బడులపై నిర్ణయం వ్యాక్సిన్‌పై కార్యాచరణ

11న సిఎం కీలక భేటీ
ప్రజాపక్షం/హైదరాబాద్‌  రెవెన్యూ, వైద్యం, విద్యా, పంచాయతీరాజ్‌,మున్సిపల్‌, అటవీ శాఖలతో పాటు ఇతర శాఖల ముఖ్యమైన అంశాలపై ఈ నెల 11న ఉదయం 11.30 గంటల నుండి అన్ని జిల్లాల కలెక్టర్లతో ప్రగతి భవన్‌లో ముఖ్యమంత్రి కె.చంద్రశేఖర్‌ రావు, రాష్ట్ర మంత్రులు సమావేశం కానున్నారు. ఈ శాఖలకు సంబంధించిన ముఖ్యమైన అంశాలపై చర్చించి నిర్ణయాలు తీసుకుంటారు. ముఖ్యంగా విద్యా సంస్థల ప్రారంభంపై ఒక నిర్ణయాన్ని ప్రకటించనున్నారు. అలాగే కరోనా వ్యాక్సిన్‌ పంపిణీ కార్యాచరణ రూపకల్పన చేయనున్నారు. ఈ మేరకు ముఖ్యమంత్రి కార్యాలయం శుక్రవారం ఒక ప్రకటన విడుదల చేసింది. రెవెన్యూకు సంబంధించిన అంశాలపై ముఖ్యమంత్రి కెసిఆర్‌ ఇటీవల ప్రగతి భవన్‌లో సీనియర్‌ అధికారులు, కొంతమంది కలెక్టర్లతో సమావేశమైన విషయం తెలిసిందే. ఆ సమావేశంలో రెవెన్యూకు సంబంధించి పరిష్కరించాల్సిన కొన్ని అంశాలు ప్రస్తావనకు వచ్చాయి. 11వ తేది నాడు జరిగే సమావేశంలో రెవెన్యూకు సంబంధించిన అంశాలను కూలంకషంగా చర్చిస్తారు. పెండింగ్‌ మ్యుటేషన్లు, సాదా బైనామాల క్రమబద్ధీకరణ, ట్రిబ్యూనల్స్‌ ఏర్పాటు, పార్ట్‌.బి.లో చేర్చిన అంశాల పరిష్కారం తదితర విషయాలపై సమాశంలో చర్చిస్తారు. రెవెన్యూకు సంబంధించిన అన్ని అంశాలను సత్వరం పరిష్కరించేందుకు సిఎం అవసరమైన కార్యాచరణను నిర్ణయిస్తారు. పల్లె ప్రగతి, పట్టణ ప్రగతి కార్యక్రమాల అమలును సిఎం కెసిఆర్‌ సమీక్షిస్తారు. గ్రామాలకు, పట్టణాలకు నిధులు సకాలంలో అందుతున్నాయా? వాటి వినియోగం ఎలా ఉంది ? తదితర అంశాలు చర్చకు రానున్నాయి. అలాగే పనుల పురోగతిని సమీక్షిస్తారు. తెలంగాణకు హరితహారం కార్యక్రమంలో భాగంగా గ్రామాల్లో, పట్టణాల్లో పచ్చదనం పెంచడానికి తీసుకుంటున్న చర్యలు, భవిష్యత్తులో చేపట్టాల్సిన కార్యక్రమాలపై సమీక్షిస్తారు.
కరోనా వ్యాక్సిన్‌పై కార్యాచరణ
రాష్ట్రంలో కరోనా వ్యాప్తి, నివారణకు తీసుకుంటున్న చర్యలు, కరోనా వ్యాక్సిన్‌ను ప్రజలకు అందించే కార్యాచరణపై చర్చిస్తారు. వ్యాక్సిన్‌ అన్ని ప్రాంతాలకు సరఫరా చేయడం, ప్రధాన్యతా క్రమంలో వ్యాక్సిన్‌ ను పౌరులకు వేయడానికి సంబంధించిన కార్యాచరణను రూపొందిస్తారు. బోధన తరగతులపై నిర్ణయం రాష్ట్రంలో విద్యా సంస్థల్లో తరగతులను ఎప్పటి నుండి తిరిగి ప్రారంభించాలనే అంశంపై ఈ సమావేశంలో సిఎం కెసిఆర్‌ చర్చిస్తారు. ఏ తరగతి నుండి క్లాసులు నిర్వహించాలి ? ఏ విధంగా నిర్వహించాలి ? ఇతర రాష్ట్రాల్లో అనుసరిస్తున్న విధానం ఏమిటి ? తదితర అంశాలపై కూలంకషంగా చర్చించి నిర్ణయం తీసుకుంటారు. ఈ సమావేశానికి కలెక్టర్లు, అధికారులు సమగ్ర సమాచారంతో రావాలని ముఖ్యమంత్రి ఆదేశించారు