ఢిల్లీలో సిఎం కెసిఆర్‌ డ్రామాలాడుతున్నారు
రేవంత్‌ రెడ్డి విమర్శ
ప్రజాపక్షం / హైదరాబాద్‌ ఇకపై తెలంగాణ నుంచి బాయిల్డ్‌ రైస్‌ ఇవ్వబోమని ధాన్యం కొనుగోలుపై మీరే లేఖ ఇచ్చి, ఇప్పుడు ఢిల్లీలో ధర్నాలు , నిరనల డ్రామాలు ఆడుతుఆన్నరని సీఎం కేసీఆర్‌ను టీపీసీసీ అధ్యక్షులు, ఎంపీ ఎ.రేవంత్‌రెడ్డి విమర్శించారు. ఈ మేరకు పది ప్రశ్నలను సంధిస్తూ మంగళవారం నాడు బహిరంగ లేఖ రాశారు. ధాన్యం కొనుగోళ్ల వల్ల రాష్ర్ట ప్రభుత్వానికి రూ. 7,500 కోట్ల నష్టం వచ్చిందని, క్రయవిక్రయాలు ప్రభుత్వం బాధ్యత ఎంత మాత్రం కాదని, ఇకపై కొనుగోలు కేంద్రాలు ఉండబోవని 2021 ఫిబ్రవరిలో మీరు ప్రకటన చేసింది వాస్తవం కాదా? అని అన్నారు. ధాన్యం కొనుగోళ్ల బాధ్యత నుండి తప్పుకునే కుతంత్రానికి మీరు ఆ నాడే బీజం వేశారనడానికి ఇది నిదర్శనం కాదా? యాసంగి సీజన్‌ సన్నాహాలపై ఫిబ్రవరి 25, మార్చి 8న కేంద్ర ఆహార శాఖ నిర్వహించిన వీడియో కాన్ఫరెన్స్‌ లో ఈ సారి తెలంగాణలో రాష్ర్ట ప్రభుత్వం ధాన్యం కొనబోదు, కొనుగోలు కేంద్రాలు ఉండవు అని మీ సూచన మేరకు రాష్ర్ట ప్రభుత్వ అధికారులు చెప్పిన మాట వాస్తవం కాదా? అని ప్రశ్నను సంధించారు. యాసంగి ధాన్యం సేకరణ సన్నాహకాలు సహజంగా మార్చి మొదటి వారంలోనే ప్రారంభించాలి కదా! నిజంగా ధాన్యం కొనుగోలు పై మీకు చిత్తశుద్ధి ఉంటే కొనుగోలు కేంద్రాల ఏర్పాటు, గోనె సంచులకు టెండర్లు, రైస్‌ మిల్లర్లకు కోటా కేటాయింపు, ట్రాన్స్‌ పోర్టేషన్‌ టెండర్లు తదితర ప్రక్రియను ఇంత వరకు ఎందుకు పూర్తి చేయలేదు? అని రేవంత్‌రెడ్డి ప్రశ్నించారు. కేంద్ర రాష్ర్ట ప్రభుత్వాల బ్లేమ్‌ గేమ్‌ తో ఇప్పటికే రైతులు దళారీల చేతుల్లో నష్టపోతున్న విషయం నిజం కాదా? కనీస మద్ధతు ధర రూ.1960 ఉండగా, మీరు చేతులెత్తేయడంతో రైతులు నిస్సహాయ స్థితిలో రైస్‌ మిల్లర్ల కు రూ.1200 -1400 లకే ధాన్యం తెగనమ్ముకుంటున్న మాట వాస్తవం కాదా? దీని వల్ల తెలంగాణ రైతాంగానికి సుమారు రూ.3000 కోట్ల మేర నష్టం వస్తుందన్న విషయం మీకు తెలియదా? అని అన్నారు. రైస్‌ మిల్లర్లతో టీఆర్‌ఎస్‌ నాయకులు కుమ్మక్కై రైతుల కష్టాన్ని అగ్గువకే దోచేస్తూ సొమ్ము చేసుకుంటున్నారన్న ఆరోపణలు వినిపిస్తున్నాయని, మిల్లర్ల మాఫియాతో మీ కుటుంబ సభ్యులే ఒప్పందాలు చేసుకుని రైతులను నిండా ముంచుతున్నారన్న ఆరోపణలకు మీ సమాధానం ఏమిటి? అని ప్రశ్నించారు. డీ సెంట్రలైజ్డ్‌ ప్రొక్యూర్‌ మెంట్‌ సిస్టమ్‌ లో తెలంగాణ కూడా భాగస్వామిగా ఉంది. అంటే… ఈ విధానంలో కొనుగోలు కేంద్రాలు ఏర్పాటు చేసి ధాన్యం కొని ఎఫ్‌ సీఐకి సరఫరా చేయడం రాష్ర్ట ప్రభుత్వ బాధ్యత. మీ బాధ్యతను నెరవేర్చకుండా ఢిల్లీలో అతి కొద్ది గంటల నిరసన దీక్షల పేరుతో, అది పార్లమెంట్‌ సమావేశాలు ముగిసి ఎక్కడి వారు అక్కడకు వెళ్లిపోయాక డ్రామాలు చేయడం మీకు రాజకీయ ప్రయోజనాన్ని ఇస్తుంది తప్ప… రైతు ధాన్యం కొనుగోలుకు పరిష్కారం ఎలా దొరుకుతుంది? అని అన్నారు. మీ దిక్కుమాలిన ఈగోలతో రైతులనే కాదు… రాష్ర్టంలో సివిల్‌ సప్లు కార్పొరేషన్‌ మనుగడనే ప్రశ్నార్థకం చేస్తున్నది వాస్తవం కాదా? అని అన్నారు. సివిల్‌ సప్లు కార్పొరేషన్‌ సేకరించిన ధాన్యానికి ఎఫ్‌ సీఐ 2.5 శాతం కమీషన్‌ చెల్లిస్తోందని, గత ఏడాది యాసంగి సీజన్‌ లో సివిల్‌ సప్లు కార్పొరేషన్‌ రూ.17,914 కోట్ల విలువైన 92 లక్షల టన్నుల ధాన్యాన్ని సేకరించగా దానికి కమీషన్‌ గా రూ.447 కోట్ల ఆదాయం వచ్చిందన్నారు. ప్రజా పంపిణీ వ్యవస్థ నిర్వహణ, ఉద్యోగుల వేతనాలు ఖర్చులన్నీ ఈ ఆదాయం నుంచే చెల్లిస్తున్నారని, కార్పొరేషన్‌ కు రాష్ర్ట ప్రభుత్వం నుంచి నయాపైసా ఇవ్వడం యాసంగిలో ఎఫ్‌సిఐ ఆమోదించిన దానికంటే 18 కిలోలు అదనంగా నూక వస్తుందని, అందులో సగం ఎఫ్‌సిఐ తీసుకుంటుందని, మిగతా తొమ్మది కిలోల నష్టాన్ని రాష్ర్ట ప్రభుత్వం భరిస్తే సమస్య పరిష్కారం అవుతుందని, దీని విలువ తిప్పి కొట్టినా రూ.1500 కోట్లకు మించి కాదన్నారు. రైతుల కోసం రూ.1500 కోట్లు ఖర్చు చేయడం మీకు ఇష్టం లేదా? అని అన్నారు. యాసంగి సీజన్‌ ముందస్తుగా చేతికి వచ్చే ధాన్యం సుమారు 10 లక్షల టన్నుల వరకు ఉంటుందని అంచనా. ఇలా రా రైస్‌ గా వచ్చే ధాన్యాన్ని కూడా కొనుగోలు చేయడానికి మీరు ఏర్పాట్లు చేయలేదంటే… రైతులను నిండా ముంచాలన్న దురుద్ధేశం తప్ప… ఇంకేం అనుకోవాలి? అని రేవంత్‌రెడ్డి అన్నారు.
