HomeNewsBreaking Newsఇందూరు పోరు

ఇందూరు పోరు

నిజామాబాద్‌ స్థానిక సంస్థల ఎంఎల్‌సి ఉపఎన్నికకు సర్వం సిద్ధం
నేడు ఉదయం 9 నుంచి సాయంత్రం 5 గంటల వరకు పోలింగ్‌
టిఆర్‌ఎస్‌, కాంగ్రెస్‌, బిజెపి మధ్య త్రిముఖ పోటీ
ప్రజాపక్షం / హైదరాబాద్‌
నిజామాబాద్‌ స్థానిక సంస్థల ఎంఎల్‌సి ఉపఎన్నికకు సర్వం సిద్ధమైంది. శుక్రవారం ఉదయం 9 గంటల నుంచి సాయంత్రం 5 గంటల వరకు పోలింగ్‌ జరగనుంది. ముగ్గురు అభ్యర్థులు ఎం ఎల్‌సి స్థానం కోసం పోటీ పడుతున్నారు. టిఆర్‌ఎస్‌ నుంచి మాజీ ఎంపి కవిత, కాంగ్రెస్‌ నుంచి సుభాశ్‌రెడ్డి, బిజెపి తరఫున పోతంకర్‌ లక్ష్మీనారాయణ పోటీలో ఉన్నారు. నిజామాబాద్‌ స్థానిక సంస్థల ఎంఎల్‌సి ఉపఎన్నిక పోలింగ్‌… కొవిడ్‌ మార్గదర్శకాలకు అనుగుణంగా జరగనుంది. ఉమ్మడి నిజామాబాద్‌ జిల్లాలోని 824 మంది స్థానిక సంస్థల

ప్రజాప్రతినిధులు ఓటు హక్కు వినియోగించుకోనున్నారు. వీళ్లలో 24మంది కొవిడ్‌ పాజిటివ్‌గా తేలారు. వీరిలో ఒకరు పోస్టల్‌ బ్యాలెట్‌ ద్వారా ఓటు వేశారు. మిగతా వాళ్లు పోలింగ్‌ చివరి గంటలో ఓటు వేయనున్నారు. సొంత వాహనం.. లేదంటే ప్రత్యేకంగా అంబులెన్స్‌ సౌకర్యం కల్పిస్తారు. పిపిఇ కిట్‌ ధరించిన తర్వాతే పోలింగ్‌ కేంద్రంలోకి అనుమతిస్తారు. కాగా, మండలానికి ఒకటి చొప్పున మొత్తం 50 పోలింగ్‌ కేంద్రాలు ఏర్పాటు చేశారు. నిజామాబాద్‌ జిల్లాలో 483, కామారెడ్డి జిల్లాలో 341మంది ఓటర్లు ఉన్నారు. అత్యధికంగా నిజామాబాద్‌ నగర పాలక సంస్థ పరిధిలో 67, చందూర్‌ మండల పరిషత్‌లో నలుగురు ఓటర్లు ఉన్నారు. పోలింగ్‌ కోసం 399 మంది సిబ్బంది విధులు నిర్వర్తిస్తారు. పోలీసు బందోబస్తు కోసం 963 మందిని కేటాయించారు. ఒక అదనపు డిసిపి, ఆరుగురు ఎసిపిలు, 22మంది సిఐలు, ముగ్గురు ఏఆర్‌ ఎస్‌ఐలు, 72 మంది ఎస్‌ఐలు మిగతా సిబ్బంది ఉన్నారు. ప్రతి పోలింగ్‌ కేంద్రం వద్ద 144 సెక్షన్‌ విధించారు. పోలింగ్‌ కేంద్రానికి వంద మీటర్ల దూరంలో ఉండే కార్యాలయాలు, సంస్థలకు సెలవు ప్రకటించారు. బ్యాలెట్‌ పద్ధతిలో ఎంఎల్‌సి ఉపఎన్నిక పోలింగ్‌ జరగనుంది. ప్రాధాన్య అంకె రూపంలో ఓటును నమోదు చేయాల్సి ఉంటుంది. బ్యాలెట్‌ పేపర్‌పై అభ్యర్థి పేరు, చిత్రం, పార్టీ పేరు ఉంటుంది. పార్టీ గుర్తు బ్యాలెట్‌పై ఉండదు. ఓటరు వేలుకు ఎలాంటి సిరా చుక్క వేయరు. ఉదయం తొమ్మిది గంటల నుంచి సాయంత్రం 5 గంటల వరకు ఓటేసేందుకు అవకాశం కల్పించారు. ఓటింగ్‌ పూర్తయినా.. పోలింగ్‌ సయమం ముగిసే వరకు పోలింగ్‌ సిబ్బంది పోలింగ్‌ కేంద్రాల్లోనే ఉంటారు. పోలింగ్‌ ముగిసే వరకు మద్యం దుకాణాలు మూసివేస్తారు. కొవిడ్‌ నేపథ్యంలో ప్రత్యేక జాగ్రత్తల నడుమ ఎన్నిక జరగనుంది. సిబ్బందికి పోలింగ్‌ సామాగ్రితోపాటు కొవిడ్‌ కిట్లు అందించారు.
ఓటేయనున్న ఎక్స్‌అఫీషియో సభ్యులు
ఎంఎల్‌సి ఉపఎన్నికలో ఎక్స్‌ అఫీషియో సభ్యులుగా ఉన్న ఎంఎల్‌ఎలు, ఎంఎల్‌సిలు ఓటు హక్కును వినియోగించుకోనున్నారు. ఎంఎల్‌ఎలు బిగాల గణేశ్‌ గుప్తా, బాజిరెడ్డి గోవర్ధన్‌, జీవన్‌రెడ్డి, ప్రశాంత్‌ రెడ్డి, షకీల్‌, గంప గోవర్ధన్‌, పోచారం శ్రీనివాసరెడ్డి, సురేందర్‌ తోపాటు ఎంఎల్‌సిలు విజిగౌడ్‌, ఆకుల లలిత, రాజేశ్వర్‌ ఓటు వేయనున్నారు. బిజెపి ఎంపి అరవింద్‌ సైతం ఓటు హక్కు వినియోగించుకోనున్నారు. రాజ్యసభ సభ్యులు డి.శ్రీనివాస్‌, సురేశ్‌రెడ్డి, డిహెచ్‌ఎంసిలో ఎక్స్‌అఫీషియో సభ్యులుగా ఉండటం వల్ల ఇక్కడ ఓటేసే అవకాశం లేదు.

DO YOU LIKE THIS ARTICLE?
Prajapaksham
Prajapaksham
Praja Paksham Telugu News (తెలుగు వార్తలు) offers the Latest Telugu News, Breaking News in Telugu (ముఖ్యాంశాలు) from Andhra Pradesh and Telangana. National News, International News Headlines in Telugu Daily. prajapaksham.in is flagship online website of PrajaPaksham Newspaper
RELATED ARTICLES
- Advertisment -
Google search engine

Most Popular

Recent Comments