ల్యాండ్‌ పూలింగ్‌ జిఒ రద్దు చేయాలని రైతుల డిమాండ్‌
భూములు లాక్కుంటే సహించేది లేదని హెచ్చరిక
అధికార పార్టీ ఎంఎల్‌ఎలకు వ్యతిరేకంగా నినాదాలు
నాలుగు గంటల పాటు స్తంభించిన జాతీయ రహదారి
ప్రజాపక్షం/వరంగల్‌ కాకతీయ పట్టణాభివృద్ధి సంస్థ (కుడ) ఆధ్వర్యంలో చేపట్టనున్న ల్యాండపూలింగ్‌ (భూ సమీకరణ) స్కీంకు వ్యతిరేకంగా బుధవారం 27 గ్రామాల రైతుల జెఎసి ఆధ్వర్యంలో పెద్ద ఎత్తున తరలి వచ్చి నస్కల్‌ (కరుణాపురం) వద్ద జాతీయ రహదారిని దిగ్బంధించారు. దాఆదపు నాలుగు గంటల పాటు ధర్నా చేపట్టారు. ప్రభు త్వం ఏకపక్షంగా రైతుల భూములు తీసుకోవాలని చేపడుతున్న ల్యాండ పూలింగ్‌ విధానాన్ని వెంటనే రద్దు చేయాలని కెసిఆర్‌కు, కెటిఆర్‌కు, ఎమ్మెల్యే ఆరూరి రమేష్‌, చల్లా ధర్మారెడ్డి, తాటికొండ రాజయ్యకు వ్యతిరేకంగా నినాదాలు చేశారు. అన్ని గ్రామాల నుండి పెద్ద ఎత్తున రైతులు ట్రాక్టర్లలో, ఎడ్లబండిలో తరలివచ్చి రోడ్డుకు అడ్డంగా ట్రాక్టర్లను, ఎడ్ల బండ్లను పెట్టే ఆందోళన చేశా రు. రోడ్డుకు ఇరువైపులా మూడు కిలోమీటర్ల మేర వాహనాలు నిలిచిపోయాయి. పోలీసులు ముందస్తుగా కొన్ని గ్రామాలలో అరెస్టులు చేసినప్పటికీ పోలీసుల కళ్లుగప్పి పెద్ద ఎత్తున ధర్నా కార్యక్రమానికి రైతులు తరలివచ్చారు. ధర్నా, దిగ్బంధనం కార్యక్రమాన్ని పార్టీలకతీతంగా
రహదారిపై నిర్వహించారు. ఈ సందర్భంగా రైతు జెఎసి కన్వీనర్‌ దేశి నేని హనుమంతరావు మాట్లాడుతూ రాష్ట్ర ప్రభుత్వం అక్రమంగా ల్యాండ పూలింగ్‌ పేరుతో భూములను లాక్కోవడానికి జారీ చేసిన జిఒ 80ఎను రద్దు చేయాలని డిమాండ్‌ చేశారు. కాకతీయ పట్టణ అభివృద్ధి సంస్థ ఆధ్వర్యంలో చేపట్టే భూ సేకరణ విధానంలో రైతులు ఎవరూ భూమిని వదులుకోవడానికి సిద్ధంగా లేరని, ప్రభుత్వం చేపట్టే ఈ కార్యక్రమాన్ని 27 గ్రామాల రైతులు వ్యతిరేకిస్తున్నారని, ఈ చర్య వల్ల లక్ష మంది నిరాశ్రయులవుతారని ఆయన ఆవేదన వ్యక్తం చేశారు. ప్రభుత్వం తీసుకున్న అనాలోచిత చర్యను వెంటనే ఉపసంహరించుకోవాలని డిమాండ్‌ చేసారు. జాతీయ రహదారి దిగ్బంధంతో అధికారులు వచ్చి జిఒను రద్దు చేస్తున్నామని చెప్పేంతవరకు ధర్నా కొనసాగిస్తామన్నారు. కాగా, సుమారు మూడు గంటల సేపు జాతీయ రహదారి దిగ్బంధం కావడంతో ట్రాఫిక్‌ స్తంభించడంతో పోలీసులు చేసేదిలేక ఉన్నతాధికారులకు వాస్తవ ధర్నాను తెలియజేశారు. జనగామ జిల్లా జాయింట్‌ కలెక్టర్‌ వచ్చి రైతులకు సర్దిచెప్పే ప్రయత్నం చేసినప్పటికీ.. మీకు సంబంధం లేని విషయమని, ఉడా వైస్‌ చైర్మన్‌ వచ్చి జిఒను రద్దు చేస్తున్నామని చెప్పాలని రైతులు మూకుమ్మడిగా ధర్నాలో భీష్మించి కూర్చున్నారు. జిఒ రద్దు విషయంలో ఆలోచిస్తామని, ప్రస్తుతం ధర్నా విరమించాలని జనగామ జాయింట్‌ కలెక్టర్‌ రైతులను కోరినప్పటికీ… మహిళలు రైతులు ఆయన విజ్ఞప్తిని ఖాతరు చేయలేదు. చేసేదిలేక పోలీసులు, జనగామ జిల్లా కలెక్టర్‌ మిన్నకుండిపోయారు. పోలీసులు పలు మార్లు వాహనాలు తెప్పించి అరెస్టు చేస్తామని రైతుల వద్దకు రాగా పెద్ద ఎత్తున రైతులు ప్రభుత్వానికి వ్యతిరేకంగా, కెసిఆర్‌ డౌన్‌డౌన్‌, కెటిఆర్‌ డౌన్‌డౌన్‌, స్థానిక ఎమ్మెల్యేలు ఆరూరి రమేష్‌, చల్లా ధర్మారెడ్డి, రాజయ్యకు వ్యతిరేకంగా నినాదాలు చేస్తూ వారి దిష్టిబొమ్మను చెప్పుతో కొట్టి దహనం చేశారు. దిష్టి బొమ్మను తగలబెట్టకుండా పోలీసులు అడ్డుకున్నప్పటికీ వారి వద్ద నుంచి బొమ్మను గుంజుకొని మరీ తగులబెట్టారు. ఆందోళన కార్యక్రమంలో బిజెపి హనుమకొండ అధ్యక్షురాలు రావు పద్మ, పార్టీ అధికార ప్రతినిధి రాకేష్‌ రెడ్డి, మాజీ ఎమ్మెల్యే ధర్మారావు, మాజీ మంత్రి డాక్టర్‌ విజయ రామారావు, కాంగ్రెస్‌ పార్టీ తరఫున మాజీ ఎంపి సిరిసిల్ల రాజయ్య, దొమ్మాటి సాంబయ్య, కాంగ్రెస్‌ పార్టీ నాయకులు, అదేవిధంగా సిపిఎం నాయకులు పాల్గొని రైతుల ధర్నా కార్యక్రమానికి సంపూర్ణ మద్దతు తెలిపారు. ఈ సందర్భంగా కాంగ్రెస్‌, బిజెపి నాయకులు మాట్లాడుతూ రాష్ట్ర ప్రభుత్వం అక్రమంగా తీసుకొచ్చిన ల్యాండ పూలింగ్‌ జిఒ విధానాన్ని వెంటనే ఉపసంహరించుకోవాలని, వరంగల్‌, హనుమకొండ, జనగామ జిల్లాల రైతుల భూములను లాక్కోవడానికి ప్రయత్నం చేస్తే ప్రభుత్వానికి తగిన బుద్ధి చెబుతామని హెచ్చరించారు. ఆందోళన కార్యక్రమంలో రైతు జెఎసి నాయకులు రవీందర్‌ రెడ్డి, యాకూబ్‌, శ్రావణ్‌ రెడ్డితో పాటు 27 గ్రామాల నుండి వచ్చిన వేలాది మంది రైతులు పాల్గొన్నారు.
