రెవెన్యూ చట్టం గురించి గవర్నర్‌ తమిళిసైకి వివరించిన సిఎం కెసిఆర్‌
కరోనా సహా ఇటీవలి పరిణామాలపై చర్చ
ప్రజాపక్షం / హైదరాబాద్‌ రాష్ట్ర ప్రభుత్వం ఇటీవల తీసుకువచ్చిన నూతన రెవెన్యూ చట్టం, దాని అమలు గురించి ముఖ్యమంత్రి కె.చంద్రశేఖర్‌రావు గవర్నర్‌ తమిళిసై సౌందర్‌ రాజన్‌కు వివరించారు. సిఎం కెసిఆర్‌ శుక్రవారం రాజ్‌భవన్‌లో గవర్నర్‌తో భేటీ అయ్యారు. రాష్ట్రంలో కరోనా పరిస్థితుల నుంచి ఇటీవల ప్రభుత్వం తీసుకువచ్చిన నూతన రెవెన్యూ చట్టం వరకు అనేక అంశాలను సిఎం కెసిఆర్‌ గవర్నర్‌కు వివరించారు. దసరా నుంచి సరికొత్త రెవెన్యూ విధానం అమలు, ధరణి పోర్టల్‌ ప్రారంభం, వ్యవసాయేతర ఆస్తుల నమోదు విధివిధానాల పట్ల ఆయన గవర్నర్‌తో చర్చించారు. ఈ సందర్భంగా ఆంధ్రప్రదేశ్‌తో జలవివాదాలపైనా ఇరువురి మధ్య ప్రస్తావన వచ్చినట్టు తెలిసింది. రాయలసీమ ఎత్తిపోతల పథకం వల్ల తెలంగాణకు కలిగే నష్టాలు, ఈ నెల 6న జరిగే అపెక్స్‌ కౌన్సిల్‌ సమావేశం అజెండా తదితర అంశాలను కూడా సిఎం కెసిఆర్‌ గవర్నర్‌కు తెలియజేశారు. ఇదిలా ఉండగా ఇటీవల ధన్వంతరి అవార్డును అందుకున్న గవర్నర్‌ తమిళిసై సౌందర్‌ రాజన్‌ భర్త ప్రముఖ నెఫ్రాలజిస్ట్‌, బెస్ట్‌ మెడికల్‌ టీచర్‌, డాక్టర్‌ సౌందర్‌ రాజన్‌ను ముఖ్యమంత్రి కెసిఆర్‌ అభినందించారు. డాక్టర్‌ సౌందర్‌ రాజన్‌ను సిఎం కెసిఆర్‌ దుశ్శాలువా, పుష్పగుచ్ఛంతో ఘనంగా సన్మానించి అభినందనలు తెలియజేశారు.
గవర్నర్‌తో సిఎం భేటీ
RELATED ARTICLES
