న విడుదల చేయాల్సిన రూ.1800 కోట్లు విడుదల చేయాలని కోరారు. కేంద్రమంత్రిని ముఖ్యమంత్రి రేవంత్‌రెడ్డి, రాష్ర్ట మంత్రి ఉత్తమ్‌కుమార్‌రెడ్డి శుక్రవారం సాయంత్రం ఢిల్లీలోని ఆమె కార్యాలయంలో కలిశారు. పదిహేనవ ఆర్థిక సంఘం నుంచి తెలంగాణకు రావాల్సిన రూ. 2,233.54 కోట్లు త్వరగా విడుదల చేయాలని కేంద్ర మంత్రిని విజ్ఞప్తి చేశారు. హైదరాబాద్‌ నగర అభివృద్ధికి ప్రత్యేకంగా నిధులు కేటాయించాలని కోరారు. సమావేశంలో రాష్ర్ట ప్రభుత్వ ప్రధాన కార్యదర్శి శాంతి కుమారి, ముఖ్యమంత్రి ప్రిన్సిపల్‌ కార్యదర్శి వి.శేషాద్రి, ఒఎస్‌డి అజిత్‌ రెడ్డి పాల్గొన్నారు. కాగా, న్యూఢిల్లీలోని యుపిఎస్‌సి కార్యాలయంలో యుపిఎస్‌సి చైర్మన్‌ డాక్టర్‌ మనోజ్‌ సోని, కార్యదర్శి శశిరంజన్‌ కుమార్‌లతో ముఖ్యమంత్రి రేవంత్‌ రెడ్డి, రాష్ర్ట నీటిపారుదల శాఖ మంత్రి ఉత్తమ్‌ కుమార్‌రెడ్డి శుక్రవారం భేటీ అయ్యారు. ఈ సందర్భంగా టిఎస్‌పిఎస్‌సి ప్రక్షాళన, యుపిఎస్‌సి పనితీరుపై సుమారు గంటన్నర పాటు వారు చర్చించారు. యుపిఎస్‌సి పారదర్శకత పాటిస్తోందని, అవినీతి మరక అంటలేదని, ఇంత సుదీర్ఘకాలంగా అంత సమర్థంగా యుపిఎస్‌సి పని చేస్తున్న తీరుపై ముఖ్యమంత్రి ఆరా తీశారు. తెలంగాణలో నియామక ప్రక్రియలో నూతన విధానాలు, పద్ధతులు పాటించాలనుకుంటున్నట్లు ముఖ్యమంత్రి తెలిపారు. ఇందుకు స్పందించిన యుపిఎస్‌సి చైర్మన్‌ యువ ముఖ్యమంత్రి రేవంత్‌రెడ్డి నియామకాల ప్రక్రియపై దృష్టి సారించడం అభినందనీయమన్నారు. యుపిఎస్‌సి చైర్మన్‌, సభ్యుల నియామకంలో రాజకీయ ప్రమేయం ఉండదని, సమర్థత ఆధారంగా ఎంపిక ఉంటుందని తెలిపారు. తాము 2024 డిసెంబరు నాటికి రెండు లక్షల ఉద్యోగ నియామకాలు చేపట్టాలని భావిస్తున్నామని, ఇందుకు టిఎస్‌పిఎస్‌సిని ప్రక్షాళన చేయాలనుకుంటున్నామని యుపిఎస్‌సి చైర్మన్‌ దృష్టికి ముఖ్యమంత్రి రేవంత్‌ రెడ్డి తీసుకెళ్లారు. గత ప్రభుత్వం టిఎస్‌పిఎస్‌సి చైర్మన్‌, సభ్యుల నియామకాన్ని రాజకీయం చేసి, దానినో రాజకీయ పునరావాస కేంద్రంగా మార్చిందన్నారు. తామ రాజకీయ ప్రమేయం లేకుండా చైర్మన్‌, సభ్యుల నియామకం చేపడతామని ముఖ్యమంత్రి తెలిపారు. టిఎస్‌పిఎస్‌సిలో అవకతవలకు తావులేకుండా సిబ్బందిని శాశ్వత ప్రాతిపదికన నియమిస్తామని వివరించారు. స్పందించిన యుపిఎస్‌సి చైర్మన్‌ టిఎస్‌పిఎస్‌సిని యుపిఎస్‌సి తరహాలో తీర్చిదిద్దాలను కుంటున్నందున టిఎస్‌పిఎస్‌సి చైర్మన్‌తో పాటు సభ్యులకు తాము శిక్షణ ఇస్తామని, సచివాలయ సిబ్బందికి అవగాహన తరగతులు నిర్వహిస్తామని తెలిపారు. సమావేశంలో రాష్ర్ట ప్రభుత్వ ప్రధాన కార్యదర్శి శాంతి కుమారి, ముఖ్యమంత్రి ప్రిన్సిపల్‌ కార్యదర్శి వి.శేషాద్రి, ఒఎస్‌టి అజిత్‌ రెడ్డి, టిఎస్‌పిఎస్‌సి కార్యదర్శి అనితా రామచంద్రన్‌, రాష్ర్ట అటవీ, పర్యావరణ శాఖ ముఖ్య కార్యదర్శి వాణీ ప్రసాద్‌ పాల్గొన్నారు.
రక్షణ శాఖ భూములు బదలాయించండి
హైదరాబాద్‌ నగరంలో రహదారులు, ఎలివేటెడ్‌ కారిడార్ల నిర్మాణానికి రక్షణ శాఖ పరిధిలో ఉన్న భూములు కేటాయించాలని రక్షణ శాఖ మంత్రి రాజ్‌నాథ్‌ సింగ్‌ను ముఖ్యమంత్రి రేవంత్‌ రెడ్డి కోరారు. కేంద్ర మంత్రిని ఆయన నివాసంలో ముఖ్యమంత్రి రేవంత్‌రెడ్డి, రాష్ర్ట మంత్రి ఉత్తమ్‌కుమార్‌రెడ్డి శుక్రవారం సాయంత్రం కలిశారు. హైదరాబాద్‌లో ట్రాఫిక్‌ రద్దీని నివారించేందుకు మెహిదీపట్నం రైతు బజార్‌ వద్ద స్కైవాక్‌ నిర్మిస్తున్నామని, ఇందుకోసం అక్కడ ఉన్న రక్షణ శాఖ భూమి 0.21 హెక్టార్లను బదిలీ చేయాలని కేంద్ర మంత్రిని ముఖ్యమంత్రి కోరారు. ఆ భాగంలో మినహా స్కైవే నిర్మాణం పూర్తి కావస్తున్నందున ఆ భూమిని వెంటనే బదిలీ చేయాలని కోరారు. అందుకు రక్షణ శాఖ మంత్రి సుముఖత వ్యక్తం చేశారు. హైదరాబాద్‌ నుంచి కరీంనగర్‌- రామగుండం ను కలిపే రాజీవ్‌ రహదారిలో ప్యారడైజ్‌ జంక్షన్‌ నుంచి అవుటర్‌ రింగు రోడ్డు జంక్షన్‌ వరకు ఆరు లేన్ల ఎలివేటెడ్‌ కారిడార్‌ నిర్మాణం, ఎంట్రీ, ఎగ్జిట్‌ ర్యాంపుల నిర్మాణానికి మొత్తంగా 11.30 కిలోమీటర్ల కారిడార్‌ నిర్మాణానికి 83 ఎకరాల రక్షణ శాఖ భూమి అవసరమని దానిని రాష్ర్ట ప్రభుత్వానికి బదిలీ చేయాలని రక్షణ శాఖ మంత్రికి విజప్తి చేశారు. నాగ్‌పూర్‌ హైవే (ఎన్‌హెచ్‌-44)పై కండ్లకోయ సమీపంలోని ప్యారడైజ్‌ జంక్షన్‌ నుంచి అవుటర్‌ రింగ్‌ రోడ్డు వరకు ఎలివేటెడ్‌ కారిడార్‌ మొత్తంగా 18.30 కిలోమీటర్ల మేర ప్రతిపాదించామని, అందులో 12.68 కిలోమీటర్ల మేర ఆరు లేన్ల ఎలివేటెడ్‌ కారిడార్‌ నిర్మాణానికి, నాలుగు ప్రాంతాల్లో ఎగ్జిట్‌, ఎంట్రీలకు, భవిష్యత్తులో డబుల్‌ డెక్కర్‌ (మెట్రో కోసం) కారిడార్‌, ఇతర నిర్మాణాలకు మొత్తంగా 56 ఎకరాల రక్షణ శాఖ భూములు బదిలీ చేయాలని రక్షణ శాఖ మంత్రికి ముఖ్యమంత్రి విజప్తి చేశారు. ముఖ్యమంత్రి విజప్తులకు రక్షణ శాఖ మంత్రి సానుకూల స్పందన వ్యక్తం చేశారు. అదే విధంగా తెలంగాణలో సైనిక పాఠశాల ఏర్పాటు చేయాలని రక్షణ శాఖ మంత్రి రాజ్‌ నాథ్‌ సింగ్‌ ను ముఖ్యమంత్రి రేవంత్‌ రెడ్డి కోరారు.