పాలమూరు రంగారెడ్డితెలంగాణ చరిత్రలో మైలురాయి

ప్రాజెక్టు ప్రారంభోత్సవ ఏర్పాట్లపై మంత్రి కెటిఆర్‌ సమీక్ష
ప్రజాపక్షం/హైదరాబాద్‌ ఈ నెల 16వ తేదీన జరిగే పాలమూరు రంగారెడ్డి ప్రాజెక్టు ప్రారంభోత్సవం తెలంగాణ చరిత్రలో ఒక మైలురాయిగా నిలిచిపోతుందని, కనీసం లక్ష మంది రైతులతో ప్రారంభోత్సవ సభ ఉంటుందని మంత్రి కె.టి.రామారావు అన్నారు. ఇంత గొప్ప సందర్భాన్ని గొప్పగా నిర్వహించాల్సిన అవసరం ఉన్నదని, దీని విశిష్టతను ప్రజలకు తెలియజేసేలా గొప్పగా సంబరాలు చేసుకోవాలని అన్నారు. పాలమూరు- రంగారెడ్డి ప్రాజెక్టు ప్రారంభోత్సవ కార్యక్రమ ఏర్పాట్లను రాష్ట్ర సచివాలయంలో శనివారం నాడు మంత్రి కె.టి.రామారావు సమీక్షించారు. ఈ సమావేశానికి మహబూబ్‌నగర్‌, రంగారెడ్డి జిల్లా మంత్రులు నిరంజన్‌ రెడ్డి, శ్రీనివాస్‌ గౌడ్‌, సబితా ఇంద్రారెడ్డి, సత్యవతి రాథోడ్‌, వివిధ శాఖల అధిపతులు, పూర్వ జిల్లా కలెక్టర్లు పాల్గొన్నారు. వలసల జిల్లాలో ఒకనాడు పడావుపడ్డ పాలమూరు జిల్లాను పాలమూరు-రంగారెడ్డి ప్రాజెక్టు పచ్చగా చేస్తుందని కెటిఆర్‌ అన్నారు. ప్రతి ఏటా లక్షలమంది పాలమూరు ప్రజలు వలస పోయే పరిస్థితి ఉండేదని, కానీ నేడు లక్షల ఎకరాలకు సాగునీరు అందించే స్థాయి ప్రాజెక్టు ప్రారంభోత్సవం చేసుకుంటున్నామని చెప్పారు. పాలమూరుతో పాటు
రంగారెడ్డి జిల్లా భూములకు సైతం నీళ్లు అందిస్తుందన్నారు. గోదావరిలో కాలేశ్వరం, కృష్ణాలో పాలమూరు-రంగారెడ్డి లాంటి గొప్ప ప్రాజెక్టును తెలంగాణ ప్రభుత్వం కట్టింది. సీతారామ ప్రాజెక్టు కూడా పూర్తి అయితే తెలంగాణ సాగునీటి రంగంలో ప్రాజెక్టులు సంతృప్త స్థాయిలో పూర్తి అవుతాయని తెలిపారు. తెలంగాణ రాష్ట్రం కెసిఆర్‌ గారి నాయకత్వంలో కట్టిన ప్రాజెక్టులను చూసి కేవలం తెలంగాణ బిడ్డగానే కాకుండా భారత దేశ పౌరుడిగా కూడా గర్వంగా ఉంటుందని తెలిపారు. ఈ ప్రాజెక్టుల నిర్మాణం వెనక 2001 నుంచి కన్న తెలంగాణ ప్రజల కల ఇది అని, ఉద్యమ కాలం నుంచి కెసిఆర్‌ ఆలోచనల మేరకు రూపుదిద్దుకున్న గొప్ప ప్రాజెక్టు ఇది అని పేర్కొన్నారు. ప్రారంభోత్సవ కార్యక్రమానికి సంబంధించిన ఏర్పాట్లపైన ప్రభుత్వ ప్రధాన కార్యదర్శి , ఇతర విభాగాల అధిపతులతో ఈ సందర్భంగా మంత్రులు చర్చించారు. సంబంధిత ఎంఎల్‌ఏలతో మంత్రులు సభకు అవసరమైన ఏర్పాట్లను స్థానికంగా సమన్వయం చేసుకోవాలని కెటిఆర్‌ సూచించారు.