ఎపిలోకి ఒమిక్రాన్‌

దేశంలో 38కు చేరిన కేసులు..!
ఆంధ్రప్రదేశ్‌, చండీగఢ్‌, కేరళలో తొలికేసు నమోదు
న్యూఢిల్లీ : కొత్తగా వెలుగు చూసిన ఒమిక్రాన్‌ వేరియంట్‌ కేసుల సంఖ్య భారత్‌లో క్రమంగా పెరుగుతోంది. ఇప్పటికే దేశవ్యాప్తంగా 33కేసులు నమోదు కాగా తాజాగా ఆంధ్రప్రదేశ్‌, చండీగఢ్‌, కేళరలో కొత్తగా ఒక్కొక్క కేసు నమోదు కాగా, కర్ణాటక, మహారాష్ట్రలో మరోసారి ఒక్కొక్క కేసు చొప్పున వెలుగు చూశాయి. ఎపి, చండీగఢ్‌ రాష్ట్రాల్లో ఇవే మొదటి కేసులు కాగా కర్ణాటకలో మాత్రం ఇది మూడోవది, ఇక మహారాష్ట్రలో 18వది కావడం భయాందోళనలకు కలిగిస్తుంది. దీంతో దేశంలో కొత్త వేరియంట్‌ కేసుల సంఖ్య 38కు పెరిగింది. చండీగఢ్‌లోని బంధువులను కలిసేందుకు ఓ ఇరవై ఏళ్ల యువకుడు నవంబర్‌ 22న ఇటలీ నుంచి భారత్‌ చేరుకున్నాడు. అనంతరం హోం క్వారంటైన్‌లో ఉన్న అతడికి డిసెంబర్‌ 1న అధికారులు కొవిడ్‌ పరీక్షలు నిర్వహించారు. వాటిలో పాజిటివ్‌గా తేలడంతో ఆ నమూనాలను జీనోమ్‌ సీక్వెన్సింగ్‌కు పంపించారు. తాజాగా అందులో ఒమిక్రాన్‌ వేరియంట్‌గా నిర్ధారణ అయ్యింది. అతడికి లక్షణాలేవీ లేవని, ఇటలీలో ఆ యువకుడు రెండు డోసులు (ఫైజర్‌) వ్యాక్సిన్‌ తీసుకున్నట్లు అధికారులు వెల్లడించారు. ప్రస్తుతం అతన్ని స్థానిక కొవిడ్‌ కేంద్రంలో క్వారంటైన్‌లో ఉంచిన అధికారులు.. అతడికి సన్నిహితంగా మెలిగిన మరో ఏడుగురిని క్వారంటైన్‌లో ఉంచి పరీక్షిస్తున్నామని వెల్లడించారు. ఆంధ్రప్రదేశ్‌లో తొలి ఒమిక్రాన్‌ కేసు నమోదైంది. విజయనగరం జిల్లాకు చెందిన 34 ఏళ్ల వ్యక్తికి ఒమిక్రాన్‌ సోకినట్లు రాష్ట్ర వైద్య ఆరోగ్యశాఖ ప్రకటించింది. సదరు వ్యక్తి గతనెల 27న ఐర్లాండ్‌ నుంచి ముంబయి మీదుగా విశాఖ చేరుకున్నాడు. విశాఖ విమానాశ్రయంలో ఆర్‌టీ-పీసీఆర్‌ పరీక్ష నిర్వహించగా కరోనా నిర్ధారణ అయింది. దీంతో ఆ నమూనాను జీనోమ్‌ సీక్వెన్సింగ్‌కు పంపగా తాజాగా వచ్చిన ఫలితంలో ఒమిక్రాన్‌గా నిర్ధారణ అయ్యింది. ఆంధ్రప్రదేశ్‌లో ఇదే తొలి ఒమిక్రాన్‌ కేసు. ఇక దక్షిణాఫ్రికా నుంచి కర్ణాటకకు వచ్చిన ఓ 34ఏళ్ల వ్యక్తికి ఒమిక్రాన్‌ నిర్ధారణ అయ్యింది. దీంతో ఆ రాష్ట్రంలో కొత్త వేరియంట్‌ కేసుల సంఖ్య మూడుకు చేరుకుంది. తాజాగా ఒమిక్రాన్‌ వెలుగు చూసిన యువకుడి ఐదుగురు ప్రైమరీ, 15 సెకండరీ కాంటాక్టులను గుర్తించి కొవిడ్‌ పరీక్షలు నిర్వహించినట్లు ఆ రాష్ట్ర ఆరోగ్యశాఖ తెలిపింది. యుకె నుంచి కేరళ కోచి వచ్చిన వ్యక్తికి ఒమిక్రాన్‌ సోకింది. ఈనెల 6న రాష్ట్రానికి వచ్చిన అతడికి పరీక్షలు చేయగా.. కొవిడ్‌ పాజిటివ్‌ అని ఈనెల 8న నిర్ధరణ అయింది. జీనోమ్‌ సీక్వెన్సింగ్‌లో ఒమిక్రాన్‌ వైరస్‌ సోకినట్లు తేలింది. మహారాష్ట్రలోని నాగ్‌పూర్‌లో తొలి ఒమైక్రాన్‌ కేసు వెలుగు చూసింది. 40 ఏళ్ల వ్యక్తి ఒమిక్రాన్‌ వేరియంట్‌ బారినపడినట్టు నాగ్‌పూర్‌ మునిసిపల్‌ కమిషనర్‌ రాధాకృష్ణన్‌ బి తెలిపారు. బాధితుడు 8 రోజుల క్రితం పశ్చిమ ఆప్రికా నుంచి వచ్చినట్టు పేర్కొన్నారు. ఆయనకు నిర్వహించిన పరీక్షల్లో కరోనా సోకినట్టు నిర్ధారణ అయిందని, దీంతో నగరంలోని ఓ ఆసుపత్రిలో చేరినట్టు చెప్పారు. అక్కడ ఆయన నుంచి నమూనాలు సేకరించి జినోమ్‌ సీక్సెన్సింగ్‌కు పంపగా ఒమైక్రాన్‌ సోకినట్టు నిర్ధారణ అయిందన్నారు. అతడిని కలిసిన వారికి పరీక్షలు నిర్వహించగా అందరికీ నెగటివ్‌ వచ్చినట్టు తెలిపారు. తాజాగా కేసుతో కలుపుకుని మహారాష్ట్రలోని మొత్తం ఒమిక్రాన్‌ కేసుల సంఖ్య 18కి పెరిగింది. ఇక ఢిల్లీ, రాజస్థాన్‌, మహారాష్ట్ర, కర్ణాటక, గుజరాత్‌ రాష్ట్రాల్లో ఇప్పటికే ఒమిక్రాన్‌ కేసులు వెలుగు చూశాయి. వీటిలో ఒక్క మహారాష్ట్రలోనే అత్యధిక కేసులు నమోదయ్యాయి. ఇదిలాఉంటే, ప్రపంచ వ్యాప్తంగా ఈ వేరియంట్‌ ఇప్పటికే 59 దేశాలకు విస్తరించినట్లు అంతర్జాతీయ నివేదికలు వెల్లడిస్తున్నాయి. ఇప్పటివరకు బ్రిటన్‌, డెన్మార్క్‌, దక్షిణాఫ్రికాల్లోనే అత్యధికంగా నమోదవుతున్నాయి. అయినప్పటికీ ఒమిక్రాన్‌తో ఇప్పటివరకు ఒక్క మరణం కూడా సంభవించలేదు.