ప్రపంచ ఆహార కార్యక్రమానికి శాంతి నోబెల్‌

రోమ్‌: ఈ ఏడాది ప్రతిష్ఠాత్మక నోబెల్‌ శాంతి పురస్కారాన్ని ప్రపంచ ఆహార కార్యక్రమానికి(డబ్ల్యుఎఫ్‌పి) ప్రకటించారు. ప్రపంచవ్యాప్తంగా కోట్లాది మంది ఎదుర్కొంటున్న ఆకలి సమస్యను తీర్చడానికి ఈ సంస్థ చేస్తున్న ప్రయత్నాలకు, సంక్షోభిత ప్రాంతాల్లో శాంతిని నెలకొల్పేందుకు చేసిన సేవలకుగానూ డబ్ల్యుఎఫ్‌పిని నోబెల్‌ శాంతి బహుమతికి ఎంపిక చేశారు. సంక్షోభిత ప్రాంతాల్లో ఆకలిని ఆయుధంగా చేసుకోవడాన్ని ఈ కార్యక్రమం అరికడుతోందని నోబెల్‌ కమిటీ కితాబిచ్చింది. ఐక్యరాజ్యసమితికి చెందిన ప్రపంచ ఆహార కార్యక్రమం (డబ్ల్యుఎఫ్‌పి) ప్రపంచంలోనే అతిపెద్ద మానవీయ సంస్థ. ఆకలి సమస్యను ఎదుర్కోవడం, ఆహార భద్రతపై అవగాహన కల్పించడంలో ఈ సంస్థ విశేష సేవలందిస్తోంది. యుద్ధం, సంక్షోభ పరిస్థితుల కారణంగా ప్రపంచవ్యాప్తంగా కోట్లాది మంది ప్రజలు తీవ్రమైన ఆకలి బాధలకు గురవుతున్నారు. ఒక్క 2019లోనే 135 మిలియన్ల మంది ఆకలి సమస్యను ఎదుర్కొన్నారు. ఈ సమస్యను తీర్చడానికి, ఆకలి బాధలను నిర్మూలించేందుకు డబ్ల్యుఎఫ్‌పి నిరంతరం కృషచేస్తోంది. ఇందులో భాగంగానే గతేడాది 88 దేశాల్లో దాదాపు 100 మిలియన్ల మంది అన్నార్థుల ఆకలి తీర్చింది డబ్ల్యుఎఫ్‌పి. ప్రస్తుతం ప్రపంచమంతా విలయతాండవం చేస్తోన్న కరోనా మహమ్మారి.. ఈ ఆకలి బాధలను మరింత పెంచింది. యెమెన్‌, కాంగో, నైజీరియా, దక్షిణ సూడాన్‌, బుర్కినాఫాసో లాంటి దేశాల్లో అటు హింసాత్మక ఘర్షణలు, ఇటు కరోనా వల్ల ఆకలి తీవ్ర రూపం దాల్చింది. ఈ దేశాల్లో తిండిలేక ఎంతో మంది విలవిల్లాడిపోతున్నారు. ఇలాంటి వారి కోసం డబ్ల్యుఎఫ్‌పి అనేక సేవా కార్యక్రమాలు చేపట్టింది. అంతేగాక, యుద్ధంతో సతమతమవుతున్న ప్రాంతాల్లో శాంతిని నెలకొల్పేందుకు కృషి చేస్తోంది. కాగా, అంతర్జాతీయ సంఘీభావం, బహుపాక్షిక సహకారం అవసరం ఉందని గతంలో కంటే ఎక్కువ స్పష్టంగా ఇప్పుడు తెలుస్తోందని నోబెల్‌ కమిటీ చైర్‌ విమెన్‌ బెరిట్‌ రీస్‌ తెలిపారు. శాంతి పురస్కారం అందుకోనున్న డబ్ల్యుఎఫ్‌పికి డిసెంబరు 10న ఓస్లోలో జరగనున్న కార్యక్రమంలో 10 మిలియన్ల స్వీడిష్‌ క్రౌన్లు (దాదాపు 1.1 మిలియన్‌ డాలర్లు) అందించనున్నారు. నోబెల్‌ శాంతి పురస్కారం లభించడంపై రోమ్‌కు చెందిన డబ్ల్యుఎఫ్‌పి మాట్లాడుతూ.. ప్రపంచంలోని ప్రతి 9 మందిలో ఒకరు సరైన తిండికి నోచుకోవడం లేదని ఆవేదన వ్యక్తం చేసింది. ప్రతి ఏడాది ప్రపంచవ్యాప్తంగా దాదాపు 88 దేశాల్లోని 97 మిలియన్ల మందికి సాయం చేస్తున్నట్టు తెలిపింది.